X
تبلیغات
رایتل

  گوندو گلیر گئچیر عؤموردن. عؤمورو ییغیب ساخلاماق اولمور. هر نه قدر ده قاباغین آلسان، بیر یئرلردن آخیب گئدیر. بو دورومدا، عؤمورو یاشایانلارین اللریندن گلن، اونو یاخشی یاشاماق اولور. دؤنوب دالیمیزا باخساق، نئجه یاشادیغیمیزی هر کسدن یاخشی گؤرَریک. 

   بو ایل، سئچگی‌لرین هاواسیندا باشلاندی. سئچگی‌لرین سونوجونو چوخ آزلاری، اؤنجه‌دن دئیه بیلردیلر. سئچگی‌لر اؤزو ایله یئنی بیر دورومو یاراتدی. اؤزللیک‌له دیل حاققیندا بیر سیرا سؤزلر وئریلدی. او سؤزلره دایاناراق، دیل حاققیندا فرقلی گؤروشلر اورتایا چیخدی. باشلانیشدا، هر کس بیر ایش‌لر گؤره بیله‌جکلرینه اینانیب، او حاقدا دانیشماغا باشلادی. 


    بیلمیرم، کیم‌لر نه ایش گؤردولر، آنجاق گئتدیکجه بو ایشین نه قدر چتین اولدوغونو هر کس باشا دوشدو!. یاخشی باخدیغیمیزدا؛ بو حاقدا، ایلک آتدیم‌لار بئله آتیلمامیش گؤرونورلر. دیل‌لره گؤره باخیش‌لار هله تام امنیتی-پولیتکال بیر باخیش دیر. بو باخیش‌لارین دَییشیلیب، توپلوم‌‌سال(اجتماعی) ایله کولتورل(فرهنگی) باخیشا چئوریلمه‌سی، آرادا اولان بیر چوخ چتین‌لیکلری قالدیرا بیلر. 


   دوولت دیل‌لردن دانیشسا دا، دیل‌لرین قوروماق سیمگه‌سی اولان، "دونیالیق آنا دیلی گونو" موناسیبه‌تینه دوولت طرفیندن هئچ بیر قورولتای قورولمادی . اونون یئرینه، دیل‌سئورلرین قوردوغو ییغینجاقلارا امنیتی یاناشیلدی. آرالاری آزالماقدا اولان فرقلی گؤروشلرین آرالاری یئنیدن  چوخالماغا باشلادی!

   اومود اینسان اوچون دیر. اومودوم وار گلن ایل، دیل اوچون آتیلان آتدیم‌لار بیر-بیرینه یاخینلاشا. دیل، پولیتیکال دورومدان چیخیب، سوسیال- کولتورل دوروما بیر آتدیم یاخینلاشا بیله. 

 بایرام، بوتون ایل بایرامی توتان اینسانلارا قوتلو اولسون. گلن گونلریمیز خئییرلی اولسون. گؤزوموز یوللاردا قالماسین، سئودییمیز اینسانلارین هامیسی یانیمیزدا اولماق آرزیسیلا، سئوگیلی یولداشلار بایرامینیز موبارک اولسون.    

نظرات (1)
دوشنبه 24 شهریور‌ماه سال 1393 ساعت 11:55 ق.ظ
سلام قارداش
سنین تورک دیلینده یازماقین چوخ گؤزل دیر. وئبلاگیزی او دیری وئبلاگ لارا یانی اولارکی گونده،هفته ده و حتی آیدا بیر یول یازیر لار تانیش ائتسز یاخجی اولار. نثر یازی لار آز اولدوغونا گؤرا میللتین اوخوما قابلیتی آشاغی دورومدادی.
بیرده کی مقاله(یازی) زا گؤره دئمه لی یم کی سئچگی لرده حاق سؤزو دئمه گه بعضن بیر فیرصت لر آچیلیر، و رای آختارانلدردا یالان وعده لر وئریرلر و بونا گؤز تیکمک فایداسیز دی. آما حاققیمیزی ایسته مک هر زامان بیزیم بورجوموزدی.
گؤزل یازیزدان فایدالاندیم. ایجازه وئرسز سیزی باغلانتیلاریما قاتارام.
پاسخ:
علیکم سلام؛
تورکو یازماغی بورجوموز اوچون یوخ، بلکه بو دیلده یازماغی هر دیلدن یاخشی بیلدیییم اوچون دور. البت ظنیمجه ائله دیر. اوزوون زامان بیر دیلده یازماق، قورولوشلاری قالیبه سالیر. تورکو اوخویان چوخ دیر. آنجاق بو اؤلکه ده اوخویانلار آزدیر. هر کس بو دونیادا اؤز دَوه‎سین قووور. سئچگیلرده ده ائله دیر. چوخ سئوینرم باغلانتیلاریزا باغلاساز.
برای نمایش آواتار خود در این وبلاگ در سایت Gravatar.com ثبت نام کنید. (راهنما)
نام :
پست الکترونیک :
وب/وبلاگ :
ایمیل شما بعد از ثبت نمایش داده نخواهد شد