یاددا قالان دؤنم‌لردن اؤیرنجی دؤنمی

  عسگرلی‌یی بیتیرن، توپلوم‌دا کیشی اولماق قابلیتینه یئتیریر. بیر شئی‌لری یییه‌له‌نه بیلیر. عسگرلی‌یی بیتیرن زامان، ائولرین چوخوندا(ایندیکی ائولری دئییرم، اوشاق‌لار آز اولور)، توی بایرام اولور. قوربان بئله کسیرلر(البت اللری چاتان‌لاری دئییرم!).   

 عسگرلیک تکجه اوغلانلارین‌کی دیر. اونون یانیندا اوتوز ایله یاخین کوتلوی‌لشن، اؤیرنجی اولماق دؤنمی یئر آلیب. یئر آلیب کی هئچ، اونو دا ووروب کئچیب قاباغا. عسگرلیک‌دن قاچان چوخ اولور، آمما اؤیرنجی اولماغا جان‌آتان چوخ اولور. اوسته‌لیک اللریندن پول دا وئریرلر. بیرده کی آرواد-کیشی آیری-سئچگی‌لی‌یی ده، عسگرلیک کیمی اولمور.  

  اؤیرنجی‌لی‌یین سوره‌سی ایسه، ایکی ایلدن باشلاییب- اوزاندیغی قدر اولوردو. آنجاق ایندی‌لیک ده بیر آز سوره‌سینی سینیرلاندیریب‌لار! هردن ایکی ایللیک درسی، بئش-آلتی ایلده، دؤرد ‌ایللیک درسی‌ ایسه اون ایل-اون‌بیر ایل...ده بیتیریردیلر. البت عسگرلیک‌ده ده عسگرلیک‌لری سورن‌لر تاپیلیردی(اوسطوره‌ویله‌شیردیلر؛ عسگر آدی قازانیب، بیر عؤمور عسگرلرله اؤیرنجی‌لرین آغزیندا دئییلیردی!!). آنجاق عسگرلیک‌لر زورولا اوزانیردی. اؤیرنجی‌لیک کؤنوللو اوزاندیریلیر.  

  اؤیرنجی‌لیک‌له عسگرلی‌یین، اورتاق‌لیق‌لاریندان بیری یاتاق‌لار دیر. آنجاق عسگرلیک‌ده یاتاق‌دا یاتارلار، اؤیرنجی‌لیک‌ده یاتاق‌دا اوزانارلار آنجاق ائله‌یه بیلدیکجه گئجه‌نی یاتمازلار. گونوزو(کیلاس واقتی) یاتارلار. واقتلی یاتیب-دوران‌لار دا اولار. واقتلی یاتیب-دوران‌لارین ایچینده اؤزلرینه یئتیشن‌لرین سایلاری چوخ اولور. سرگی‌لنمک اوچون حاضیرلیق گؤرورلر. اوره‌ک‌لرینده بیرلرینی یئرلشدیرمه‌یه چالیشیرلار. اوره‌ک‌لر تیتره‌ک اولدوق‌لاری اوچون سئچیلن‌لر ده تیتره‌ک اولور. بیری گلیر، بیری گئدیر. زامانی دئمه، گلمیر تکجه گئدیر. 

   اؤیرنجی‌‌نین بئینینده گله‌جک ایسته‌دی‌یی کیمی تصویره چکیلیر. اؤیرنجی‌لی‌یی بیتمه‌دن هر نه اولا بیلدی‌یین دوشونه بیلیر. عسگرلر، عسگرلیک‌لرین دیله گتیرمه‌سه‌لر ده، اؤیرنجی‌لر اؤیرنجی اولدوق‌لارینی فخریله دیله گتیریرلر. باش‌لاریندا زور اولمادیق‌لاری، هئچ کسه سوروملو اولمادیق‌لاری، ایش‌لری ذئهنی اولوشدوردوق‌لاری، اؤیرنجی‌لری به‌یه‌نمز ائله‌ییر.  

   اؤیرنجی‌لرین تکجه گؤره‌ولری درس اوخوماق اولور. داها دوغروسو، درسی اوخوماق زوروندا دیرلار. البت یاخشی سونوج آلماق ایسته‌سه‌لر، یوخسا کیمسه اونلاری یاخشی اوخوماغا دا زورا باسا بیلمز. 

  اؤیرنجی‌لیک، توپلومون ایچینده ده دیرلی بیر دؤنم اولدوغو اوچون، ایسته‌دیک‌لری یئری اؤیرنجی‌لره قازاندیرا بیلیر. اؤیرنجی‌نین گلدی‌یی یئرده اؤیرنجی اولماسا، یا دا اؤیرنجی آز اولسا، اونو توتماق اولماز.  

 بو کی اؤیرنجی‌لر اؤزلری سوروملو اولدوق‌لاری چاغ نئجه ایش گؤره‌بیله‌جک‌لر، یئرینده قالسین! نی‌یه کی، دئییلن هئچ بیر سؤز یوزه-یوز یئرینه اوتورماز. یوزه-یوز قالسین، هردن یوزه بیر ده یئرینه اوتورماز. اوتورار اوتورسون، اوتورماز-اوتورماسین، اؤیرنجی‌نین گؤزونده اوتورمالی دیر، اوتورمادیغیندا بیر یئردن آخساییر، او دا اؤیرنجی‌نی ایلگی‌لندیرمیر!! 

  اؤیرنجی‌نین بوش واقتی چوخ اولدوغو اوچون، واقت‌لارین دا اؤز الینده اولدوغو اوچون، خوش کئچیرتمه‌یه لاپ گؤزل دؤنم دیر. بیر دؤنم‌کی هر کسی الشدیره بیلیر. پول سالمادان سؤزونو دئییر!.