منم داش‌قاپی

    سؤز وئردی، اوره‌یینده اولان سؤزلرینی بیر کس‌لره چاتدیرا. بو سؤز هر کس دانیشان سؤز ایدی.  هر کس دانیشان سؤزو نی‌یه چاتدیرسین، بیلمیردی. سؤز دئدییین، شهرده اولان داش‌قاپی‌نی اوچوتماق ایدی.  

   داش‌قاپی چوخدانین داش‌قاپی‌سی ایدی. اوستوندن ایل‌لر، گونلر کئچمیشدی. کچئمیشده اؤتن‌ داش‌قاپی‌یا بیر تپیک ووروب کئچمیشدی. داش‌قاپی لاخلامیشدی. داش‌قاپی‌نی آللاه ساخلامیشدی. لاخ قاپی‌دان کئچمه‌یه هر کس قورخوردو. کئچن بیر تپیک ووروب کئچیردی. دالینا باخیردی. باشینی اوغورلویوردو. بوینونو قیسیردی. قاپی تیتری‌ییردی. کئچن تئز میسیردی.  

هر گون قاپی‌نین لخشئه‌لی‌یی چوخالیردی.   

   هر کس قاپی‌دان دانیشیردی. هان-هان ایدی خالقین باشینا ییخیلا. داش‌قاپی ترپندیک ده شهر ترپنیردی. هر کس ییرقالانیردی. دئیه‌سن قاپی‌ شهرین دیره‌یی ایدی. هر کس بو قاپی‌دان قورتولماق ایستی‌ییردی. قاپی اولمادیق‌دا، بؤیون‌لار قیسیلیب، گؤزلر یومولمویاجایدی.  

   او باشقا جور دوشونوردو. او دوشونوردو قاپی ییخیلسا، شهرین اوستونه ییخیلاجایدی. یوخ شهری باش اوسته قویلویاجاق‌ایدی. شهرده اولان‌لاری باسدیراجاق‌ایدی. بیلیردی آنجاق دئیه‌نمیردی. شهرین دارقالاری بیر کس قاپی‌دان یانا اولسایدی، باسیب دؤیردی‌لر. هئچ کس قاپی‌دان یانا اولا بیلمزدی. البت گؤرن‌لر اولوردو، آنجاق اونلاری دا سیخما-بوغمایا سالیردیلار. وار یوخ‌لارین آلیب، شهردن قوووردولار. قوولان‌لار، شهره قاییدیردی‌لار. او دا ایستی‌ییردی، داش‌قاپی‌دان یانا اولا. داها دوغروسو یانا ایدی. قورخاق یانا ایدی.   

  تاخما آدلارلا یانا دوران‌لار وارایدی. دؤینج، داشلی قایا، قاپ-قاشیق، شهرداشی، قاپالی شهر، دیره‌ک، کوره‌ک کیمی آدلار ائشیدیردی. آنجاق بیلمیردی کیملرایدی.  

   سؤزون توتموشدو. داش‌قاپی اولاجاق ایدی. داش‌قاپی اولدو. هر کس ده بیلدی بیر داش‌قاپی وار.  

   داش‌قاپی اولمامیشدان دا داش‌قاپی‌نین اولدوغونو هر کس بیلیردی. ایستی‌ییردی داش‌قاپی‌نین ایچینه گیره، هر گون بیر یئرینده اولا. 

    گئجه‌لر یوخودا داش‌قاپی اولوردو. گلن گئدنی گؤروردو.  بیرلری داش‌قاپی‌نی داغیتماغا دؤیوردولر. داش‌قاپی‌یا سو باغلامیشدی‌لار. شهرده اولان‌لارین چوخو داش‌قاپی‌نی سئویردی‌لر. سئوینج‌دن داش‌قاپی‌یا تپیلیردی‌لر. داش‌قاپی تیتری‌ییردی. سئون‌لری چوخ ایدی. تومارلایان‌لار دا اولوردو.  

داش‌قاپی هردن داش اولماقدان دویوردو. تاختا، دمیر اولسایدی، ایندی‌یه دک یوز یول ده‌ییشیلمیشدی. بو قدر ده شهره باتمامیشدی. 

   هر کس شهرده داش‌قاپی اولوردو. شهرده قاپی‌‌لار دویولوردو. کیم اولدوق‌لاری سوروشولدوقدا، قاپی دالیندان سس گلیردی. آچ قاپی‌نی، منم داش‌قاپی.