داش قاپی

داش قاپی

دوشوندوک‌لریمین پارچالارینی هردن ایسته‌دیـییم کیمی یازیرام
داش قاپی

داش قاپی

دوشوندوک‌لریمین پارچالارینی هردن ایسته‌دیـییم کیمی یازیرام

بایرام، اؤزو اؤزونو تیکرارلاییر

   "بایرام اوشاق‌لارینکی دیر" سؤزونو اوشاق اولدوغوموز واقت، گنج واقت‌لاریمیز، بؤیودویوموز آنلار ائشیدیب، ایشله‌دیریک. اوشاق‌لار اوچون یئنی‌له‌نیر، بؤیوک‌لر اوچون، یئر اوچون، اؤزونه یئنی‌له‌نیر دئیه بیلیریک. دب‌لری چوخ اوزاق‌لاردان بو گؤنه سوروک‌لویوب تؤکه‌نین تؤکوب، گؤتوره‌نین گؤتوروب، ساخلایانین ساخلاییب گتیرن، دوشونجه‌نین ده داشیما یوکونو بوینونا آلیب، دیله وئریب، دیلده ساخلاییب دیر. بو آرادا دون ده‌ییشمه‌لر، آنلاشیلمازلیق‌لار، یوزمالار اولوب دیر. بایرام‌ اؤزو دانیشیر، یاشیـییر، یاشادیر. بیزه قالان یاشاییب، یاشاتدیق‌لارینی اؤزوموزدن سونراکی‌لارا چاتدیرماق دیر. یاشادیق‌لاریمیزی چاتدیرماساق، یاشامادیق‌لاریمیزی چاتدیرمالی اولاجاییق. اؤنملی اولوب-اولمادیغینا کیمسه‌لر قرار وئره‌جک‌لر، آنجاق بیرلرینه دئمک زوروندا قالاندا ایلیم-ایلیم آختاراجاییق، تاپماییب، باشقالارینین یاراتدیق‌لارینی وئره‌جه‌ییک، یوخاری باشی اؤزوموزله‌شدیریب هئچ منیمسه‌مه‌دیـییمیز قوندارمالاری ساووناجاییق. 

 

  یادیرقاییب یادیرقامادیغیمیز، یاشاییب یاشامادیغیمیز دب‌لردن بیر نئچه‌سینی بیرلیک‌ده واراق‌لایاق: 

 

  بایرام آیی گیرندن، بایرام حاضیرلیق‌لاری باشلانار. ائله‌بیل بیر ایل یاشیـییریق بیر آیدا حاضیرلانیب بایرامی یاشاماق اوچون. ایلین باشقا زامان‌لاریندا موناسیبت‌لر اولور. آنجاق، ایلین باشلانیشی موناسیبت‌لرین بایرامی دیر. بو اوزدن بایرام کلمه‌سی‌نی تک ایشلت‌دیـییمیز واقت، هر کس ایل بایرام اولدوغونو دوشونر. سونرا باشقا بایرام‌لاری نظره گتیرر. بایرام آیی چرشمبه‌لری ایله تانینیر. چرشمبه‌لرین ایچینده آخیر چرشمبه هر چرشمبه‌دن چوخ سسله‌نیر، شادلانیر.   

 

بایرام آیی‌نین چرشمبه‌لرینی  بئله سیرالاییب‌لار:    

  • ایلک چرشمبه‌نی، سو چرشمبه‌سی آدلاندیریب‌لار. بو چرشمبه‌نی نمین ماحالیندا قره چرشمبه، یالانچی چرشمبه، چیلله قووان چرشمبه ده چاغیران‌لار اولوب.   

  • ایکینجی چرشمبه‌یه، اود چرشمبه دئییرلر. اونا کول چرشمبه ده دئیه‌ن‌لر واردیر.  

 

  • اوچونجو چرشمبه؛ یئل چرشمبه‌سی آدلانیب. اونا موشتولوق چرشمبه‌سی ده دئییرلر. میـیانانین کوله‌بوز ماحالیندا کوله چرشمبه ده دئییرلر. کوله‌بوزدا قادین‌لارین ساچلارینی کسدیره‌ر‌لر.   

  • دؤدونجو چرشمبه، آخیر چرشمبه، سون چرشمبه، تورپاق چرشمبه‌سی آدلانار. بو چرشمبه‌‌ده گؤرولن ایش‌لر بونلاردیرلار،: سحر باشی قیزلارین سو باشینا(بولاق، چای، گؤل..) گئدیب سویو قئچی‌له‌مک، سودان آتیلیب، آرزی‌لاماری،  کیشی‌لرین، اوغلان‌لارین سحر باشی بازارا گئدیب، قادین‌لارا، قیزلارا چرشمبه‌لیک آلمالاری، آخشام اوستو تونقال قالاییب، اود یاندیریب، اوستوندن آتیلماق، شام‌دان سونرا اوشاق‌لارین داملاردان، پئنجه‌ره‌لردن شال(قورشاق) سال‌لامارلاری، گلین‌له‌ره پای آپاریلما. عجب شئرین شاوان کندینده پؤلکه یاندیریب، یئله وئرمه‌لری اولور. نظره گلیر ایندی‌لیک‌ده آخیر چرشمبه‌، دؤرد چرشمبه‌نین یوکونو داشی‌ییر.  

        چرشمبه‌نی سووشدوراندان سونرا، بایراما حاضیرلیق‌لار بیتؤو‌له‌شر. برکت‌لر سوفراسی سالینار. چالیشینار برکت‌لرین یئتدی‌سیندن سوفرایا قویولا. سوفرادا هر نه قیرمیزی‌یا چالار. قیرمیزی بایرام رنگی دیر. قان رنگی، جان رنگی دیر.  

      

    برکت‌لردن یئتدیسی بونلاردیر: 

  1.    تورپاق برکتی: قووورقا، بوغدا، تورپاق  
  2.     سو برکتی: بالیق، سو 
  3.    آغاج برکتی: آلما، ایده، جه‌ویز...  
  4.     معنوی گؤی برکتی: قوران، آینا، ایشیق 
  5.     آل­-وئر برکتی: پول، سیککه 
  6.     حئیوان برکتی: یومورتا 
  7. گؤیه‌رمه­ برکتی: گؤی بئجرتمک  

      ائلین اؤلوب-گئدن‌لری ده بایرامدان پایلارینی آلارلار. ایلین آخیر جوما آخشامی، یاددا قالان گئدن‌لری خاطیرلاماق اوچون، قبیر اوست‌لرینه گئدیلیب، فاتیحه اوخونوب، خاطیرلانارلار. بایرامین اول گونو اؤلولری اولان‌لار گئدیلیب باش ساغلیغی وئریرلر. قارا بایرام‌لاری چیخمایان‌‌لارا قارا بایرام توتورلار. هر کس ته‌زه پالتارین گئییب، قوناق‌لیغا گئدر.  

       اوشاق‌لار بایرام‌لیق‌لارین بؤیوک‌لردن آلارلار.  

نظرات 0 + ارسال نظر
برای نمایش آواتار خود در این وبلاگ در سایت Gravatar.com ثبت نام کنید. (راهنما)
ایمیل شما بعد از ثبت نمایش داده نخواهد شد