بیر دیللی یاغیر

  بایرام گونوندن باشلاناراق یاغینـلارین هله ده دالیسی وار. بایرام گونو قاریلا باشلانان یاغین، شیدیرقی یاغیشلارلا آردیلاندی، سونرا خیمیر-خیمیر کسیلمدن یاغدی، ایندی ده آرا سیرا یاغیر. 

  بو ایل، نئچه ایللر چؤللردن کوسن اوتلار، یئنه ده چؤللره قوناق گلیب، یئر گؤی دئیه_سن ال-اله وئریب_لر اؤزلرینی اوزه چکه_لر. هر نه ایسته_سه_لر اؤزلری بیلرلر، آنجاق فرقلی یازی یادداشیمیزدا ساخلاتدیریرلار. هر کیمه زنگ آچیرسان، یئرلرینده باشقا ایلین اولدوغون وورغولویورلار. دئییرلر یاشیل_لار دا باشقا یاشیل دیلار. هر نه تزه دیر. چوخ سئویرسن گئده_سن هئچ اولماسا بیر گونلوک، یئر به یئر ائلیـیه بیلمیرسن. آمما بیلیرسن گئتمه سن عومور بویو حسرت چکه_جکسن.

قارا یازی

   دونن یولداشلاردان ائشیتدیم، شریف بیلیم یوردونون  آذربایجانلی اؤیرنجی_لریندن بیرینین اوزاقلیغینا او بیری دونیا دؤزه بیلمیـییب چکیب آپاریب. بو خبر نئچه یؤندن چوخ آجی ایدی. بیرینجی سی، بیر گنجین گنج چاغدا دونیانی قویوب گئتمه_سی دیر کی آنا-آتاسی یاشایارکن او آجی دا اونلارلا یاشیـیاجاق. ایکینجی_سی گنجین باجاریق_لی اولدوغو ایدی، یاخشی یئرده تحصیل آلماغی بیر یاندا چئشیتلی قونولاردا اوخویوب اؤیرنمه_یی، درینلشمه_یی،اونو باشقا اؤیرنجی_لردن فرقلندیرمیشدی. اوچونجوسو سوسیال، سیاسال باخیشیدی بئله یاشاماغا داوام وئره بیلسه_یدی گله_جک_ده توپلومونا چوخ دیرلی اولا بیلردی. دوردونجوسو ده اونون تورکجه یازی یازماقدا باجاریق ایدی. تکجه قونو ایکی اونو یاشاییشا ایلگی_لندیره بیلیردی یازماغی دیر. یانی یارادیجیلیغیدی. دونیادا قالماق ندنی ده اؤز دئدیـیینه گؤره آناسینین گونده اوچ یول اونا زنگ آچماسیدی، ایسته_میردی آناسی زنگ آچدیقدا اونون سسین تئلفون دالیندان ائشیتمز اولسون.  

  یازدیغیم سؤزلرین  صاحابی حمیدرضا عبدی ایدیر، دونن سحر چاغی گئجه یاریسینین قارانلیغیندا دونیاسین دَییشیب.  

ایسته_سز اونون روحونا بیر فاتیحه اوخویون 

قووالا قاشدی

  بوگون واختیم اولمادان، دوشرگه ده دوشوب، اَیلنمه_ییمه واقت یوخدی. اونا گؤره ده تئز تله سیک باخماغا دا زور دورومدایدیم. بئله تله سیک گلیب گئتمک اوشاقلیقدا اوینادیغیم "قووالا قاشدی" اویونو یادیما سالیر. او اویوندان آییرد بیر شئی یادیمدا یوخدو، تکجه بیری قووالاییب بیری قاشدیغی یادیمدادی. ایندی ده دئیه سن او اویونداییق، واقتی قووالیـییریق توتا بیلمیریک. قاچمالیـیام...

یولدان قالمامالیدی

   نئچه گوندن قاباق سؤز وئرمیشدیلر داغا گئدیب، اوتلاردان ده_یه_لر. او گون گلیب چاتمیشدی، اونلار ماشینلارینی چایین قیراغیندا قویوب، دمیر کؤرپونون آتلییب، داغا ساری یولا دوشدولر. یاغیش دایانمادان یاغیردی، داها دوغروسو یاغیش ماتینا دوشموشدو، خیمیر-خیمیر یاغیردی، گؤزلر قیـییلی یولو گؤره بیلیردیلر.  

بلتچی_لری یولون هارا اولدوغونو گؤرستدیکده، یولون یوققوجلوغو گؤزه چارپیردی. یول_بیرلری قاباقدان، اونلا اری ده اونلارین دالیسیجا آددیملییردیلار.  یوققوج نفسینی کسمیشدی دئیه_سن، دایانیب، اونلا بیرلیکده اری ده دایانیب، بیر قورتوم سو ایچدی. نئچه آددیم آتمامیشدان، قارنیندان بیر سانجی باشلاندی، گؤزلری قارالیب، نفسی کسیلیردی، آددیم آتماغا اینجاری قالمامیش_دی. بئله اولماغینی سئومیردی، دایانا-دایانا ایره_لیله_دی. داها گئدنمیردی، اونلا بیرلیکده اری ده دایاندی.  

  یول بیرلرینه دئدیلر اونلار گئتسینلر، بونلار دا دایانیب گلرلر. یول بیرلری سیز یولو تانییانماسیز دئیه_رک اونلاری گؤزلمک ایسته_دیلر. آنجاق اونون نفسی کسیلردی بئله دانیشا بیلمه دیـیینه گؤره، اری یول بیرلرینه دئدی بیز سیزی بوردا گؤزلیـیه_ریک سیز گئدین. یول بیرلری یولا دوشوب گئتدیلر. ایسته_دی یئرده اوتورسون، اری قویمادی. "بیر آز دایان قاباقداکی داشین اوستونده اوتورارسان" اری دئدی. ارینه اؤززونون بوش یئرینه گلدیـیین، اونو دا یولوندان قویدوغونو دئدی.  

سانجیسی چوخالمیشدی. بئله اولمادیغینی دشوننمیردی، نئجه اولمالیدی یولا چیخمالیدیلار. 

هر کس داغا چیخانمادیق_لارینی قادین اولدوغونا باغلایاجاقدیلار. آمما بئله دئییلدی، اونون ندنسیز سانجیلانمیشدی، دئیه سن داغ توتموشدو. آخی چوخدان ایدی داغا چیخمامیش_دیلار.  

  نفسی یاواش-یاواش یئرینه گلیردی، یولا دوشمک_لرین ایسته_دی، یولون دیکه_لیـیی قالمامیشدی، قالسایدی دا سانجی_سی اولمادان ائله بیل تزه نفس یولو آچیلمیشدی، داغین تر هاواسی اؤچک_لرینه دولوردو. یول بیرلری گؤزدن ایتمیش_دیلر. اونلاری تاپماق اوچون اورتادا اولان اوجا داغا چیخمالی_دیلار. گدیـیی آشدیق_دا هاردا اولاجاق_لارینی بیلمک اولوردو. اوتلارین قوخوسو بورنا دییردی. سانجی دا بوتونلوکله داغین اته_ییندن یاغیش یویوب چایا آخیتمیشدی.

دینجلمه لیدیم

   هر آغیزدان بیر سؤز چیخیردی، بوتون آغیزلار، آغیز-آغیزا وئرمیشدیلر، آغیزلاردان چیخانلار نئچه قات اولموشدو. بوتون قولاقلار قولاق-قولاغا وئرمیشدیلر، آغیزلاردان چیخانلاری آییرد ائله_یه بیلمیردیلر، آغیزلار قاباغا گلیب، قولاق_لار یانا بورولوردولار. گؤزلر ده دایانمادان یان-یووره_یه دونوردولر، دوداقلانان سؤزلری بلکه سئزه بیله_لر، یاواش-یاواش اللرین ده ایشلری دَییشیلیردی، بیرلری آغیزلارا کؤلگه سالیردی، بیرلری ده قولاقلارا گودوکچو اولوردو. بوغازلار دا یاواش-یاواش اوزانیب، دامارلاری شیشیردی.  

   گؤزلر، قولاقلار، دوداقلار، آغیزلار دایانمادان ایشلییردیلر، یاواش-یاواش آیاقلار دا اویناماغا باشلامیشدیلار. دای دیل-دوداغی سولاندیرماغا دا ماجال یوخ ایدی. بیر آن دایانسایدیلار، سؤزلری دایانمالیدی، دایاندیق دا دا قولاقلاری گلن سسلردن بیرلرینی سئچیب قولاق آسمالیدی، آمما اونلار هره_سی هر کسدن چوخ بیلیردیلر. اونلار، نئچه زامانلار ائله او گونو گؤزلمیشدیلر، سؤزلرینی هر کس بیلمه_لیدی، بئیینلرینده اولان سؤزلرین بؤتونلویونو  بوشالتماق واقتی یئتیشمیشدی. هئچ نه_یی ساخلامامالیدیلار. آغیزلاردان هر دن بیری سوسوردو، گؤزلرین ده چوخو یومولموش دوروموندایدی، اللر ده یانلارا سالینمیشدیلار. سنین ده هر نه_ییوین دایانماق زامانی دئیه_سن یئتیشمیشدی، بیر یوللوق دینجَلمک ایستیـییردین، بیردن ائله بیل سویا جومدون، هئچ نه ائشیتمه دین گؤزلریوی آچدیق_دا سو گؤزلریوه دولدو ، ایچیوی چالدین، سسلر آزالمیشدی، آنجاق ائله بیل بوتون اللر سنه ایشلییردیلر بدنیوین هر یئری یورقونلاشمیشدی، دینجلمک ایستیـییردین.  

بیر سیزیلدی سس قولاغیوا گلیردی، دئیه_سن آغلیـییردیلار، ائله بیل آناوین آغلاماق سسی ایدی، بلکه ده اؤز آغلاماق سسین. هر نه ایدی، سنین اوچون آغلیـییردیلار، آما سن دینجلیردین، دئیه سن سنین دینجلمه_ییوه آغلیییردیلار. آنجاق سن دینجلیردین، ایستیـییردین دئیه_سن آغلامایین آمما اینجارین یوخوایدی ترپنمه_یه تکجه دینجلمه_لیدین..