داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
دیلی اؤیرنمه‌لی‌ییک یوخسا یوخ
یقین سیز ده بیر چوخلو دیلدن دانیشان و دیلیمیزین دوغرو-دوزگون اؤیرنمک سیستمی اولمادیغیندان گیلئی‌لنن یولداشلار ایلا اوزلشیب‌سیز.
بو گیلئی‌لنن یولداشلارین چوخونا دیله گؤره سوروشاندا دیل اوزمانی اولمادیق‌لارینی وورغولویوب، دیلین ایلکین سورغولاریندان بویون قاچیریب‌لار. گیلئی‌لی‌لیک‌لر اولدوقجا دوز دیر. هر کس بو چتینلیک‌دن دانیشما‌لی دیر. بو چتینلی‌یین چؤزمه‌یی‌نه ایندیلیکده الیمیزده نسنه اولماسا دا، باشقا چیخیش یوللاری آختارمالی‌ییق. چیخیش یوللارینین بیری ده هر کس اؤز قدریجه دیل اؤیرتمنی اولماق‌دیر.
آذربایجان تورکجه‌سی یقین آردان گئدن دیل دئییل. آنجاق بو دیل دونیادا اولان باشقا هر بیر دیل کیمی دونیانین معنوی وارلیق‌لاریندان بیری‌دیر. دیلی دوزگون اؤیرنمه‌دیک‌ده، دیلده یارادیجیلیق آزالیر. هر بیر دیلین یارادیجیلیغی آزالسا او دیلین گلیشمه‌سی چتین اولار. آنجاق بوردا بیر سؤز وار دیل حاق‌لاریندان دانیشانلار، اولدوقجا بو دیلی اؤیرنیب، اؤیرتمه‌لی‌دیر‌لر. هر کس یاشاماق اوچون بیر بؤللو سورونلاری اولسا دا، بیر دیلی اؤیرنمه‌یه یقین واقت تاپا بیلر. من بئله دوشونورم، بیر دیلی اؤیرنمک‌دن بویون قاچیرانلار، دیلین یاییلیب اؤیرنمه‌یین گرک‌لی‌یینه اولدوغو قدر اینانماییب‌لار. البت دئدیم بئله دوشونورم اولا بیلسین یانلیش دوشونورم.
نه‌یه یاشاماغیمیزی بیلمه‌لی‌ییک
کئچن یازیلارین بیرینده ندن دونیایایا گلدیگیمیزین بیلینمه‌دیگین وورغولامیشدیم. دونیایایا گلدیگیمیز اؤز الیمیزده اولماسا دا دونیادا نییه یاشاماغیمیزلا نئجه یاشاماغیمیز اولدوغو قدر اؤز الیمیزده دیر. بونو آرتیرمالی‌یام، گلیب بیلینجه دونیادا نئجه یاشاماق ایستی‌ییریک، عومروموزون اوچدن بیری سووشوب گئدیر. به‌یندیگیمیز یاشاماغی دا سوردورمه‌یه یاتاق‌لارین حاضیر اولمادیق‌لاری اوچون یاتاق‌لاری سورادان حاضیرلاماق دا هم زور هم ده واقت آپاریر. بو آرادا اؤزووو تله‌یه سالیب ائولنسن ده، یاتاق سهل دیر، یاتاغا فیکیرلشمه‌یی ده فیکیرلشنمی‌یه‌جکسن. او دور کی بیر زامان گؤزووو آچدیق‌دا دونیاوی دییشدیرمه‌لی اولاجاق‌سان. ایندی بیزیم یاتاق‌لاریمیز دا حاضیر اولماسا یاخشی یاشاماغی گله‌جک نسیللره حاضیرلامالی‌ییق، ایندی نئجه حاضیرلاماغیمیز دا اؤز بوینوموزا دوشر.
چیزگی فیلم وئبلاگی
چوخ گؤزل بیر دوشرگه‌ایله(چیزگی فیلم) تانیش اولدوم. بو دوشرگه چیزگی فیلم‌له ایلگی‌لنیر. عئینی زاماندا دوشرگه‌ده گئدن یازیلار ایکی دیلده اینگلیس‌جه بیر ده تورکجه ده یازیلیر. بو دوشرگه‌دن هر کسین خوشلاندیغینی اینانیرام. بو دوشرگه‌نی دولاندیران یولداشیمیزا جان‌ساغلیغی اوزون یاشام آرزیلی‌ییرام.
دئییملریمیز چالینیرمی یوخسا پایلانیرمی
"گونلوکلریم" دوشرگه‌سینده دئییملریمیز چالینیر باشلیغیندا بیر یازی گئتمیش‌دیر. بو یازیدا بیزیم دئییملریمیزی فارس‌لار چئویریب قوللاندیق‌لارینا توخونموشدو. بئله بیر چئویرمه‌لر چوخ اوزون زامان‌لار تورک کؤکنلی فارسی یازانلارین وریندن اوز وئریب. چئویررمه‌لرین بیر بوللوسو ساوادسیزلیق‌دان ترسه ده چئوریلیب‌لر. اؤرنک اولاراق ناصر منظوری دئمیشکن "صبیرداشینی" "سنگ صبور"-ا، "برکتلرین یئددیسینی" "هفت‌سینه" یانلیش چئویریب.
اوزون سوره بئله بیر یانلیش‌لیق‌لاری فارسلارین بئینینه، ایندی ده فارسلاردان بیزیم بئینیمیزه سوخوشدورور‌لار. البت بئله بیر یانلیش‌لیق‌لار تورکلردن اوز وئریب، یوخسا تورکو بیلن فارسلاردان، اوراسیندا قالمیشام. ایندیلیکده تورکو بیلن فارس تانیمادیغیما گؤره تورکلر اؤزلری بو دئییم‌لری آپاردیق‌لاری نظره اویغون گلیر. اولا بیلسین کی بوندا دا یانیلیرام. بئله بیر یییه‌لنمک تکجه دئییم‌لر یوخ بلکه دب‌لر، موسیقی، تاریخ، فیکیرآدام‌لاری و باشقا قونولاردا دا بوللوق‌جا اولور.
نییه دونیایا گلدی‌ییمیزی بیلیردیلر!
اوشاق‌لیق چاغلاریمدا نییه دونیایا گلدی‌ییمی بیریندن سوروشمادیم. دوزون سوروشسان ذئهنیمه ده گلمه‌دی. دونیایا گلمه‌یی بیر دوغال حاق بیلیب، یاشاماغی دا اؤز حاققیم بیلیردیم. اوشاقلیقدا نئجه بویومه‌ییمیزه بیر پلان یوخ‌ایدی دئیه‌سن. تکجه یادیمدا قالان سؤزلر، درس اوخویوب اؤزومه آدام اولدوغوم ایدی. بیر ده هر گلنه قوشولماماغیمیزی وورغولویوردولار. آمما کیمه قوشولدوغوموزو دئمیردیلر. تکجه پیس اوشاق‌لارین یانینا گئتمکدن چکین‌دیریلمیش‌دیک. کوچه‌لرده قالمیش اوشاق‌لاردان اوزاق‌لاشمالی‌دیق. یادیما سالاندا کوچه‌لردن باشقا یئرلر یوخ ایدی بیزیم بویومه‌ییمیزه. بیر خیل اوشاق بیر-بیریمیزه گیریب کوچه‌لرده بؤیویوردوک. هر بیر قد آتدیق‌دا اوشاق‌لاردان بیرلری یولدا قالیب سیرادان چیخیردیلار. اولوردو کی هر دن من ده یولدان چیخیردیم. اویوم‌لاشمادیق‌دا یولوموزو آییرمالی اولوردوق. آنجاق هر نه اولسایدی اوشاقلیقدا نییه دونیایا گلدی‌ییمیزی کیمسه بیلمیردی. دونیایا گلمه‌ییمیزین تکجه ندنی سویوموزو داواملامدیرماق‌ایدی. آنا-آتا دا نه اولاجاغیمیزا قرار وئره بیلمیردیلر. تکجه بیلیردیلر دوقتور موهندیس اولماق یاخشی ایدی. دوقتور موهندیس اولوب هر گلنین یانیندا باشلارینی اوجالتمالی‌دیق. هر بیر سوروملولوقدان قیراقدا یاشامالی‌دیق. آغریمایان باشلاریمیزا دستمال باغلامامالی‌دیق!