یادیما گلندن بئله ایدی. باغیشلایین، یادیما گلندن یوخ، دوشونمهیی دوشونندن بئله ایدی. آخی اوشاقلیقدان یادیمدا قالانلار چوخ آز دیرلار. اوشاقلیق چاغلاریندان(ایکی یاشلا دؤرد یاش آراسیندا) یادیمدا قالانلار وایه(وایهنی آنامگیل ائله بوجور خاطیرلاماغا ایشلهدیرلر) کیمی قالیبلار. بیرلری شاها سویوش دئییردی، بیرلری شاهی سئویردی. بیر ده گوللهلر یادیما گلیر، سسلهنیب نئچه نفر دوشوردو. یئرلری ده تام اولاراق یادیمدا دئییل. آمما بیر اولایین یئری ده یادیمدا قالیب، او دا عمیمین توی گونو ایدی. داها دوغروسو عمقیزیمین گلینچیخان گونو ایدی. گلینین اؤرتویو گوللو آغ پارچایدی. یئری؛ ایندی خارابا قالمیش، ددمگیلین دده ائولری ایدی. منیم همهشهکی خوش خاطیرلادیغیم ائو.
او گون من آرالاردا فیرلانیردیم. یادیما گلیر چوخ یاخین ایدیم، گلینه. گلین آت اوستوندهیدی یا یوخ، اوراسی یادیمدا قالماییب. آمما اوجادایدی. اوندان سونراکی خاطیرلادیقلاریم چوخ دا سئویندیریجی دئییللر. هردن هردن، ائویمیزدن بیرلری اؤلوب گئدیردی. لاپ آجیسی ائله او گلین چیخان گلینباجیمین اؤلوم ایدی. هر کس آغلاییردی.
دئدیکلریم ایلک خاطیرلادیغیم، اولایلاریدیلار. وایه کیمی یادیمدا قالان اولایلار. اوندان سونرا سورعتله هر نه دهییشیردی. گئدیبگلمهینلر اولوردو. گئجهلر چیراقلار سؤندورمهیه کوچهلرده سسلنن کیمسهلرین سسی، دالیسیندان هارانی ووردولار. تکجه بیلدیییم طیارهلر بومب سالیردیلار. لاپ کیچیک عمیم عسگرایدی. هرکس، نیـیاران ایدی. چوخلارین خبری گلیردی. آنالار اوغولسوز قالیردی.
عمیم گلنده،بیز کنده گئدیردیک. هر کس گؤروشه گلیردی. سونرالار بؤیودوکجه، عسگرلییین نهقدر تهلیکهلی اولدوغونو باشا دوشوردوم. جنگ ایدی، جنگده گولله ایدی. هر یئری ووردولار، بیز ده شهردن کنده گئتمیشدیک. تئهراندان قاییدانلار دا وارایدی. تئهرانلیلار شهره گلیب، بیز ده کنده گئدیردیک.
بو آرادا بیز ده، داش-داش اوینویوردوق. داشلار دا هر دن دهییب یارالاییردی. قیزلاری دا اؤزوموزه قاتیردیق. آمما اونلار قوناق-باجی اوینوردولار، بیزی ده اویناتمیردیلار. بیز ده گئدیب، ائوجیکلرینی ییخیردیق. اوخولدا دا داشلاشیردیق. هر یئردن داش یاغیردیق.
یاواش-یاواش دونیانی فرقلی گؤرمهیه باشلامیشدیق. خبرلر آجی خبرایدیلر. هر یئردن اؤلو خبری گلیردی. تویلاردا دا ساواشیردیلار. جنگ قورتولموشدو. اسیرلر قاییدیردیلار. هر کس اسیرلری گؤرمهیه گئدیردی. شوخلوق دهییل 8 ایل خبرسیز قالانلار وار ایدی. بیز ده گؤرمهیه گئدیردیک. یاواش-یاواش خبرلرله ماراقلانیردیق. هر یئرده جنگ خبرایدی. خبرلرده شهریمیزله، کندیمیزی آختاریردیق. تاپانمیردیق. هردن قیش واقتی شهریمیزین آدی گلیردی. لاپ سویوخ شهر، سئوینیردیک، بیزیم شهریمیز یاددان چیخماییب، هئچ اولماسا سویوق اولدوغونو دیللر ده دئییلیردی. سئوینیردیک. آمما سویوق کسیردی. چوخ گولنمیردیک.
جنگ سسی قووزانیردی. صدام گئنه دلیلهمیشدی. بو دؤنه کووئیتی آلمیشدی. آمریکا دا، صداما بومب تؤکوردو. قاچقینلار بیزیم شهره دولموشدولار. هر کس قاچیردی. بیر تای اونو بیر آرابایلا دهییشیردیلر.
شورهوی داغیلیردی. آرازین اوتایینا گئده بیلردیک. نئچه ایللیک گیزلی قاپیلار آچیلیردی. آراز آییران دهییل ایدی. قووشدوروردو. آمما جنگ سسی گلیردی. ائرمنیلر "قاراباغ"دا موسلمان آذربایجانلیلاری قیریردیلار. نه قدر قولاق وئریردیک موسلمانلارین ظفریندن خبر یوخ ایدی. دئییردیلر قاچقین وار، آمما قاچقین بیزیم شهره گلمهمیشدی.
سونرا چچنلیلر، روسلارلا ساواشیردیلار. اؤزگورلویوک اوچون ساواشیردیلار. روسلار هر زامانکی قانسیز ایدیلار. آمما گئنه ده ظفر قازانانلار روسلار ایدی. تاریخین سون ایکی یوز ایلی ائله بئله اولوب. افغانیستان دا هر زامانکی کیمی ساواش ایدی. پاکیستانلا هیند ده ائله، تورکیهده ده ساواش وار ایدی. هر یئردن اؤلوم خبری گلیردی.
اؤلوم خبرینین آردی کسیلمهدی. داها چوخالدی، هر یئردن اؤلوم خبری گلیردی، بوسنودان، کوزوودان، عرب اؤلکهلهرینین بوتونلویوندان، کئشمیردن، قیرقیزلاردان، اویغورلاردان، ایندونوزیادان، هر یئرده اؤلنلر بیزه یاخین ایدی.
داها خبرلردن وورولموشدوق، گونئی آذربایجاندان یئنه خبر یوخ ایدی.
هر یئرین خبرلرینی بیرلری دئییردی. گئنه ایستهدیییمیز خبرلری دئین یوخ ایدی. قاباقجا لاپسویوق یئر اولماق خبرینی ائشیدیب سئوینن، ایندی اؤزونه گؤره خبرلری ائشیدنمیردی.
سئوینمک اوچون، آختاردیغیم آنلاری تاپانمیرام. بیر دامجی سئویندیرن آنلار، بیر چووال کدرلندیرن آنلارین ایچینده دیر. من ایسه کدردن دولو بیری. کدرلی گؤردوکده گؤزلریمی یوموب آنلاری آتلاییرام. سئویندیریجی آنلار دا آتلانیرلار!
تیراختورا یازماق، اویونلاریندا اولوب، تیتیزلیکله الشدیرنلرین بوینونا دیر. بئلنچی یازانلار دا بولون-سولون وار دیر. بیزلر ده تیراختورا ماراقلانانلاریق. قول ووراندا، یئریمیزدن آتلانیریق. بو یازینی آنایوردوم دوشرگهسینده یازیلان یازی یازدیتدیردی.
یادیما گلیر، 1373-74 -جی ایللرده تیراختورون اویونلارینا گئدردیم. او زامان تیراختوردا آذربایجانلی اویونچو چوخ ایدی. داها دوغروسو من تورک اویونچودان باشقا اویونچو گؤرنمزدیم. قاپیچیدان توتوب، گول وورانلارا دک. اوندا تیراختورون یانداشلاری اولسایدی دا، بو قدر یوخ ایدی. تهرانین تانینمیش تیملری تبریزه گلنده، ا یانداشلاری تبریزده یاری-یاری یئرلری دولدوراردیلار. او زامان تیراختورون اویونچولارینی تهرانین قیرمیزی، گؤی تیملری آلیب، کورلاردیلار. آذربایجانی منیمسهدن، تیراختورلا ماشین یوخ، بلکه تورک اویونچولاری اولاردیلار. اؤزلرینه پول قازانیب آذربایجانی منیمسهیدیلر. بیز ده اونلارین نئجه اولدوغونو ایزلردیک!!!
8 ایللیک سورهسینده، آذربایجانین مرکزیندن فوتبالین بیرینجی سیراسیندا بیر تیمین اولماماسی، یئنیدن آذربایجاندان بیرینجی سیرایا یئرلشدییینده، هر نه دهییشیلمیشدی. آذربایجان کؤکنلی اویونچولاردان خبر یوخ ایدی. بولاغینی قوروتموشدولار.
آمما یانداشلار بوتونلوکله وارایدیلار. تیراختور آذربایجانی منیمسهدیردی. اویونچولار آذربایجانا اویناسایدیلار، آلقیشلانا بیلینردیلر. آذربایجان اوچون توپ ووران هر کس آلقیشلانیردی. آذربایجانلی اولان، باشقالارینا توپ وورانلار ایسه، ترسه داوراندیقدا هویلانیردیلار.
تیراختور بؤیودو، آذربایجان اونون بؤیوتدو. تیراختوردا اولانلار دا بؤیودولر. شوخلوق دَییلدی، هر اویون، اورتالاما اللی مین نفره یاخین تیراختورا ال چالیردی. اودوب، اودوزماغین دا فرقی یوخ ایدی. فوتبالدا بؤیومک ایستهینلر تیراختورا گلمهلی اولدولار. بؤیومک ایستهینلر آذربایجانا یاپیشمالی اولدولار. کیم گلدی، کیم گئتدی فرق ائلهمهدی. تیراختور آذربایجان اوچون قالدی.
اویونچولار دهییشیلدی، دولاندیرانلار دهییشیلدی. بیلیت وئرمهلر دهییشیلدی. تاماشاچی دهییشیلمهدی. تیراختور دهییشیلمهدی.
هرکیم تیراختورلا باغلیییر باغلاسین، باغلامیر باغلاماسین. تیراختورون آیاق اوسته قالماغینا، تکجه آذرباجانین آنلاشماسی یئترلی دیر. آذربایجان تیراختورلا آنلاشماسینی داواملاندیراجاق، بو اوزدن بؤیوک قالان ایستهینلر تیراختوردا قالیب، یا دا قوشولمالیدیرلار.
آداملارین فرقلییینی بیری دئمهمیشدن ده هر کس بیلیر. بیری قانسیز، بیری یامان، بیری قوزو، بیری قویون، بیری فیرووون، بیری قاناجاقلی، بیری قانمایان، بیری کیشی(گئنل اولاراق سؤزونو توتان کیمسهلر دئییلیر؛ قادینلار دهیمهسین!)، بیری قورخاق، بیری یاخشی، بیری ها بئله توت گئت!
بو چئشیتلیلیکده آداملارین ایچینده، اؤز چیخارلارینی دوشونن آداملار، هر زامان اوغورلو اولدوقلاری بیلیندیریلیب. داها دوغروسو دونیانی سئل آلیب گئدن زامان، گمی دولاندیریب، پول آلانلار هر کسدن باشاریلی گؤرسهدیلیب(بونو دا گئنل اولاراق دئییرم، هر کس پولو، گوجوله اؤلچولوب).
ائولرده اوشاقلارا بئله دئییلیر: باشیوی سال آشاغییا، دوز گئت-دوز گل. فیکریوی وئر درسیوه، هر کسه قوشولما، دوستبازلیقدان فایدا یوخ دیر. اوشاقلارین چوخو آتالاری، آنالاری دئدیکلری کیمی اولمازلار. باشلارینی قووزویوب، هر دن ده اویان-بویانا بویونلارین اوزالدیب باخارلار. توپلومون گیزلی بوجاقلارینی دا تانیماق ایسترلر. گیزلی یئرلردن، سوروشاندا، آتا آنالار اوشاقلارینی یوللاندیرماغی، گؤز-قولاقلی اولدوغونو وورغولویوب، آچیقلایارلار.
باشلارینی آشاغییا سالیب، گلیب-گئدنلر(یولدا دایانیب باخمایانلار)، توپلومون گیزلی بوجاقلاریندان خبرسیز قالدیقلاری اوچون، ال دهییلمهمیش قالارلار. آنجاق بؤیودوکلری چاغلار تک یاشاماق زوروندا اولاندا، گیزلی بوجاقلاری تانیمادیقلاری اوچون، هر یئرده دایاندیریلیب، بیر شئیلری وئرمک زوروندا اولارلار.
بئله آداملار دئیرلر آخی من کی هئچ کسله ایشیم یوخ دیر، باشیم آشاغی گلیب گئدیرم، بو ایشلر منی هاردان گلیب تاپیرلار. اونون جاوابی، هردن ده باشیوی قووزویوب یان-یؤورهوه باخمالیسان دیر. البت یادیمیزدا قالسین گؤزو آچیقلار دا تورا دوشه بیلرلر.
بو باخیشی بیر توپلوما یانسیتدیقدا، ایشلر داها بوروشوقلو اولار. هر بیر توپلوم اؤزونو وورسا گؤرمهمزلییه، اوندا او توپلومون اؤلوم واقتی یئتیریب، توپلوملوغون دهییشمهلی اولار.
هر گون، یئنی بیر باخیش دونیا اوزونه آچیلیر. یئنی باخیشلار بیلگیدن توتوب، توپلومسال داورانیشلارا دک اوزانیب. بیلگیدن اوزاق قالدیغیمیز اوچون، هر یاندان گلسه، گؤزیومولو هه دئییریک. بیلگیلر یاشامیمیزا یانسییان چاغلار، ائتگیلنمکلر باشلاییرلار.
چاغداشلاشماق، باتی آدلانان اؤلکهلردن آخیب گلدیـیی اوچون، چاغداشلاشانلاری باتی بویاییر. بو بویاقدان بیرلرینین خوشو گلیر، بیرلرینین آجیغی. آنجاق گوندملشمهیین سئلی بوتون وریانلاری آشیریر. بیردن گؤرورسن ایستهمهینلر بئله چاغداشلاشیبلار.
گؤرونن، چاغداشلاشماقدان قورتولاجاغیمیز یوخ دیر. باشقا یاندان چاغداشلاشماق بیزی باشقا بویاییر. هر اونایلدن اون ایله خئیلک، دهییشیریک. دئیینه-دئیینه گئییریک، یئییریک، بَزهنیب دوزهنیریک. آشیقلاری آتیب، توپلاری توتوروق. ابهلری دولدوروب، تورلاری قوروروق. قئیینجلری قویوب، کمرلری تاخیریق. سازلاری آسیب، تئلویزیونا باخیریق. تندیرلری دولدوروب، دویولری آسیریق.
چاغداشلاشماق اوزوندن اؤزگهلشمکدن قورتولماق اوچون، بلکه چاغداشلاشماغی منیمسهییب بویامیزین پایینی چوخالتمالیییق. یوخسا اؤزوموزو تانیمادیغیمیز گون یئتیشهبیلر.
بیر نفرین وارلیغینی نه دئمک دیر؟ وارلیق دئدیکده، بیر نفرین نهکیوارینی دئییرم!. سیز اؤزونوزه باخین، گؤرون نهلر وارینیز دیر. وارلیقلارینیزی سیرالایین. سیرالانماغین باشیندا، نهییز دوراجاق؟ او دا سیزین گؤروشونوزه باغلی دیر. وارلیقلاریزین ایچینده، باشقالاریلا اورتاق اولان وارلیقلارینیز دا واردیر، تک وارلیقلارینیز دا . تکجه سیزین اولان وارلیقلاری دئییرم(سیز بللندیرین). بیر سیرا وارلیقلار سیزه وئریلیب، بیر سیرالارینی دا اؤزونوز قازانیب.
وارلیقلارینیزی دهیرلندیردیکده، هانسی وارلیقلارینیزی اؤنملی دهیرلندیریرسیزمی؟ سیزه وئریلن وارلیقلاری یوخسا قازاندیغینیز وارلیقلاری؟ هانسی وارلیقلارا دئیه بیلرسیز بو منیم وارلیغیم دیر. سیزین اولان وارلیقلاری نئجه یئیهلهنه بیلرسیز؟ هر بیر وارلیغینیزی قورایا بیلرسیزمی؟ قوروماق دئدیکده، بو دونیادا اولان سورجده دئییرم. اؤلوب گئتدییینیزدهکیلرله ایشیم یوخ دیر.
وارلیق ساندیغینیزلارین نه قدری سیزه باغلی قالا بیلرلر. یانی سیزیله تعریفلنه بیلینیرلر. سیز واریزسا، وارلیقلارینیز دا وار، سیز یوخسیزسا وارلیقلارینیز یوخ دیر. وارلیغینیزدان پای آلماق ایستهسهلر هانسیلارینی پایلاشماق ایسترسیز. هانسیلارینی اؤزونوزه ساخلارسینیز.
باشقالارینی اؤز وارلیغینیز سایا بیلرسیزمی؟ اؤز وارلیغینیز سایدیغینیز کیمسهلری نئجه قورویا بیلرسیزمی؟ هاراجان قورویا بیلرسیزمی؟ سیزین قوروماغینیز، قورونان کیمسهلرین وارلیقلارینی هدهلهیه بیلرمی یوخسا یوخ؟ قورودوغونوز کیمسهلر، قورودوغونوز قورونماغی ایستهمهسهلر نئجه؟ نه زامان باشقالاری سیزین وارلیغینیزدان چیخا بیلرلر؟
باشقالارینی وارلیغینیز سایدیقدا، سیز باشقالارینا وارلیق اولا بیلرسیزمی؟ سیزی قوروماق ایستهسهلر قورونارسیزمی؟ قورونماقلار سیزی سیخسا، قورویانلارلا نئجه داورانارسیز. اؤزونوز بوتون وارلیق اولماق اوچون باشقالارین وارلیقلاریندا قورتولمالیسینیز یوخسا قالمالیسینیز؟
سون سورغو، وارلیق آدلاندیردیقلارینیز، نه زامان وارلیق دیرلار، نه زامان وارلیق دهگیللر؟