داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
حایات ایسته‌ییمیز اولمادان باشلار-بیتر
هئچ کیم، اؤز گؤیلونا حایاتا آیاق قویمویوب. هرکس باشقالارینین ایسته‌ایله دوغولوب. حایاتدا اولان‌لار ایسه، اؤز ایسته‌دیک‌لری‌ایله حایاتدان آیریلماق ایسته‌میرلر. بو آیریلیق ایسته‌مه‌دن اولور. اینسان‌لارین هاردا دوغولدوق‌لاریندان آسیلی اولاراق، یاشام طرزلری اولور. توپلوم، قات، یئر، آغ-قارالیق، جینسل‌لیک، بویون اوجالیغی، پای وئریلیر.
اینسانا قالان، نئجه یاشماق دیر. نئجه یاشاماق ایسه، دوروموندان آسیلی اولور. هر نه دورومدا اولور اولسون، یئنه، بیر بالاجا نئجه یاشاماق سئچیمی اونا قالیر. یاشاماغی سئچدی‌یی سورج عؤمروندن سوووشور. عؤمرونون بیر قیسمی‌نی، حالسیز‌لیق‌لا اوغراشان‌لارا، یاشام طرزی سئچیمی قالمیر. ایسته‌مه‌دیـیی واقت، یاشام طرزینین سئچیمی سونوج‌لانمادان حایات بیتیر. گئری‌یه قالان سئچیمی اولمایان بیرلرینین خاطیره‌لری قالیر دئمک ایستیردیم کی قالمیر. تکجه سئچیم‌لری‌نی بللندیرن‌لرین خاطیره‌لری قالیر. دوغولماق‌لاری‌لا اؤلمک‌لرینی بللندیرن‌مه‌سه‌لر ده، نئجه یاشادیق‌لارینی بللندیریرلر، نئچه ایل یاشادیق‌لارینا باخمایاراق!
دونیا ده‌ییشیر، بؤلگه ده‌ییشیر،
بؤلگه‌ده اولان سون بیر ایلین اولای‌لاری، بو بؤلگه‌نین ده‌ییشمه‌سیندن خبر وئریر. بؤلگه‌ده اولان ده‌ییشیم، بؤلگه خالق‌لاریندان قایناق‌لانیر، یوخسا باشقا بیر یئردن یؤنه‌دیلیرینه کسین قرار وئرمک اولمور. گؤرونن، ده‌ییشمه‌لر، ده‌ییشیم‌لرین هامیسی دومینو کیمی بیر-بیرینه دویونله‌نیب. دومینویا توققا ووران، تونیس‌لی گنج ایدی یوخسا باشقالاری، گئنه ده بللی ده‌ییل. بو ده‌ییشیمه سئوینیب، سئوینمه‌دیـییمیزه ده سؤز اولمالی‌دیر. ده‌ییشمه‌لر، هاچان دوراجاغینا بیر واقت وئرمک اولمور. اولدو اولانی، بیز ایسه تاماشاچی‌ییق.
فیکر ائله‌میرم بؤلگه‌ده اولان میللت‌لرین هئچ بیری، بو ده‌ییشیمه قورغولاری اولا. قورغو قالسین قیراقدا، حاضیرلیق‌لاری بئله یوخدور. گله‌جه‌یه قورغوسو اولمایان خالق‌لارین، ده‌ییشمه‌یه قاتیلماق‌لاری ماراق‌لی‌دیر. آزادلیق ماراغی‌لا قاتیلمالار اؤز یئرینده، هر کسین اوره‌یینده آزاد یاشاماغا سئوگی اولار. بو ده‌ییشیم، هارا چاتاجاغی دا بیزه بللی اولمایاجاق. قودره‌تده اولان‌لاری هامیسی قودرت‌دن قیراغا قویولدوق‌لارینا دا شوبهه اولور. قودره‌ته باغلی اولان‌لارین ایچیندن اولان قودرته قارشی گلیب، ده‌ییشیمده یئنی‌دن قودره‌ته چاتان‌لار دا اولور.
بؤلگه‌ده اولان‌لار، دونیادا اولان اویون‌لارا قاتیلماغی بلکه دوشونه‌لر، آنجاق قاتیلماق‌لارینا یئر وئریلمیر. یئر وئریلن‌لرین اؤزلرینین دوروم‌لاری دا باشقالاریلا چوخ فرقلی گؤرونولمور. نظره گلیر، بؤلگه‌ده اولان اولایلارین سون دوراغی بؤلگه‌‌دن اولوب اویون‌لارا قاتیلان‌لارینکی دیر. البت بو آرادا، حاضیرلیق‌لاری اولان بیر خالق دا گؤزه چارپیر. اونلار؛ یوز ایله یاخین اویونچولوق‌لارینا دایاناراق، بؤلگه‌نین گله‌جه‌یینده اؤزلرینه بؤیوک بیر پای دوشونورلر. حاق‌لاری اولدوق‌لاریندان چوخ پای. البت بو پایی قازانماغا، دومینه‌یه توققا ووران‌لارین الی ایله آلماغی دوشونورلر. بؤلگه‌نی بو گونه سالان‌لار، بو پایی وئرمک‌دن ممنون گؤرونورلر. بو اوزدن، پای‌لارینی وئرمک اوچون، دونیانین، ها بئله بؤلگه‌نین بئیین‌لرین حاضیرلاییرلار!
اورتاق‌لیق‌لار
بئینیمه سیغیشمیر. خوشوموز گلن شئی‌لری، تکجه بیز یوخ، خوشوموز گلمه‌ین کیمسه‌لر ده منیمسه‌ییر. خوشوموز گله‌نه، باشقا یؤندن باخمالی اولوروق. هر نئجه باخیریق، خوشوموز گلیر. خوشوموز گلمه‌ین کیمسه‌لرین خوشو گلدیک‌لرینه شک‌لی باخیریق. اولا بیلسین اونلاری خوشو گلمه‌سین، بیزه یاخین‌لاشماق اوچون خوش‌لاری گلمه‌یی‌نی گؤرست‌سین‌لر. دئمک خوشوموز گلمه‌دیک‌لری‌ایله، اورتاق بیر گؤروشوموز واردیر. خوشوموز گلن‌لرین ائله بوراسیندان خوشوموز گلمیر. اونلار بیزلردن چوخ، منیمسه‌دیک‌لریمیزی، منیمسه‌ییرلر. منیمسه‌مک‌لری، سویودور بیزلری.
فرقلی باخدیق‌دا، دونیادا بیر چوخ‌لاریلا اورتاق‌لیق‌لاریمیز واردیر. بونلار اؤز الیمیزده ده‌ییل. "اورتاق‌لیق، یاخشی دیر، یوخسا پیس" بئینیمیزین سورونلو سوغوسونا چئوریلیر. هر بیر اورتاق‌لیق، خوشلانمالاری ده‌ییشدیریب، اوزاق‌لاشدیریب، یاخینلاشدیرا بیلر. اورتاق‌لیق‌لار، بئله هردن یاخین‌لاشمالارا ندن اولانمیرلار. اوزاق‌لاشماقدا یئنگیجه دوشن‌لر توولا اوزاق‌لاشیرلار. چاتیلماز یئرلره سوروک‌له‌نیرلر. اورتاق‌لیق‌لاریندان، اوزاقلاشمالار یارانیر. منیمسه‌مه‌لر بوداق‌لانیر. بیزیمکی، اونلارینکی اولور. اونلارینکی دا دئمک اولمور، آخی اونلارینکی اولان‌لار، بیزیمکی‌لردیرلر اصلینده، اونلار اوغورلویوب‌لار. اورتاقلیق‌لاریمیزدان آرینماغی دوشونوروک.
بیز-سیزلیک‌دن چیخیب، بیز-اونلارا یئتیرمه‌یی دوشونوروک. ائله ده اولور. اولونوجاق بیر شئی‌لردن قاچماق اولمور. اورتاق‌لیق‌لاری بیتدیریریک.
کند آرزیسی
کندین آدی گلنده، جانیما جان گلیر دئسم بلکه اینانمایاسیز. کند منیم اوچون ال چاتیلماز اولوب‌دور. بیلیرم، کندین ال چاتیلمازلیغی تکجه منه یوخ، منه تای بیر چوخ‌لارینا دیر. ال چاتیلماز دئدیک‌ده، کندده یاشاماغی دئییرم. یوخسا ایسته‌دیـییم هر بیر کنده گئدیب، بیر ائونه‌لیک، ایکی ائونه‌لیک، بیر گئجه‌لیک قالا بیلرم. آمما بیر کندلی کیمی کندی یاشایانمارام.
کند آرزیسی، هر زامان منی کنده یوللاندیریر. خویدایدیم، بیردن کندیمیزدن بیر داوارچی‌نین، اؤزونو دؤیوب، داوارلارینی آپارماق خبری گلدی. خبر منی کنده آپارماغا یئترلی ایدی. بیز کنده گئده‌لی، کند‌ده‌کی‌لر خویا گلمیشدی‌لر. کندین اؤزونده هر کس آییق‌ایدی. بیر خبر گؤزلویوردولر. کندیمیز داغین دوشونده اولدوغو اوچون، هر کس اؤز ائوینین قاباغیندا دوردوغوندا کنده گله‌نی گؤره بیلر. کنده گلن ده، کندلی‌لری گؤره بیلر. ایت‌لر ده بیر خبر گؤزلویوردولر.
هر یئره جار دوشموشدو. نئجه اولدوغو هله بللی ده‌ییلدی. هر کس بیر سؤز دئییردی. نئچه داوار گئتدی‌یی ده هله بللی ده‌ییلدی. هر کس چوبانین اؤلمه‌دیـییندن سئوینمیشدی. چوبانی دؤیندن سونرا ال-قولونو کندیرله باغلامیشدی‌لار. اؤزونو آچماقدا بؤیوک ایش گؤرموشدو. یوخسا چؤلده قالیب دونا بیلردی. خویون خسته‌خانالارینین بیرینده، دؤیوله‌‌نی درمان ائله‌ییردی‌لر. قارداش‌لاری ایلا ده‌ده‌سی ده ژاندارمالاری گزیردیلر. گؤزونون اوستو پاتلاییب، دیزی چاتلامیشدی. بئلی ده زه‌ده‌لنمیشدی. کندلی‌لرین قوجاسینین دا یادینا بئله بیر اولای یوخودو. کنده دانیشیلان بیر خبر چیخمیشدی. تاریخه چئوریلن بیر اولای اولا بیلردی.
دئدیک‌لره گؤره یایدا دا قورد سورویه باسیب، کندین اللی داوارینی آپارمیشدی. یان-یؤوره‌ده کندلی‌لر وارایدی‌لار. کند آرزیسی ائلی‌ین‌لری سؤیوردولر!
هونه‌رین دیلی واردیر
هونرین دیلی اولماز، سؤزونو چوخ ائشیت‌میشک. دیلی اولماز دئدیک‌ده، هونر هونر اولسا، هانسی دیلده یازیلدیغینا باخمایاراق، هر یئرده آلینار. بو سؤزون سؤزو یوخدور. بو سؤز هردن فرقلی بیر گؤروش‌لر اوچون دئییلیر. دئین‌لر‌ده هونرچی تانینان‌لار دا اولور. دئییلمک‌لره باخمایاراق، بیر اثرین دونیادا آلیندیغی اوچون، دونیا دیلی‌له یارانماسی گره‌کیر.
دونیا دیلی دئدیم، دونیا دیلی‌نی هر کس، مندن یاخشی تانی‌ییر. دونیا دیلی هامی‌نین دیلی اولدوغو اوچون، هر کسین دیلیندن بو دیلده پایی اولمالی‌دیر. چوخ‌لارینین پایی واردیر. بیرلرینین پایی چوخ، بیرلرینین‌کی آز، بیزه تای پایلاری اولمایان‌لار دا واردیر. پای‌سیزلارین، دیل‌لرینده یارانان هونر‌لرین یئرلی دیل‌لری(local) واردیر(هم یئرلی‌لر دئییرلر، هم باشقالاری). اونا گؤره ده دونیادا آلینمیر دئیه‌سن.
یئرلی‌نی بللندیرن‌لر چوخ‌دورلار. باشیندا دوران، یئرلی‌لرین اؤزلری دیر. اؤزلرینی یئرلی گؤروب، دونیایا سؤزلری اولمایان‌لار، دونیایا دانیشدیق‌لاری آن اؤزگه‌سی‌نی یاراتمالی اولورلار. اؤزگه‌سی‌نی یارادان‌لار یاراتدیق‌لارینی یاشامادیق‌لاری اوچون، اؤزگه‌لر کیمی یارادانمیرلار. یا دا، یئرلی‌لیک‌لرینی اؤزگه‌لرینه ده داشی‌ییرلار.
سؤزون قیساسی، دیلی اولمایان هونرین، تانیت‌دیریلمیش دیلی واردیر!