آشیق آسلانین گول تبریزیم شئعری

   آذربایجانلی اولاسان، کؤکون کندلی اولا، کنددن قیریلمایاسان، قازانجین آذربایجانین کند اوزونو یاشاماق دیر. هر کسین پایی‌نا دوشمز. کندلر ده ده‌ییشیم گئج یاراندیغینا گؤره، کولتورلر چوخ آز حوجوما اورغرانیرلار. آشیق‌لار آذربایجانین دیلی‌ایله بیرلیکده هر ندن چوخ حوجوما معروض قالیب‌لار. آشیق‌لاری آذربایجاندان آییرساق، آذربایجان، سینه‌یه گلن وارلیغی‌نی ایتیرر. بو وارلیق‌لار یوزولمادان تکجه آشیقلارین سؤزلری ایله سازلاریندا قالیب دیر. آشیق‌لاردان یازانلار چوخ اولوب.  یازان‌لارینین ال‌له‌رینه ساغلیق دئمه‌لی‌ییک. آشیق‌لارین ساخلادیق‌لاری آذربایجان وارلیق‌لارینین بیر چوخو هله یازیلماییب. داها دوغروسو یازیلان‌لار بیر بالا بؤلوم‌لری اولوب‌لار.   

  بوردا آشیق‌لارا گؤره یازماغی دوشونمورم. چوخدان ایدی، آشیق آسلاندان ائشیتدیـییم بیر هاوانین سؤزلرینین دالیسیجایدیم. تاپانمیردیم. بیر چوخ‌لاریندان سوراغلاشمیشدیم، آنجاق الیمه بیر شئی چاتمامیشدی.   

  آشیق آسلانی، اوشاق چاغلاریمدان تانیـییردیم. ائوده بیر اسگی ظبط وارایدی. ایکی جور ناوارا قولاق آسیلاردی. بیری، آشیغا، باشقاسی محرم‌لیک‌ده نووحه‌یه. سس‌لری ائشیدیلن‌لر جانلی دا اوخویوردولار. آشیق‌لار تویلارلا، قفه‌لرده، نوحه‌چی‌لر محرم‌لیک‌ده مچیدلرده، خیـیاوان‌لاردا. آشیق‌لاری یاخشی تانی‌یاردیم. آشیق آسلانین سسی، من ائشتدیـییم آشیق سس‌لرینین ایچینده باشقایدی. آسلان چالاندا، ائله بیلیردیم خوی چالیر. سسی جانیما اوتوروردو. خویون دوز مئیدانیندا، آشیق آسلانین قَفه‌سی وارایدی. چوخ واقت یولوم اوردان دوشردی. هر زامان  آشیق آسلانین اوردا ساز الینده خیال ائله‌ردیم. چالمایان‌ گونلر بئله، جانلانیردی گؤزوم‌ده.  

  آشیق آسلانین قفه‌سیندن ییرمی توکان یوخاری، "آیسودا" آدیندا بیر کیتاب ساتیش ائوی وارایدی. آدی ماراق‌لاندیرمیشدی منی. آشیق آسلانین شکیلینی اوردا گؤرموشدوم. اورانین مودورو قودرت بَی، آشیق آسلانی،( داها دوغروسو بوتون آشیق‌لاری، باشدا آشیق آسلانی) ساوونانین بیری ایدی. آشیق‌لارا گؤره گؤروشو وارایدی. گؤروش‌لری منی ماراقلاندیریردی. هر زامان آشیق‌لارا گؤره دانیشاجاق سؤزو وارایدی. 

 آشیق آسلانین باشقا جانلانماغی اورین درنه‌یینده اولدو منیم اوچون. اورین درنه‌یی؛ آیسودا اولان یئرین اوست قاتیندا اولوردو. ایبراهیم بَی جعفرزاده-‌نین قوردوغو بیر درنه‌یی ایدی. آشیق آسلانا گؤره اوردا دانیشیلیردی. یادیما گلیر ایبراهیم‌ هردن اؤزونه بیر هاوانی اوخویوردو. هاوا؛ اینسانی اؤزل بیر حیس وئریردی، بوتون حیس‌لری اویاندیریردی. سوروشدوم دئدی‌لر آشیق آسلانین قوشدوغو هاوادی. خوی اوشاق‌لارینین بیر چوخو بو هاونی ازبرله‌میشدی‌لر. یادیمدا قالان بندی(نظریمه گلیردی باشلانیش بندی اولا) بویودو:    

  چوخ اوجاسان اوجا داغلار       گؤرنمیرم من وطنی  

  وطنده بیر سئوگیلیم وار          اؤپنمیرم گؤزلرینی 

 جان تبریزیم، جان تبریزیم         گل دردیمی قان تبریزیم 

   یادیمدا قالان بو شئعری ایدی. نئچه ایل بو هاوانین دالیسیجایدیم، تاپیب قولاق آسام. تاپانمادیم. خویون آشیق ناوارلارینین ساتان یئره ( مش عسگر، ماکی داروازاسی‌نین آغزیندا) ده گئتدیم، تاپانمادیم.  ایتیم ایتمیش کیمی آختاریردیم، البت هله ده آختاریرام. تاپانمامیشام. آنجاق او گون آشیق آسلانین اؤزل سایی اولاراق، سایین علیرضا ذیحق-ین حاضیرلادیغی کیتابچانی اینترنت‌ده لینکی گؤردوم. او اؤزل سایی‌دا آشیق آسلانا ایندی‌یه دک یازیلان یازی‌لاری قویموشدو، گول تبریزیم شئعرینی ده گتیرمیشدی. هاواسین تاپانماسام دا، شئعرینی تاپدیم. اومودوم وار بیر گون بیر یئردن، آشیق آسلانین اؤز سسی‌ ایله بو هاوانی قولاق آسا بیلم.