X
تبلیغات
رایتل

  علامه‌لر، عونوانینی چوخ ائشیدیب‌سیز. کئچمیشده هر ندن، چوخ بیلن کیمسه‌لر علامه دئییردیلر. هرندن دئدیک‌ده، بیلگی(عئلم) آلانیندا(ساحه‌سینده)، یایقین اولان‌لاری بیلیردیلر. اونلار اولان بیلگی‌لره ده بیر شئی‌لر آرتیریردیلار. بیلگی‌لرینی بیر‌کس‌لره ده اؤیره‌دیردیلر. گئنیش بیلگی‌لری اولدوق‌لاری اوچون، هرکسی یئنه‌بیلیردیلر. سیتئم‌لی(ایندیکی بیلیم‌یوردلار تکین)  بیلیم‌یئرلری اولمادیق اوچون، علامه‌لرین چئوره‌لری دؤنم‌لرینین بیلیم مرکزلری ساییلیردیلار. هر کس بو یئرلرده دئییلن سؤزلره اینانیردیلار. بونلاری اؤزومدن توخومورام ها! ابن‌سینا، خواجه نصیر،امیرعلی‌شیر کیمی کیمسه‌لرین یاشاییش‌لارینی نظره آلین.   

 

   علامه‌لر  بیزیم دؤنه‌مه ده گلیب چاتدی‌لار. بیزیم دؤنمده‌کی علامه‌لرین آنا بیلگی‌لری دین‌بیلگی‌سی اولوب، باشقا بیلگی‌لرله ده ماراق‌لانیب، یئری گلمیشکن ده، گؤروش‌لرینی بیلدیریب‌لر.  

  

   آمما ایندی، بیلگی‌ آلان‌لاری بیرنفرین الی‌چاتماز قدر گئنیش‌له‌نیب. هئچ کیمسه‌نین باجاریغی بیلگی آلان‌لارین بوتونلویونو قاپسایا بیلمیر. آنجاق گئنل اولاراق، باشقا بیلگی آلان‌لاریندان دا فایدالانماق قاچیلماز دیر.  بو اوزدن اورتا بیلگی‌لر اوزمان‌لیغی یارانیب‌لار. بو اوزمانلیق، بیر اورتاما گتیرن مرکزلرده یارانیب. اوردا اولان‌لارین هر بیری بیر آلاندا اوزمان اولوب‌لار. اؤز بیلیم‌آلان‌لاریندا تاپدیق‌لارینی(چاتدیق‌لارینی) گئنل‌لشدیرمه‌یه چالیشیب‌لار. داها دوغروسو، بیرسیرا  قانون‌لار، اؤن‌گؤروش‌لر(فرضیه‌لر)، تئوری‌لر و... دونیالاشدیرماغا چالیشیرلار. البت بو کئچمیشدن ده وار ایدی.  

 

   سؤزو بئله ییغیشدیریم، کئچمیشده‌کی علامه‌لرین گؤره‌وی، مرکزلرین بوینونا دوشور. اوردا هرکس بیر بیلگی‌ده اوزمان اولوب، باشقا بیلگی‌لرین تاپینتی‌لاریندان دا،‌خبری اولور. یئکون‌لاشدیرماق دا، مرکزی یؤنتن‌لرین بوینونا دوشور(مرکزی یؤنتن‌لر ده بیلگی‌آلان‌لارینین اوزمان‌لاری اولورلار. چاخناییش عئلمی، آنلاییش عئلمی، فراکتال، کومپلئکس سیستیم‌لر، بئله بیر مرکزلرده یارانیب‌لار.

   دونن یولداش‌لارین بیریله دانیشیق، بو یازینین ندنی اولدو. هر یئرده بیرلری ایش‌لری یئریتمه‌یه اوره‌ک یاندیرارلار. ایش‌لر دایانماسین دئیه، هر یؤنو نظرده آلیب، آددیم آتارلار. بیرلری بیر ایشی باشلایان اولسالار، گؤزتله‌مک‌لری هر ندن چوخ اولار. بئله بیر دورومدا اولان‌لار، دوزن‌لرینی دوزدوک‌ده دوزن‌لری پوزولماسین دئیه، گؤزلرینی آچیب، دیش‌لرینی قیسارلار. 

  

   اینسان بیر ایشه باشلادیقدا، یولون نئجه اولدوغونو بیله‌بیلمز. آنجاق یولا دوشدوک‌ده سونونو اؤزونه گؤره دوشونه بیلر. اوستوندن زامان کئچدیکجه، داها آرتیق باشلادیغی ایشه باغلانار. اونا گؤره ده باغلاندیغی ایشی هر کسدن یاخشی تانیدیغینی دوشونه بیلر. اولاجاغی بئله اولمالی دیر. باشقالاری ایشه یاناشدیقدا، باغلی اولمادیق‌لاری اوچون فرقلی یاناشارلار. یاناشمالار چوخ سرت ده اولا بیلر. بیر چوخ‌لاری دا گرک‌سیز دوشونرلر. باشقالاری نه دوشونسه‌لر، دوشونه بیلرلر، ایشی باشلایان، آزمامالی دیر. یولونا داوام وئرمه‌لی‌دیر. 

  

   ایشی باشلایان‌لارلا ایش‌لری منیمسه‌ین‌لر اوره‌ک‌لری منیمسه‌دیک‌لری ایشه دویونر. منیمسه‌دیک‌لری ایشین ایره‌لی‌له‌مه‌سی اونلارین یاشاییش‌لارینین قازانج‌لاری ساییلا بیلیر. او قازانجی دیرلندیره بیلمه‌سه‌لر، یئنی‌دن دوزن قوروب، یئرلرینه دوشمک‌لری ایللر واقت آپارار. یاشاییشین سوره‌سی آز اولدوغو اوچون، یئنی‌دن دوزن قوروب، یئرینه سالماق ایمکانین آز اولدوغو چتین اولار.   

 اوخوماق‌دان، یازماقدان، بازاردان، اویناماقدان و ... آرا آچان‌لار، بیر داها قاییتماق اوچون، چوخ چابالامالی دیرلار. آرالار چوخالدیقجا، قاییت‌مالار چتین‌له‌شیر. هر کس دوزنی پوزولماسین دئیه، اؤزلرینی، ایش‌لرینی یییه‌لنمه‌لی‌دیرلر.

 

   اینسان توپلوم‌لاشدیغی چاغ‌لاردان، بیرئی‌لرین آرالاریندا آلیب-وئرمه‌لر اولوب. ایلک آلیب-وئرمه‌لر بیربیرلرینی قوروماغی اوچون اولسا دا، توپلوم‌لار بؤیودوک‌جه آلیب وئرمه‌لر پایاپای اولوب. بیر نسنه‌پای وئریلیب، قارشیلیغیندا باشقا نسنه پای آلینیب. کئچینه‌جک‌لر اؤده‌نیب‌لر. سونرالار پول یارانیب. بیر اؤلچو قویولوب. نسنه‌لر اؤلچو ایله دیرلندیریلیب‌لر. دیرلری قارشیلیغیندا اؤلچو اولان نسنه‌دن(سیککه؛ بیرینجی‌لری گوموش، قیزیل اولوب، سونرالار پاخیر و باشقالاری اولوب) وئریلیب. یاواش-یاواش السیز-آیاق‌سیزلار ایش تاپانمادیق‌دا، قارین‌لارینی دویورماق اوچون بیرلریندن بورج آلیب‌لار. بورج‌آلماغین یارانیش زامانی بیلمیرم. آمما بورج وئرن‌لرین، یاخشی گلیرلری اولدوق‌لاری اوچون، بورج آلیب-وئرمه‌نی یئرینه سالیب‌لار.   

  بورج‌ قاییت‌لی اولدوقدا، اؤده‌مه‌لر قاچیلماز اولوب‌لار. بورج آلان‌لار بورجدان قورتولماق اوچون، جان آتمالی اولوب‌لار، اؤده‌مه‌دیک‌ده ده، وارلاری وارسا الدن وئریب‌لر، اولمادیق‌دا دا آلاه بیلیر باش‌لارینا گلدیک‌لری. عؤمورلرینین سونونا دک، بورجلولوقدان قورتولانماییب‌لار. بورالاردا اونا دئییرلر؛ نوزول. نوزول آدامی توکندیرمک دئمک دیر. بورجو وئرنلرسه، بورجلاردان بورج سالدیریب‌لار. 

 

  آمما ایندیلیک‌ده، بیر چوخ‌لاری، وام آلیرلار. بیر جور بورج دیر. بیر آز اوزون سورور. اوزون دئدیک‌ده عؤموربویو سورور. بیری قورتولور باشقاسی. آلماسا دا بیر ایش گؤره بیلمیر. ایش‌گؤرمک دئدیک‌ده اوتوراجاق یئری تاپماق دیر. یوخسا ایش باشارسایدی، بورج وئرردی بورج آلمازدی.  

   

 من ده ایش گؤردویوم اوچون، بورج آلماق یئرینه بورج وئره‌رم. الیمده بیر قاییت اولمادیغینا گؤره، آلانمارام. آمما یاخشی‌سی بوردادیر، بیرلرینی اؤزومه بورجلو بیلیرم، اؤزومو باشقارینا بورجلو بیلمیرم!!!

   ایله‌تیشیم هر گون ایره‌لی‌له‌ییر. اینتئرنئت یاراناندان، ایله‌تیشیم داها توو گؤتوروب. هر یئری قاپاتسان بئله، بیر یول تاپیب، اینسان‌لارین حایاتینا گیریر. دونیانین یئنی پوللانان‌لارین ایچینده، اینتئرنئتدن پول‌لانان‌لار دا یئر آلیرلار. ایسته‌دیگین قونو ایسته‌دی‌یین یئرده یایا بیلیرسین. بو دا بو گونون بیزه پای وئردیگی دیر. بیر شئی‌لری ده الیمیزدن آلسا، یئرینی باشقالاری توتور. باشقالاری باشلاریمیزی ائله قاتیر کی، الدن وئردیک‌لریمیز اونون دیرناغینا چاتا بیلمز.  

 

  اینتئرنئت گلیشدیکده، یئنی اورتاملارین دا یارادیر. سوسیال پایلاشیم دوشرگه‌لری چوخلارینین ایلگی‌سی‌نی چکن دوشرگه‌دیرلر. نئچه ایل بوندان اؤنجه، اورکوت یادیما گلیردی. قاپاندی، یا قاپادیلدی بیلمیرم. اونون یئرینی فئیس‌بوک دوشرگه‌سی توتدو. آز زامان قول-بوداقلاندی. دونیانین بیر چوخ دیل‌لرینده ده پنجره‌لری آچیلیر.  

 

   هر کس اؤزونه قالیب، اؤزوندن نئجه بیلگی پایلاشسین. هئچ کیمه زورلا بیر شئی‌لری پایلاشدیرمیرلار. هر کسین قاپی‌سی دا هر زامان هر کیمین طرفیندن دؤیوله بیلیر. آنجاق یول وئریب-وئرمه‌مزلیک هر کسین اؤز  الینده دیر.   

 هر ندن ایلگینجی، سوروشولان سورولاردیرلار. هر کس ائله‌یه بیلیر ایسته‌دیگی سورونون هر کسدن سوروشسون. سورغولانان‌لار جاوابلاماق‌لاری اؤز ال‌لرینده دیر. ایسته‌دیک‌لرینی جاواب‌لاییب، ایسته‌دیک‌لریندن واز کئچه بیلیر. آمما سورغولار هر کسین ایلگی‌سی‌نی چکیر. بیردن گؤرورسن، بیر آیدا خئیلک قونوشدورولوب‌سان!!!!  

   یادیما گلندن بئله ایدی. باغیشلایین، یادیما گلندن یوخ، دوشونمه‌یی دوشونندن بئله ایدی. آخی اوشاقلیقدان یادیمدا قالانلار چوخ آز دیرلار. اوشاقلیق چاغ‌لاریندان(ایکی یاش‌لا دؤرد یاش آراسیندا) یادیمدا قالانلار وایه(وایه‌نی آنام‌گیل ائله بوجور خاطیرلاماغا ایشله‌دیرلر) کیمی قالیب‌لار. بیرلری شاها سویوش دئییردی، بیرلری شاهی سئویردی. بیر ده گول‌له‌لر یادیما گلیر، سسله‌نیب نئچه نفر دوشوردو. یئرلری ده تام اولاراق یادیمدا دئییل. آمما بیر اولایین یئری ده یادیمدا قالیب، او دا عمیمین توی گونو ایدی. داها دوغروسو عم‌قیزیمین گلین‌چیخان گونو ایدی. گلینین اؤرتویو گوللو آغ پارچایدی. یئری؛ ایندی خارابا قالمیش، ددم‌گیلین دده ائولری ایدی. منیم همه‌شه‌کی خوش خاطیرلادیغیم ائو.  

  او گون من آرالاردا فیرلانیردیم. یادیما گلیر چوخ یاخین ایدیم، گلینه. گلین آت اوستونده‌یدی یا یوخ، اوراسی یادیمدا قالماییب. آمما اوجادایدی. اوندان سونراکی خاطیرلادیق‌لاریم چوخ دا سئویندیریجی دئییل‌لر. هردن هردن، ائویمیزدن بیرلری اؤلوب گئدیردی. لاپ آجی‌سی ائله او گلین چیخان گلین‌باجیمین اؤلوم ایدی. هر کس آغلاییردی.   

   دئدیک‌لریم ایلک خاطیرلادیغیم، اولای‌لاری‌دیلار. وایه کیمی یادیمدا قالان اولایلار. اوندان سونرا سورعتله هر نه ده‌ییشیردی. گئدیب‌گلمه‌ین‌لر اولوردو. گئجه‌لر چیراق‌لار سؤندورمه‌یه کوچه‌لرده سسلنن کیمسه‌لرین سسی، دالیسیندان هارانی ووردولار. تکجه بیلدی‌ییم طیاره‌لر بومب سالیردیلار. لاپ کیچیک عمیم عسگرایدی. هرکس، نیـیاران ایدی. چوخلارین خبری گلیردی. آنالار اوغولسوز قالیردی.   

   عمیم گلنده،بیز کنده گئدیردیک. هر کس گؤروشه گلیردی. سونرالار بؤیودوکجه، عسگرلی‌یین نه‌قدر تهلیکه‌لی اولدوغونو باشا دوشوردوم. جنگ ایدی، جنگ‌ده گول‌له ایدی. هر یئری ووردولار، بیز ده شهردن کنده گئتمیشدیک. تئهراندان قاییدان‌لار دا وارایدی. تئهرانلی‌لار شهره گلیب، بیز ده کنده گئدیردیک.  

 بو آرادا بیز ده، داش-داش اوینویوردوق. داش‌لار دا هر دن ده‌ییب یارالاییردی. قیزلاری دا اؤزوموزه قاتیردیق. آمما اونلار قوناق-باجی اوینوردولار، بیزی ده اویناتمیردیلار. بیز ده گئدیب، ائوجیک‌لرینی ییخیردیق. اوخولدا دا داشلاشیردیق. هر یئردن داش یاغیردیق.  

 

  یاواش-یاواش دونیانی فرقلی گؤرمه‌یه باشلامیشدیق. خبرلر آجی خبرایدی‌لر. هر یئردن اؤلو خبری گلیردی. تویلاردا دا ساواشیردیلار. جنگ قورتولموشدو. اسیرلر قاییدیردیلار. هر کس اسیرلری گؤرمه‌یه گئدیردی. شوخلوق ده‌ییل 8 ایل خبرسیز قالان‌لار وار ایدی. بیز ده گؤرمه‌یه گئدیردیک. یاواش-یاواش خبرلرله ماراق‌لانیردیق. هر یئرده جنگ خبرایدی. خبرلرده شهریمیزله، کندیمیزی آختاریردیق. تاپانمیردیق. هردن قیش واقتی شهریمیزین آدی گلیردی. لاپ سویوخ شهر، سئوینیردیک، بیزیم شهریمیز یاددان چیخماییب، هئچ اولماسا سویوق اولدوغونو دیل‌لر ده دئییلیردی. سئوینیردیک. آمما سویوق کسیردی. چوخ گولنمیردیک.  

   

   جنگ سسی قووزانیردی. صدام گئنه دلیله‌میشدی. بو دؤنه کووئیتی آلمیشدی. آمریکا دا، صداما بومب تؤکوردو. قاچقین‌لار بیزیم شهره دولموشدولار. هر کس قاچیردی. بیر تای اونو بیر آرابایلا ده‌ییشیردیلر.  

 شوره‌وی داغیلیردی. آرازین اوتایینا گئده بیلردیک. نئچه ایللیک گیزلی قاپی‌لار آچیلیردی. آراز آییران ده‌ییل ایدی. قووشدوروردو. آمما جنگ سسی گلیردی. ائرمنی‌لر "قاراباغ‌"دا موسلمان‌ آذربایجانلی‌لاری قیریردیلار. نه قدر قولاق وئریردیک موسلمان‌لارین ظفریندن خبر یوخ ایدی. دئییردیلر قاچقین وار، آمما قاچقین بیزیم شهره گلمه‌میشدی. 

   

  سونرا چچن‌لی‌لر،  روسلارلا ساواشیردیلار. اؤزگورلویوک اوچون ساواشیردیلار. روسلار هر زامانکی قانسیز ایدیلار. آمما گئنه ده ظفر قازانان‌لار روسلار ایدی. تاریخین سون ایکی یوز ایلی ائله بئله اولوب. افغانیستان دا هر زامانکی‌ کیمی ساواش ایدی. پاکیستان‌لا هیند ده ائله، تورکیه‌ده ده ساواش وار ایدی. هر یئردن اؤلوم خبری گلیردی.  

  

  اؤلوم خبرینین آردی کسیلمه‌دی. داها چوخالدی، هر یئردن اؤلوم خبری گلیردی، بوسنودان، کوزوودان، عرب اؤلکه‌له‌رینین بوتونلویوندان، کئشمیردن، قیرقیزلاردان، اویغورلاردان، ایندونوزیادان، هر یئرده اؤلن‌لر بیزه یاخین ایدی.   

     داها خبرلردن وورولموشدوق، گونئی آذربایجاندان یئنه خبر یوخ ایدی.  

هر یئرین خبرلرینی بیرلری دئییردی. گئنه ایسته‌دی‌ییمیز خبرلری دئین یوخ ایدی. قاباقجا لاپ‌سویوق یئر اولماق خبرینی ائشیدیب سئوینن، ایندی اؤزونه گؤره خبرلری ائشیدنمیردی. 

 

   سئوینمک اوچون، آختاردیغیم آنلاری تاپانمیرام. بیر دامجی سئویندیرن آنلار، بیر چووال کدرلندیرن آنلارین ایچینده دیر. من ایسه کدردن دولو بیری. کدرلی گؤردوکده گؤزلریمی یوموب آنلاری آتلاییرام. سئویندیریجی آنلار دا آتلانیرلار!