یاشادیغیمیز چاغدا دونیا منی دوشونه بیلمیر. دونیانین دوشونه بیلمهدیـیی مندن آسیلیدیر یوخسا اوندان بیلمیرم. دونیا منی دوشونمهدیـییندن اؤترو من ده دونیانی دوشونمکدن چکیلیرم. من دئییرم دوشونسون، دوشونمور جهنمه-گؤرا. نهقدر بو دونیایا فیکیرلشیرم داها چوخ سینیرلنیرم. هر دن ده سؤز گلیشی بیر سؤز آتیرام، بلکه منی دوشونه بیله، دوشونمور کی هئچ داها چوخ کوسور. من محبتلی سؤزدن باشقا بیر سؤز دانیشمیرام!. دئییبلر "محبتدن مرض اسگیکدیر" دوز دئییبلر. ایکی الیمی بالا بولاییب سوخورام بوغازینا، دئییر سن منی بوغماق ایستیییرسن.
هر گون سووشور دونیا داها چوخ مندن اوزاقلاشیر، مندن اوزاقلاشماقدان سینیرلنیرم. نئچه گون دیر اؤز-اؤزومه دوشونورم، من دونیانی دوشوندویوم اوچون قرار دئییل دونیا دا منی دوشونه. دونیانی راحات بوراخیرام بیر آز دینجلسین. دونیاکی منی دوشونمویهجک من باری دونیانی دوشونوم. ال-قولونا دولاشماییم. اؤزوم اوچون اولمالی اولسا دا دونیانی دونیا کیمی دوشونمک قرارینا گلیرم. دوشونه بیلهجهییمی بیلمیرم! صاباحلاری گؤزلویورم دونیانی دونیا کیمی دوشونمک اوچون.
آفریقاداکی فوتبال یاریشمالارینا قاتیلان اؤلکهلری اوچ یئره بؤلمک اولار:
بیرینجی سی: آوروپالیلارلا، آوروپا کؤکنلی اؤلکهلر
ایکینجیسی: گونئی آمریکا اؤلکهلری
اوچونجوسو: اوچونجو دونیا آدلانان اؤلکهلر (آفریقا اؤلکهلری ایله آسیا اؤلکهلری)
آفریقا اؤلکهلری نه قدر یاخشی اویناسالار، اویونلاری یاخشی سونوجلانمیر. بو سونوجلانماماغین ندنلری بونلاردیلار: بیریاخشی ساوونانمیرلار، ایکی یاخشی دیرلنمیرلر، اوچونجوسو ایسه اویونو گلیرلر. اؤنده اولدوقدا یاخشی ساوونمادان یوگورورلر.
آوروپا اؤلکهلری ایسه آفریقانین تام ترسینه دیرلر. یاخشی ساوونوب، یاخشی دیرلنیب، یاخشی اویونا سالیرلار. اوندان باشقا دا سونونا تک اویونو الدن اؤتورمورلر.
آسیادان قاتیلانلارین دا آوروپالیلارین قارشیسیندا کیچیلمکلری گؤرونور.
گونئی آمریکالیلار ایسه، فوتبالی یئرلیلشدیریبلر.
بیزیم درس آلدیغیمیز بونلار اولا بیلر:
بیر؛ وارلیغیمیزی یاخشی ساووناق.
ایکی؛ وارلیغیمیزدا یارانان فورصتلری دیرلندیریب، الدن قاچیرمیـیاق.
اوچٰ؛ اؤزگهلرین اویونونا گلمیـییب، اویناتماغی اؤیرنک.
دؤرد؛ کیمسهیه کیچیلمییک.
یادیما گلیر، درسلرین ایچینده منیم اوچون ان آغیر درس، بیتگی تانیماق درسی ایدی. اونون ندنینی اوندا باشا دوشمهسم ده ایندی بیلیرم. او درسده ایشلنن سؤزجوکلر بئینیمده اوتورموردولار. اوندان دولایی بیتگیلر منیم بئینیمده کودلانانمیردیلار. کودلانمادیقلاریندان اؤترو بیتگیلرله ایلگیلنمیردیم. بو ایلگیلنمهمهیین باشقا ندنی ایسه، اؤز بیتگیلریمیزی تانیماماغیم ایدی. من تانییان بیتگیلرین سایی، داشچاتداسا ییرمییه چاتا بیلر. هر زامان یئنی بیتگیلر تانیناندا اؤزگه آدلارلا تانینیر. اونا گؤره ده منیم اوچون چکیجی اولا بیلمیر. اؤزومه هر زامان سؤز وئریرم بیتگیتانییان گؤرسم واقت قویوب اؤیرنم. آنجاق سؤز وئرمهییم سؤزده قالیر. من ده بیتگیلردن اوزاقلاشیرام.
آذربایجان تورکجهسینده بیر سیرا کلمهلر وار، اونلاردا اوزون سورهده حرف دییشمهلری آرالاریندا اوز وئریب. بو دییشمهلر باشقا تورک دیللرینین دئییملرینده اوز وئرمهدن قالیر. البت بیر چوخ کلمهلر ده وار باشقا تورک دیللرینین دئییملرینده دوز ایشلنمیر آذربایجان تورکجهسینده دوز ایشلنیر. بو تورک دیللری ایشلتدیکده سینیرلینمهیین، تورکو کؤکده بیر دیلدیر، زامان سورهسینده فرقلی یئرلرده فرقلی یؤنلر گوتوروب دییشمهلر اوز وئریب. بو قونودا دیل اوزمانلارینین دوز گؤروشلری اولا بیلر. بیزلر تکجه ائشیدیریک. هر حالدا بو قونویا گیرمک ایستهمیرم. آمما ایکی کلمه وار کی اونلار بیزده بیر تهر دئییلیر، تورکیهلیلرده باشقا تهر. نظره گلن تورکیه دئییمی دوز اولمالیدیر. او ایکی کلمه بونلاردیلار:
1- گولشمک (GÜLƏŞMƏK) تورکیه دئییمینده گورشمک (GÜRƏŞMƏK) ایشلنیلیر. "گور"(GÜR) سؤزجویو زور، گوج آنلامیندا دیر. بو سؤزجوکدن یارانان "گورولتو" سؤزجویو بیزده ایشلنیر.
"گولشمک" سؤزجویون کؤکو "گول"(GÜL) دیر. گولشمک دئدیکده ایکی آدامین بیربیرینه قارشیلیقلی گولمک دیر.
2- "کؤینک"(KÖYNƏK) تورکیه دئییمینده گؤملک(GÖMLƏK) ایشلنیلیر. کؤینهیین کؤکونو من بیلمیرم، آنجاق "گؤم" قویلاماق آنلامیندا دیر.
یوخاریدا آچیقلاماریم اوندان اؤترو دئییل کی بیز ائله ایشلدک، تکجه بیلسک گؤرر.
هر کس گلیر گیلئیلنیر، هاردا اولدوغویلا باغلی، بیر سؤزلر ده یوکلویور گئدیر. یوکون اؤلچوسو ده کیمین یانیندا، نه دانیشیلا بیلهجکیه باغلانیر. اؤز ایش-گوجوندن ده سوروشاندا دورومدان گیلئیلی اولدوغوندان ایشلردن قاچماغی وورغولویور. سوروشورسان: دوز ایش گؤرورسن؟! دئییر اؤزومو کیمه، نهیه یوروم. اؤزوندن راضی اولوغونو سوروشدوقدا، راضی اولا بیلهجک دورومدا گؤرسدیر. بئله بیر دورومدا بوندان بتر ایش گؤرمک اولمادیغینی بیلدیریر.
گیلئیلیلیک او قدر چوخ اولور، آدام هردن بوتون قاپیلاری اؤزونه باغلیییر. هر نه اولسا قولاغی دینج اولور. آمما اینسان توپلومدا دوغولدوغونا گؤره قولاق دا دینج قالان دئییل. یئنه دئییر؛ بو دفه گیلئیلننلره قیرمیزی دئیرم گیلئیلنمهسینلر. بیر دوز ایش گؤروبدیلرسه اوندان دانیشسینلار! دانیشماقلا دیدیشمه بیر اولور. "سن نه ایش گؤروبسن کی منه پولچوک قوشورسان؟! قولاغینی دلیب گئنه باشینی قاریشدیریر. اؤزونه سؤز وئردیکلری یادیندان چیخیر...