داش قاپی
دوشوندوکلریمین پارچالارینی هردن ایستهدیـییم کیمی یازیرام
داش قاپی
دوشوندوکلریمین پارچالارینی هردن ایستهدیـییم کیمی یازیرام
تنقیده دؤزن یوخ دیر
آذربایجان گونشینین 42-جی ساییسیندا یاشماق سیرا کیتابلارینین سورملولاریلا بیر دانیشیق آپاریلمیشدی. بو دانیشیقدا آذربایجاندا نقد اولمادیغی وورغولانمیشایدی. نقد قالسین او یاندا کیتابلارا تانیتیم دا آذربایجاندا یازیلمیر. بونلار اولدوغوموز گئرچکلردیر. آذربایجانلیلارین آراسیندا نقده نه قدر دوزوم اولا بیلهجهیی ده بیلمیرم. آذربایجانلی یازارلارین یازیلاریندان گرک تعریفلهیهسن، تعریفلهمهدیکده سنی اؤزونه دوشمان سانیب، سونونادک ائشهجکلر. ائشمکده بیر گونلوک، ایکی گونلوک اولمویاجاق، هر نه سنین طرفیندن یازیلیب، دئییلسه تاپدالاناجاق. اولا بیلسین کی یولداشلار دئدیکلریمه اینانماسینلار، آنجاق اولاجاقدان قاچماق اولماز!.
آللاه بو دیلخوشلوغو بیزیم الیمیزدن آلما
"آللاه بو دیلخوشلوغو بیزیم الیمیزدن آلما" بو سؤزو یولداشلارین بیری باشیمیز قالابالیق اولان گونلرین بیرینده دئدی. بو سؤز دورد-بئش ایل بوندان اؤنجه دئییلیب. او گون بو سؤزو دئییلدیکده بلکه بیر میزاح اوچون دئییلردی. آنجاق ایندیلیکده او سؤز دوغرولوب. یانی بیر گونلر اولور کی یاشادیغیمزدا چتینلییه سالیر، چتینلییی کی اؤزون بیله-بیله یارادیرسان. نه قدر دوروم آغیر اولسا سئوه-سئوه یاشاییرسان. سئوه بیلهجهیین دورومدا یاشلاناندان سونرا یاشایانمییب او گونلرین حسرتینده قالیرسان.
آذربایجانلیلار دئیهسن تانینیبلار
آنا یوردوم دوشرگهسینده ائکو میللتلرینین آراسیندا کولتورل آلیش-وئریشه گؤره بیر یازی گئتمیشدی. آذربایجانین کولتورونون تانیتدیریلماماسینین ندنلری چوخدور. من بو چوخ ندنلردن نئچهسینی آشاغیدا سیرالاییرام.
1- آذربایجان کولتورو دونیانین ان تانینمیش کولتورو اولدوغونا گؤره 1000 ایل ده بو کولتوردن دانیشماسان، تانیتدیرماسان گئنه دونیا کولتورلرینین ان تانینمیشی اولاجاق!
2- آذربایجانلیلارین اومانیست اولدوقلارینا گؤره دونیادا اولان بوتون خالقلارین کولتورلرینی تانیتدیرماق اونلارین بویونلارینا دوشر.
3- آذربایجانلیلار اومانیست اولدوقلارینا گؤره اونلارا عایید سینیر تعریفلهنه بیلمز. آذربایجان دونیانین، دونیا دا آذربایجانین دیر. چوخداندیر آذربایجانلیلار دونیالی تانینیرلار. دونیالی تانیندیقلارینا گؤره ده دونیا اوچون چالیشمالیدیرلار. ایندیلیکده آذربایجانلیلاردان سونرا باشقا دونیالیق تایننان میللت یوخدیر!.
4- آذربایجانلیلارین کولتورلری گوجلو اولدوغونا گؤره آذربایجانا منسوب اولان هر بیر کولتورل اؤزللیلیگی باشقا میللتلره وئریر. دونیانین بیر اولماغینا گؤره آذربایجانلیلار اؤزلرینه عایید بیرکولتور تانیمیرلار. آذربایجان کولتورو تانیمادیقلارینا گؤره سوروملولوق دا بویونلارینا آلمیرلار.
قالان ندنلری سیز دئیین.
وورغو
هر دیلده اولدوغو کیمی تورک دیلینده ده وورغوسوز دانیشیقلار اولدوغو کیمی آلینمیرلار. وورغو؛ سؤزجوک، سؤز و جوملهده اولور. اونلاری نئجه ایشلتمهیین بیلمهدیکده بیزیم دانیشیغیز آقساییر. بو آقساقلیقدان قورتولماق اوچون وورغونو دوزگون اؤیرنمهلیییک. بیر چوخ دیل کیتابلارینده وورغونون هارا دوشدویو یازیلیبدیر. یازیلاری اوخویوب بیلدیکده ده دانیشیقدا وورغولارین نئجه دوز ایشلتمهیینده زورلانیرام. بو سورونو نئجه چؤزه بیلهجهییمی بیلمیرم!
یئیندن سونرا قودوقلانا-قودوقلانا گولومسویوروک
ایندیلیکده هر ائوه قوناق گئدیرسن، سنی عزیزلهسینلر دئیه تویوق-پیلو قویورلار. تویوق-پیلو تکجه قوناقلار اوچون یوخ بلکه گوندلیک یئمک اولاراق چوخ ٱداملارین سوفرالاریندا یئرلشیر. بو یئرلشمک او قدر چوخالیر کی سوندان گلن نسیل دویو اولمویاندا دئیهسن یئمک یئمیییبلر.
من ده آنام گیله گئدنده دویودن قاچیم دئیه اونلاردان ایسترم دویودن سونرا هر نه وار پیشیرسینلر یئیهک. اونلار دا هر ائونه بیر جوره آذربایجان غذالاریندان پیشیرلر. آشلاردان توتوب، دولمالارا تک گونده بیرینی پیشیرر آنام. گاهدان غذالاری او قدر یئمیریک یادیمیزدان چیخیر بئله بیر غذالار دا وار. آتامگیلدن چیخاندان سونرا بیر-ایکی هفته آذربایجان غذالاریندان دانیشیرام. سونرا هر نه یادیمدان چیخیر. بئله بیر دورومدا تک اولدوغومو سانمیرام. گاهدان ات-سویونو یئمک فانتزی بیر یئمهیه چئوریلیر. اونو دا اؤزوموز پیشیرمیریک، رستورانلاردا یئییریک. یئیندن سونرا دا قودوقلانا-قودوقلانا چیخب، بیر بالاجا چوپو آغزیمیزدا اویان بویانا دولاندیریب، گولومسویوروک.