آنالاردان دوغولور، دوغرولور دوغرولار!

    گؤزوموزو آچاندان، آنالاری، آتالاری گؤرموشوک. اؤیرندیک‌لریمیزی اونلاردان اؤیره‌نمیشیک. دونیاگؤروشوموزون اؤن‌گؤروشونو اونلاردان آلمیشیق، سونرا باشینا قالمیشیق. آنالار، آتالار نه زامان یارانیب‌لار، ایکی-اوچ نسل بوندان اؤنجه‌سینی دئیه‌بیلریک. یوخاری باشی، سویلو-سوپ‌لو‌لاردا، بیر تانینمیش کیمسه‌یه چاتیر. دینی کیتاب‌لاردا آدام‌لا هاوا-‌دان دوغولدوغوموز وورغولانیب. 

   آنالاری اولان‌لار، آنا نه‌دیرلی‌یین یاخشی بیلیرلر. هر آنا اؤز بالاسینا،‌باشقا اولور. آنالارینی گؤرموین‌لر آنا لذتی‌نی بیلمزلر. اونا گؤره ده هر زامان، آناسیزلیق بوشلوغو اونلارین یاشام‌لاریندا، آیاق دؤیر.  

   آنا‌لار، دوغور. دوغدوق‌لاریندان، یاشام دوغرولور. دوغولان‌لار دوغرولورلار. دوغرولار دوغوشدان‌دا آنادان دوغولورلار. دوغرولماق، آنالاردان بیزه پای قالیب. گون دوغدوق‌دا، ایشیق‌ ساچیر، قارانلیق‌دا اولان‌لار دوغرولورلار. بیز دوغودا دوغولدوغوموز اوچون، دوغرو اولمالی‌ییق. آن‌لاریمیز آنالارلا دوغولور، آن‌لاردا آنالار آنیلیر.  

 آنالار باتدیقدا بیز باتیریق. باتیدا باتمالی‌ییق. آنلاریمیزی باتیرماماق اوچون، آنالاریمیزی آنمالی‌ییق. دوغرولمالی‌ییق. 

 دوغرولاماق اوچون، آن‌لاریمیزی، کسین‌له‌شدیریب، آند ایچیریک. آند-آمان چکیریک. بیزی هر زامان هئچ نه اوممادان قوجاق‌لایان، آنا اولور. قوجاغیندا، بسله‌ییب بؤیولدن آنا اولور. بیلمیرم آنالار تورپاقدان، آنالیغی آلیب‌لار، یا تورپاق آنالاردان آنالیغی؟ آنالار دا تورپاق‌دا دوغولوب‌، تورپاغا گؤمولورلر. توربت‌لری تورپاقدا اولور. تورپاق آنا اولور. آنالار توربتی توپراق، آنا اولور، هم آنالارا، هم آتالارا. گلین بیرلیکده تورپاقدا، توپراقلا آناق، آنالاری.