تئهرانداکی محرملیک ده تئهرانلیلار

   هر زامان کئچمیشدن الیمیزه گلیب چاتان دبلرین ایلی  گلدیکده اوشاقلیغیمیزدان قالان خاطیره لر، بیزی اولدوغوموز یئرده او گونلری کئچیرتمه‌یه ماراقلاندیریر. ایل بایرامی، عاشورا تاسوعا، چیلله گئجه سی، قوربان بایرامی.. باشقا عزیز گونلر گلدیکده بؤیودویوموز یئرده کئچیرتمه‌ییمیزین، باشقا دادی اولور. هره‌ سینین اؤزونه عایید دادی وار. ائله اونا گؤره ده چوخ زامانلار بو گونلری اؤز یئریمیزده کئچیرتمه ییمیزی اولدوغو قدر الدن قاچیرتمیریق. الدن قاچدیقدا حسرتله گونلری کئچیرتمه لی اولورسان. چالیشیرسان اولدوغو قدر اونا اوخشار بیر دورومدا اولاسان.  

   بو ایل محرملیک ده 4 گون دال با دالا تعطیل اولمادیغینا باخمایاراق، ایشیمیز اولدوغوموز اوچون تئهراندا قالمالی اولدوق. کئچن ایللرده محرملیگین اول‌لرینی تئهراندا اولدوغوموزا گؤره، هانسی یئرلرده  اؤز یئرلریمیزه تای محرملیگین کئچیریله‌جه‌یینی بیلدیگیم اوچون، هارا گئده‌جه‌ییمی یاخشی بیلیردیم.    

  تئهراندا اولوب یاشانان محرم دب‌لرینه بیر آچیق‌لاما وئرمه‌لی‌یم:

تئهراندا ایکی جوره دسته لر وار:   

1- بؤلگه لردن(شهر، کند...) گلنلرین دسته لری(هئیئت لری)؛ بو دسته لرین سایلاری باشقالاریندان چوخدور.  

 2- تئهراندا محله دسته‌لری کی بونلارا قاتیلانلار آز اولورلار. محله هیئت‌لری، محله‌ده اولان‌لارین تئز-تئز یئر ده‌ییشدیک‌لری اوچون یئرینه اوتورمور. تکجه قدیم محله‌لرده یارانان هئیئت‌لر قالیرلار. اونلاردا دا باشقا محله‌لره کؤچن‌لر او گونلر قاییدیرلار. 

   بؤلگه لردن گلنلر، بؤلگه لرینده کئچیریلن محرملیگه تای محرملیگی بوردا کئچیرتمک ایسته ییرلر. ائله اونا گؤره ده اوردا اوخونان نوحه لر، اوخشامالار، رجزلری بوردا یئرینه یئتیریرلر. اولا بیلسین کی تام اؤز یئرلرینه تای کئچیرنمه سینلر، آنجاق یاخینلیق لاری چوخ اولور. تئهراندا هر یئردن چوخ آذربایجانلی‌لارین هیئت لری واردیر. دئمک اولار یوزه دوقسان تورکلره عایید دیرلر، البت باشقا یئرلره عایید ده دسته لر وار آنجاق سایلاری آذربایجانلیلارا گؤره چوخ آزدیلار. 

    تورکلرین ده آراسیندا، اردبیل، ساراب، میانا، شبستر، سراسکند، تیکان تپه، زنجان، اراک، همدان، رزنلیلرین هیئت لری چوخدور.  ائله کی بونلارین هر کندینه عایید بعضن ایکی اوچ مسجید اولور. مسجیدلرین، حوسئینیه لرین یئرلری، او بؤلگه لردن گلنلرین چوخ سایی دا بیر منطقه ده یئرلشدیکلری یئرلریندن آسیلی دیر. آنجاق زامان سوره سینده ائولرینی دَییشیرلر. اوشاق لار آتا- آنالارینین ماراقلارینی منیمسه یه بیلسه لر، هیئت لره گلیرلر، منیمسه مه دیکده هر نه یی دَییشیرلر.  

   باشقا یئرلردن سوره لی آخینلارین اولماسینا گؤره، بؤلگه لره عایید دبلری منیمسه ینلر ده آرادان گئتمیر. بیز تئهران دولانیب نوحه اوخویان دسته لری آختاردیقدا، هر یاریم ساعات بیر دسته ایله اولوب، یوللانیب باشقا بیر محلله ده بیر باشقا دسته یه قوشولوردوق، بو دسته لرده نه آختاریردیق بللی ایدی، آنجاق نییه تئز یئریمیزی دَییشیردیک بلکه دئمک اولمویا.  

   ایکی-اوچ گون محرملیگی تئهراندا دولاندیقدا تئهرانی یاخشی گؤرمک اولوردو. بوتون دسته لرده تورکو اوخونماغینا باخمایاراق، گنج و اوشاقلار بیر-بیرلریله فارسی دانیشیردیلار. ندنی‌نی بیلمک اولموردو! اولوردو کی بیز اونلاری دانیشدیردیقدا بیزی ایله تورکو دانیشسین‌لار، آنجاق بیر-بیرلر ایله فارسی دانیشیردیلار. آدام نظرینه گلیر تئهران بیر ده‌ییرمان داشی نا بنزه ییر، بوغدالار اویودولدوکده هامیسی بیر-بیرینه تای اولور. هر زامان دا اویوتمه یه بوغدا گلیر.   

   آنجاق بیر سیرا دا دسته لر وار ایدی کی محلله لرده بیر بؤیوک علم لری گؤتوروب یوللانیردیلار، او شئی کی یوخ ایدی، نوحه اوخوماغی ایدی. بلکه ده وارایدی من گؤرموردوم. بو دسته لرده اولانلارین سایلاری آز اولوردو، آنجاق هامیسی گنج اولوردولار. قولاق آسدیقلاری نوحه لر ایسه پاپ موسیقی یه بنزر نوحه لر ایدی. ائله بو دسته لرده ده چوخلاری تورک اوشاقلار ایدی. آنجاق تورکلوکلرینی منیمسه‌دن بیر اؤزل‌لیک گؤرونموردو!