داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
معنوی گؤی برکتی
اینسان هر نه‌یی چؤزه بیلسه ده، بیر شئی‌یی هئچ زامان چؤزه بیلمه‌یه‌جک. او دا وارلیغین گوج قایناغی ساییلان بیر وارلیق دیر.
گون، آی، اولدوزلار، سئل، یئل، وولقان، زلزله کئچمیش زامان‌لارین گیزلی وارلیق‌لاری ساییلیرمیش‌لار. گیزلی وارلیق‌لار، زامان-زامان قوتسال‌لیق تاپیب‌لار. تانری یئرینه اوتوروب‌لار. تانری‌لار سرگیسی تاریخده قورولوب. یئرده یاشایان اینسان، آللاه‌لاری گؤیده آختاریب. ساو‌لار گؤیدن گلیب‌لر.
اینسانین دوشونجه‌سی گلیشدیکده تانری سایدیغی گیزلی وارلیق‌لارین، گیزلرینه ال تاپیب. یاواش-یاواش نئچه آللاهلیقدان، ایکی آللاهلیق، سونرا ایسه بیر آللاهلیغا چاتیب‌لار.
تک آللاهلیغا چاتاندان سونرا، اینسان، دونیانی تانیماغا چالیشیب. دونیانی تانیماق، سون یوز ایللرده چوخ سورعتله داوام تاپیب، بشر ده الده ائتدیک‌لرینه گووه‌نیب، هر نه‌یی چؤزمه‌یینه اینانیب. آنجاق بشرین تاپینتی‌لاری هاراجان ایره‌لی‌له‌دی‌یینه باخمایاراق، اؤلمزلی‌یه چاتا بیلمه‌یه‌جک .
اینسان‌لار، گئجه، گوندوز، ایشیق، قارانلیق، آی، گون، اولدوزو، یاغیش، قاری، معنوی گؤی برکتی بیلیب‌لر. آللاهی آختاردیقدا ال‌لر گؤیه قالدیریرلار. بو برکت، برکت‌لرین برکتی ساییلیر. اینسان‌لارین اینانج‌لارینا باغلی اولاراق، فرقلی سیمگه‌لری سوفرالارا قویولور.
قوران، برکت سوفراسیندا معنوی گؤی برکتی‌نی منیمسه‌دیر. ایشیق(شام) لا آینا دا کئچمیشده‌کی اینانج‌لاردان قالیب، برکت سوفراسینا یئرله‌شن نسنه‌لردن دیرلر.
آل-وئر برکتی
کؤهول‌لرده یاشایان اینسان‌لارین سای‌لاری آتدیقدا، اونلارین آراسیندا، ایش‌لری بؤلمک گرک‌لی‌یی اورتایا گلیر. اینسان‌لار ایلک گرکلیکلرینی اؤدویندن سونرا، توپلوم‌کیمی یاشاماغا، توپلوم ایچینده ایلگی‌لری یاراتمالی‌دیلار. ایلگی‌لر ایکی طرفلی اولدوغونا گؤره، بو آرادا بیر شئی‌لر آلینیب، وئریلیردی. آلیش-وئریش قارشیلیق‌لی اولمادان، ایلگی طرفلری راضی‌لاشانمازدیلار.
اینسان‌لار یاشادیق‌لاری سورجده آلیش-وئریشین ده‌یه‌رینه چاتیب‌لار. ایلک آلیش-وئریش یئمک اولوب‌دیر. اووچولار، اوولادیق‌لاری اوولاری، قارشیلیق‌لی پای‌لارلا ده‌ییشیرمیش‌لر. پایا پای وئریرمیش‌لر. وئریلن پای‌لارین ده‌یه‌ری بیر اولوب-اولمادیغینا باخمایاراق، ایکی طرفده راضی‌لاشیرمیش‌لار. توپلوم‌لارین ایچینده، یاشام سوردوکجه، بیر اؤلچو‌لر ده یارانیب‌لار. هر بیر نه‌یی ده‌یرلندیرمه‌یه، اورتاق اؤلچو گرکیرمیش. بو اولچو، زامان سوره‌سینده پول اولوب البت قیزیل(آلتین) دونیالاشمیش اؤلچو اولوب..
آلیش-وئریش اولمادان، یاشاماق چوخ چتین‌له‌شر. ایندیکی دونیادا هئچ بیر کس، آلیب-وئرمه‌دن یاشایا بیلمیز. آلیش-وئریشی ده‌یه‌رلندیریب، بیر برکت اولاراق، آللاه‌وئرن باشقا برکت‌لرله بیرلیکده، بایرام سوفراسینا قویولوب. آلیش-وئریشین سیمگه‌سی سیککه(دمیر پول) اولوب.
حئیوان برکتی
بیر جانلی‌نین یاشاییشینی ساغلایان هر نه، بیر جانلی اوچون برکت ساییلمالی‌دیر. اینسان اوغلو، چوخدان دونیادان قوللانماغی باشلاییب. هر گون، دونیانین نئجه قوللانماغینا بیر زادلار آرتیریب. اینسانین باشاریسی، اؤز قوللاندیق‌لارینی باشقا نسیل‌لر چاتدیرماق‌دا دیر. اینسان، دونیادا اولان باشقا جانلی‌لاردان دا قول‌لانمالی اولوب. آغاج‌لا گؤیره‌نتی‌لر بیرلیکده حئیوانلاردان دا قوللانیب. قوللاندا بیلدی‌یی هر حئیواندان قوللانیب.
مال-داوار، قوش‌لار، ایت، آت، تویوق، بالیق و سیز سایا بیلدی‌یینیز هر بیر حئیوان، اینسانین قوللوغوندا اولوب. اینسان آجلیغینی گؤیره‌نتی‌لرله دؤیورور. گوجونو ایسه حئیوانلاردان الده ائدیر. سوت-قاتیق‌دان توتوب، ات‌له یومورتایا قدر اینسانین گرکدی‌یی ساغلاملیغی ساغلاییر. حئیوان اینسانین یاشاماغینا دیرلی برکت اولور.
حئیوان برکتیندن، یومورتانی بویویوب سوفرایا یئرلشدیریرلر.
گؤیرمه برکتی
گؤیرمک، یاشاییشین تکرلرینی فیرلاندیریر. هاوانین شاختاسی گؤیرمه‌نی یاندیرار. آغاج‌لار دا ایلک گؤیه‌ریرلر. آنجاق بیر یول گؤیریرلر. سونرا دون ده‌ییشیرلر. گؤیرنتی آدلانان‌لار، اینسانین یاشاییشیندا اولان گوندم گرکلیکلرینی اؤده‌دیرلر. گوندمده یئییلن بوتون غیدالاردا بیتگی‌لر واردیرلار. تکجه اینسانین، یوخ بلکه بیر چوخ حئیوان‌لاریندا قارین‌لاری گؤیرنتی‌لرله دویور.
گؤیرنتی اولانا قدر آجلیق اولماز، گؤیرنتی اولمادیقدا آجلیق باشلار.
گؤیرنتی، برکت اولاراق اینسانین هر گونکی سوفراسیندا واردیر. ایل سوفراسیندا دا یئتدی برکتدن بیری اولاراق، اولمالی‌دیر. بئجردیلمیش گؤی‌لر برکت سیمگه‌سی اولاراق ایلک ائوده بسله‌نیب، جوجریب، آیاق توتدوقدا چؤل بایرامینا دک ساخلانیلیب، چؤل بایرامیندا چؤله آتیلار.
بوغدا، آرپا پاییزدا یئره سپیلیر، قیشدا یئرین آلتیندا بارلانیر، بایرامدا جوجریر.
مرجی، بوغدا، آرپانین گؤی‌لری، سوفرالاردا چوخ گؤرونور.
آغاج برکتی
آغاج دوغوجو اولدوقلا آغالیغی گؤتوروب. آغاج‌لار یئرله گؤی آراسیندا ایلگی قوران‌لار دیرلار. یئرله گؤیون ایلگی‌سیندن آغاج‌لار بارلانیرلار. تورپاق‌لا سو یئردن، نفسی گؤیدن آلیرلار.
آغاج‌لار ترسه نفس چکیرلر. دونیانین پاسلانمیش نفس‌لرینین پاسلارین آلیرلار. پاسلاریندان بارلانیرلار.
آغاجا تاپینماق کئچمیش‌لردن وار ایدی. آغاج بشرین ایلک گونوندن ایشینه گلیب. یاشی دا قوروسو دا. آغاجین برکت اولدوغونو بیر بیز یوخ دونیا بیلیر. خیریستی‌یان‌لار آغاجین اؤزونو بایراملاریندا بزه‌سه‌لر، بیزلر آغاجدان اولان‌لارلا سوفرالاریمیزی بزه‌ییریک. قدیمدن بزک قیرمیزی‌یا چالدیغیندان، آغاج برکتینین قیرمیزی‌لارینی سئچیریک سوفرامیزا قویوروق. آلما، ایده، گیردکان آذربایجاندا بول تاپیلان مئیوه‌لردن ساییلیرلار.