تورکو رسمی دیل

        "تورکو" رسمی دیل دیر. رسمی دیل اولما ندن‌لریندن بیر نئچه‌سینه بیرلیک‌ده باخاق. 

•  بیرینجی ندن، دیری دیل اولدوغو اوچون دیر. بو دیل بیر چوخ اینسانین یاشام دیلی‌دیر. اولا بیلسین بیرلرینین چؤرک قازانما دیل‌لری فرقلی اولا، آنجاق اؤزلری اولدوق‌دا، تکجه بو دیل‌له یاشاییرلار. البت بیر چوخ‌لارینین دا چؤرک قازانما، یاشاما، گولوش، سئوگی، آغی، اوخشاما، موسیقی... دیلی دیر. داها دوغروسو بو دونیالیق دیل‌لری دیر. هر بیر دیری دیلین رسمی اولما حاققی واردیر. 
•   ایکینجی ندن، دیلین اؤزونه قاییدیر. تورکو؛ تاریخی، کولتورو، دونیا گؤروشو، آیین‌دوشونجه‌نی، یاشام طرزی، هاوالاری، دب‌لری اؤزونده داشی‌ییر. "تورکو"-نون وارلیغی؛ بیر چوخ دب‌لرین، دوشونجه‌لرین، دئییم‌لرین، دونیا گؤروش‌لرینین قانیتی دیر. بو دیلی بیلمه‌ین‌لر هر بیر سؤزجویه، ائله بئله‌سینه یارانیب‌دیر دئمک زوروندا اولاجاق‌لار. یوروم آختاریب، بیلمه‌دن یالنیش یوزاجاق‌لار.  
• اوچونجو ندن، تورکو مین‌ایل‌لر بویو یاتاغی اولدوغو یئرلرین حاکیم دیلی اولدوغو دیر. ائله بو اوزدن یئنی دوولت‌چیلیک یارانمادان اؤزونو رسمی‌لشدیریب‌دیر. "تورکو" بؤلگه‌نین  اؤزونه اؤزل فلسفه‌سی‌نی داشی‌ییر. بو فلسفه، باشقا دیل‌لرده ده یارانسا بئله، قایناغی بو دیل دیر.  
• دؤردونجوسو؛ بؤلگه‌ده اولان تمدون‌لرین میراث‌داری اولماغی دیر. کئچمیش‌ده‌کی تمدون‌لرین آچاری ساییلر. یوزولمادان یورولور. کئچمیش تمدون‌لرین هوزواریش‌سیز آیکونو دیر.  
• بئشینجی ندن؛ پولچوک‌لنمه‌دن، یاشامین آخاریندا اولوشان دیل اولدوغو دیر. بو دیل دیلچی‌لر، ادبیات‌چی‌لار، سیاست‌چی‌لر، تاریخچی‌لرین یاراتدیق‌لاری دیل ده‌ییل. بو دیل فلسفه‌‌سی‌نی دوغال یاشامیندا تاپیب. تاریخچی‌لر، دیلچی‌لر، سیاست‌چی‌لر تکجه یولوندان جایدیرماغا چالیشیب‌لار. قیرامئرچی‌لر دستور وئرمه‌دن دیل قیرامئرین یارادیب.  
• آلتینجی ندن؛ تکجه اؤزونو یوخ، باشقا دیل‌لری ده بسله‌ییب بؤیودن بیر دیل اولوب دیر. حاکیم دیل اولدوغو واقت‌لار، تورکونون یانیندا باشقا دیل‌لر قول-بوداق آتیب بؤیویوب‌لر. فارس دیلی، عرب دیلی، باشقا قونشو دیل‌لر بو دیلدن قیدالانیب‌لار. داها دوغروسو پاخیل دیل اولمویوب. ترسینه ال آچیق دیل اولوب‌دیر.  
• یئتدینجی‌سی، یول اوستونده اولان یئرده اولماغینا باخمایاراق، یوز ایلدن آرتیق قاداغان اولدوغونا باخمایاراق، هله ده وار سؤز داغارجیغی توکنمه‌ییب، قورولوشو پوزولمویوب.   

         ایسته‌سم، ایسته‌سک ندن‌لری آرتیرا بیلریک. آماجیمیز ندن سایماق ده‌ییل، تورکونون اؤنمین وورغولاماق دیر. وورغولاماغین ایلک مقصدی اؤزوم، اؤزوموز، بو دیلی بیلن هر کس دیر.