دونیالیق فوتبال یاریشمالاری دونیادا چوخ آداملاری ائتگیلندیره بیلیر. یان-یؤورهمیزده اولان آداملارین چوخو فوتبالدان خوشلانماسالار دا، فوتبال قونوسوندا دانیشیرلار. هئچ اولماسا ایستیـییرلر بیلهلر سونوج نئجه اولدو. فوتباللا ماراقلانمایان قادینلار دا ائتگیلنیرلر. بو ایل فوتبال یاریشمالاریندا هانسی اؤلکهنی دستکلمک منه ماراقلی دیر. آختاریرسان اؤزووه اوخشایان تاپاسان. هامی اوخشویور دا اوخشامیر دا. گئچمیش ایللرده بلکه آدام راحاتجاسینا ایلگیلنه بیلردی. البت، بیر سیرا آداملار، یاخشی توپ اوینایان تیملری ایستییرلر، البت یاخشی اویناماق دا هر آدامدا فرقلی تعریفلنیر. اونلار توپچیلاردیرلار، ایلگیلنمک ده حاقلاری دیر.
بیز کی توپچی دئییلیک بیزه نه هارا ایلا ایلگیلنک! یاخشیسی بو دور ایلگیلنمییک!؟ یوخ!.
نفسیلرینین قاباغینی آلانمایان آداملارا وئریلن آد "قارینقولو" دیر. قارین قولو آذربایجانین بیر سیرا یئلرینده ایشلنیلیر. قارین قولودان باشقا، "بوغازقولو"، "بوغازییوغون" دا ایشلنیلیر. باشقا سؤزجوکلرین ایشلنیلمهسینی من ائشیتمهمیشم. قارینقولو آداملار، قارینلارینا قوللانماغدا سوچلانیرلار. بو سوچلانمایا باخمایاراق، اینسانلارین بیر چوخو آز یئسهلر ده بوتون واقتلارینی، پول قازانماغا قویورلار. بو واقت قویماقلارینا سوچلانمیرلار هئچ، آلقیشلانیرلار. دئییرلر قارینقولولارین دوْیماقلارینا گرک گؤزلری توخ اولا. سیزجه ایندیکی زاماندا گؤزو توخ آدام تاپماق اولار. گؤزون اؤنونه هر گون چئشیتلی شیءلر قویولور. اونلاری گؤردوکده نئجه توح اولاجاق بیلمیرم. گؤرهسن قارینا قوللوق ائلهمهیین سوچو چوخدیر، یوخسا گؤروب دوْیماماغین؟!. بوغازین یولون کسمهلیـییک، یوخسا گؤزلره سوزگج قویمالیـییق؟!
اولماسا دئییرم عومور چاتسا ایکیسین ده دویوراق!.
هردن بیر سؤزلرین تورکجهسین مندن سوروشاندا قالیرام نه دئیم. اونلاردان بیری تشکور ائلهمک دیر. "مینتدارام، ساغ اولون، تشکور ائلیرم، اللرینیز آغریماسین..." کیمی سؤزجوکلردن فایدالانیریق. بو سؤزجوکلرین ایکیسی(مینت،تشکور) عرب سؤزجویو، ایکیسی ده دوروملا باغلی دئییلیر. ناصر منظوری بو کلمهنین اولماما ندنینی آذربایجانلیلارین آراسیندا قول اولمامازلیغی بیلیر. او آذربایجانلیلارین بئله دورومدا فایدالاندیقلاری سؤزجویو "پایین چوخ اولسون" دئییر.
باشقا سؤزجوک ایسه تصمیم توتماغا نه سؤزجوک ایشلدیلمهسی دیر. بو سؤزجویون یئرینه "قرارا گلمک" ایشلدیرلر. "قرارا گلمک" سونرادان یارانما سؤزجوک دیر؛ یاری عرب، یاری تورک. بو سؤزجویون یئرینه ده اولا بیلر چئشتلی سؤزجوکلردن فایدالانالار. ایشلنن سؤزجوک بیلیرسینیزسه یازساز یاخشی اولار.
قولاغیمیز هر آغیزدان بیر سؤز ائشیدیر. آغیزدان چیخان سؤزلر، بئیینپروسهسیندن یارانیرلار. فیکیرلشمیین گؤرونتولری اولان آداملار دا فیکیرلشیرلر. دوشونجه آداملاری دئدیـییمیزده بیر آز باشقا آداملارلا فرقلی دوشوننلره دئییریک. بئله بیر آداملار دا نه قدر دوشونجهلی اولدوقلاری، اولدوغو یئرلرین دورومونا باغلی اولاراق، چئشیتلی یئرلرده فرقلی یئرده دورورلار. بو دوروم، دونیادا اولان هر بیر قونودا گؤرونور. دیلیمیزله باغلی فیکیر آداملارینی، بیر یئرده دانیشدیراندا یوزه-یوز دئییشمهیه چکیر البت اوستاد-اؤیرنجیلیک آرادا اولماسا. نییهسینی من بیلمیرم!. دیلیمیزله باغلی دوشونجهلری بیر یئره توپلاماق چوخ زور آپاریر. هر کس دوورهسینه بیر جیزیق چکیر، جیزیغا یئرلشمیین دوشونجهلری میردارلیـییر. البت، بونلاری بئله یازدیقدا تام دا دورومو چیرکین گؤرمورم. دوشونجه آداملارینین ایشلریندن ده واز گئچمک اولماز. دیل-ادبیات آداملاریندا آغ-قارا گؤروشو آدامی بیر آز قیدیخلیـییر! هر کس سرت اولان یئرده ادبیات یارادیجیلارینی اینجه گؤرمک ایستیییریک.
بو گونکو دونیادا هر نه گلوباللاشمادا، یانی ائورنسللشمه_ده دیر. هر نه_دن دولایی، ادبیاتدا ائورنسللشیر. اونا گؤره ده یازیلاریمیز ائورنسل اولمالی دیرلار. بئله سؤزلری سیز هر کسدن ائشیده بیلرسیز. ائورنسللشمک نه دئمک دیر؟! بیری منه آچیق_لاسین. ائورنسل دونیادا اینگیلیس دیلی، سونرا دا فرانسه، اسپانیا، آلمان و باشقا دیللر دونیا دیللری تانیندیقدا، او دیللرده یازیلانلار دا ایستر-ایستمز ائورنسل اولورلار. گوجلریندن آسیلی اولاراق، اونلارا عایید هر نه گلوبال دیر. ایندی بیز گرک یازیلاریمیزی ائله یازاق کی اونلار آلا بیلسینلر، آلانماسالار بیز بوشونا یازمیشیق دئیه_سن!. لوکال یازمیشیق!. بیز تانینمادیغیمیزا گؤره ده، بیزیم دونیا گؤروشوموز، دبلریمیز، کولتوروموز، آیین دوشونجه_میز تانینمیـیب هئچ کیمین طرفیندن آلینمیـیاجاق. آلینمادیغینا گؤره ده بیز اؤزوموزی اونلار کیمی یازمالیـییق. بیر بئله اوخشاتمانی نئجه اوخشادا بیله_جه_ییک! سیزجه بیز اؤزوموزو اونلار کیمی یازا بیله_جه_ییک؟! بیز اونلاری یاشاییشلارین یانسیلایا بیلسک، یازماقلارین دا یانسیلایاجاییق. بیر عومور گودوکچو اولاجاییق، گؤرونمه_ییمیزی گؤرک!.