داش قاپی

داش قاپی

دوشوندوک‌لریمین پارچالارینی هردن ایسته‌دیـییم کیمی یازیرام
داش قاپی

داش قاپی

دوشوندوک‌لریمین پارچالارینی هردن ایسته‌دیـییم کیمی یازیرام

دیلی یانمیش یازیلیر

     زنگین دوشرگه‌سینده، دیلی یانمیش باشلیغی‌لا بیر یازی یازیلیب‌دیر. بو یازیدا اؤزلرینی آذربایجانچی تانیتدیریب آغساققالیق ائله‌ین‌لرین بیر سیراسیندان بیر گیلئی‌لی‌لیک گئدیب. گیلئی‌لی‌لیک اونلارین ائولرینده اوشاق‌لاری‌لا تورکو دانیشمادیق‌لاری دیر. بو گیلئی‌لی‌لیک اولدوقجا دوز گیلئی‌لیک دیر.  اینسان‌لار، توتدوق‌لاری گؤروشه اینانمالی‌دیرلار. بیر گؤروشون تمثیلچی‌سینه چئوریلن اینسان، هئچ اولماسا اؤز چئوره‌لرینه ائتگی‌لی اولمالی‌دیر. چئوره‌لره ائتگی، یاخین چئوره‌لردن باشلاییب اوزاق‌لارا دک اوزانمالی‌دیر. یاخین چئوره‌لرین ایچینده، اؤزو قوردوغو چئوره، بو اینانجی یاشامالی‌دیر. اولا بیلسین بیرلری بیر ائوده دوروملاریندان آسیلی اولاراق قارداش-باجی‌لارینا او قدر ائتگی‌سی اولمایا. آنجاق قوردوغو ائولی‌لیک‌ده بئله بیر دورومو یاشاتمالی‌دیر. اوشاق‌لار بؤیودوک‌ده، فرقلی اولدوق‌لاری باشقا بیر سؤز دیر.  

 

  تورک دیلی، آذربایجان کیملی‌یینین تملی ساییلیر. بیز بو دیلی آذربایجانلی‌لاردان آلساق، آذربایجانلی‌لیق‌دان قالان باشقا اؤزل‌لیک‌لر اونو آذربایجانلی تانیماغا یئترلی اولماز. تورک دیلینی یادیرقایان آذربایجانلی، بو دیلده اوخونان ماهنی‌لار، یاشانان دب‌لر، شه‌بئه‌لر، اوخشاما‌لار، بایاتی‌لار‌لا ایلگی قورا بیلمز. بیر کیملیک‌له ایلگی قورا بیلمه‌ییب او کیملی‌یه منسوب اولان اینسان‌لار، اؤزلرینی او کیملیـیینی یییه‌سی تانیتدیرماق‌دا چوخ زورلانمالی‌دیرلار.  

 

  دوزدور تورک دیلینین یاشانماغیندا، دانیشیق چوخ ائتگی‌لی اولوب‌دور. آنجاق بوگونکو دونیادا و بو هجمه‌لرین قارشی‌سیندا، تورک دیلینین گلیشمه‌سی بو دیلی یازیب-پوزوب، یئنی‌دن تانیماق‌لا اولاجاقدیر. بیز دیلیمیزین رسمی اولماغینی دوشونوروک‌سه، ایلک اؤزوموزدن باشلامالی‌ییق. اؤزموز رسمی‌لشدیرمه‌لی‌ییک. بیر چوخ واقت‌لار، تکجه آذربایجانی خیطاب ائله‌ین یازیلارین دیلی، فارسجا اولور. تورکجه اولان یازیلارین دا بیر چوخو ایستانبول تورکجه‌سینین آغیزیلا اولور. بئله بیر یاناشمالارین ندنی هر نه اولور اولسون، بیر شئی‌یی گؤرسه‌دیر. بیز هله دئدیـییمیز سؤزه اینانمامیشیق! اینانساق دا ایچه‌ریله‌شدیرمه‌میشیک. اوخشاتمالاریمیز داوام‌لانیر!!! 

نظرات 1 + ارسال نظر
جواد پنج‌شنبه 3 آذر‌ماه سال 1390 ساعت 07:24 ب.ظ http://www.insanoglu.blogfa.com

سلاملار. یازیلارینیزا گؤره چوخ تشکورلر.
آنجاق یازیدا گلن اوچونجو سورونو هیچ آما هیچ قبول ائتمیرم. تانم ترسینه منجه تورک لر یئریندن – یوردوندان آسیلی اولمایاراق ، دونیانین هر بیر گوشه سینده یاشاییر لارسا یاشاسین لار ، آما تورکجه یه گلدیگینده بیر اورتاق دیلده یازیب اوخومالیدیرلار. – عینی عربلر کیمی – البته بو ایشه اولاشماق چوخ دا ساده و قولای دئییل . بیر قدر زحمت چکیلمه لیدیر آما سوندوندا زحمتینه دگر !
بو گون بیر تورک اگر تورکدورسه و اگر تورک اولماغینا گؤونیرسه استانبول تورکجه سی آدلاندیردیغیمیز تورکجه نی تام مکمل بیلمه لیدیر. چونکو اورادا قوللانیلان تورکجه منیم بوردادا قوللاندیغیم تورکجه نین گلیشمیشی و ایرلی لشمیشیدیر ! من بؤیله دوشونورم !
بو ایشه آسیمیلاسیون دئمک منجه دوغرو دئییل. نه زامانا قدر بیز تورک لر بیر بیریمیزدن آیری قالمالی ییق ! اورتاق دیلین فایداسی گرچکدن سایماغا گلمز ! و سؤزسوز کی اورتاق دیل دئدیگیمیز زامان تورکیه تورکجه سی گؤز اؤنونه گلیر !
سون سؤزوم : منجه بوندان سونرا « ایستانبول تورکجه سی » یئرینه « اورتاق تورکجه » کلیمه سینی ایشلتمک یئرینه دوشر .

سایغیلاریملا / جواد – زنجان دان

سالام جاواد بی،
ساغ اولون دیققتینیز اوچون. بیز اؤزوموز اؤزوموزو موستقیل بیر کیملیک‌کیمی تانیت‌دیرمادان باشقالارینین اورتاق‌لیغینا قاتیلا بیلمه‌ریک. ایستانبول تورکجه دئدیـییمیز، ایستانبول آغیزینی مئعیار گؤتوردوک‌لری اوچون دیر. یوخسا تورکیه‌نین اؤزونده دوغو بؤلگه‌‌ایله آنادولونون دا آغیزلاری اورتاق گؤتوروله بیلردی. آمما اورا تورکیه‌دیر، تورکیه‌نین ده اؤزونه یاخشی یییه‌سی واردیر. بو کی دیلین اوستونده ایشله‌ییب‌لر، بیر چوخ سؤزجوک‌لری اوره‌دیب‌لر، دونیادا اولان دیلچی‌لی‌یین اوزه‌رینده ایشله‌ییب‌لر، سایی چوخ اولوب من بیلمه‌ین قدر تئز یازیب‌لار، رومان‌لار، اؤیکو‌لر، قیسا ناغیل‌لار یازیب‌لار، اونلارین هامیسی دانیلماز دیرلار. ایستانبول آغیزینی دا بو اوزدن بیلمه‌لی‌یم، هم ده یاخشی بیلمه‌لی‌یم. اونلارین هامیسیندان فایدالانماغی دا دوشونورم. بوردا دئییلن سؤز، اؤزوموزون اؤزل‌لیـییمیزی قوروماق دیر. بیزیم اؤزل‌لیـییمیزی داشی‌یان‌لاردان ان اؤنملی‌سی بوردا یارانان دیل دیر. دیلیمیزی تانیـیا بیلسک، چوخلو وارلیق‌لاریمیزا ال تاپا بیله‌جه‌ییک. بو وارلیق‌لار تکجه بیزیم یوخ بلکه تورک دونیاسینین دیرلار. آنجاق تورکیه‌ده بو وارلیق‌لارین بیر چوخو عوثمانلی ایمپیراتورلوق دوورونده یادیرقانیلیب دیر. بیر ده تورکیه بؤلگه‌ده بیر گوجلو دوولت اولاراق اؤز چیخارلارینی دوشونور. گؤردوک‌لری ایش ده دوز دور. آنجاق بیزه گلدیک‌ده اؤزوموزه اؤزل چیخارلاریمیز(منافئع) واردیر. بیز بو چیخارلاریمیزا اوداق‌لانمالی‌ییق. سیز آسیمیلاسیونو اولا بیلر، تورکیه‌لی‌لشمه گؤرمویه‌سیز، آنجاق دیققت‌لی باخساق آسیمیلاسیون اولدوغو دانیلماز دیر. دئمیریک باشقالارینی ایسته‌مه‌یک، سؤزوموز بو دور هئچ اولماسا اؤزومووزو اؤزوموز کیمی باشقالارینا اوخشاتمادان دوشونه بیلک.
سایغیلاریملار

برای نمایش آواتار خود در این وبلاگ در سایت Gravatar.com ثبت نام کنید. (راهنما)
ایمیل شما بعد از ثبت نمایش داده نخواهد شد