اینسان‌لارین تاریخه یانسیماق‌لارینا، گؤزه چارپان ایش‌لری گره‌کیر. اینسانین تاریخینده کئچمیشده‌کی‌لردن، چوخ آز آدام‌لار اؤزلرینی تاریخه یانسیدا بیلیب‌لر. بونلارین چوخو، نبی‌لر اولوب‌لار. نبی‌لردن باشقا یونان‌لاردان بیر چوخ‌لاری تاریخه یانسی‌ییب‌لار. اونلارین یازی‌لاری الده اولدوغو اوچون تاریخده یئرلرینی آلیب‌لار.
بیر چوخ یازلان‌لار اؤزلرینی ساخلایا بیلمه‌دیک‌لری اوچون یازیلاریلا بیرلیکده تاریخه قویلانیب‌لار. اؤزلرینی قورویوب ساخلایان‌لار اوسطوره‌یه چئوریلیب‌لر. اوره‌کدن اوره‌یه یول تاپیب، هر دوراقدا قول-قانادلانیب، بو گونه چاتدیقدا ال چاتماز اولوب‌لار. ایناندیرا بیلمه‌دیک‌لری قدر ال چاتماز یئرده دوروب‌لار.
آرا-سیرا بئیین‌لردن قوندارما اولاراق تاریخه یانسی‌یان‌لار دا اولوب. بیردن بیره چیخیب، ال-اله وئریلیب، تاریخی شوخوم‌لویورلار.
سون یوز ایلده، اوسطوره‌له‌شن کیمسه‌لر تاریخه یانسی‌یان‌لار اولوب. کؤتولردن توتوب، قارامان‌لارا تک. هر خالقین، تاریخه یانسی‌یانی اولوب. آنجاق بونلاردان بیر سیرالاری دونیالاشیب‌لار. بیر سیرالاری دا بؤیوک ائتگی‌لری اولسالار دا، یییه‌له‌نن‌لری اولمادیقدا یئتیم قالیب‌لار. اونون ندنی ده، آتا اولماق یئرینه اوسطوره اولماق‌لار اولا بیلر.
بیرلرینین عؤمورلرینین بیر کیتاب‌دا یانسیماسینا، کیتابا یانسیدان کیمسه‌لر گرک‌لی دیر. گوجلو حاکیم‌لر پول وئریب، اؤزلرینی یانسیت‌دیریرلار. کیتابا یانسیدان‌لارین چوخو اؤزلری اوچون یانسیت‌دیریرلار. ایسته‌دیک‌لری کیمی یانسیدیرلار.
یازان‌لار ائگه‌منلیک‌له‌رینی گئرچک فضادا قورانمادیقدا، ال‌له‌ری چاتدیق‌لاری فضالاردا قورورلار. اونلاری بئینینده یارانان فضالارین یارادان‌لاری اونلار اولدوق‌لاری اوچون، بئیین‌لری چاتدیق‌لاری قدر قول-بوداق وئریر. ایسته‌دیک‌لری کیمی یارغی‌لاییرلار.
یاراتدیق‌لارینی باشقالارینا گؤسترمک ایسته‌ییرلر، حاکیم‌لرین خوش‌لاری گلمه‌سه اونلارین بئیین‌لرینده یاراتدیق‌لاری، گونون گون‌اورتا چاغی آیاق‌لارینا دولاشا بیلر. دولاشمالار چتین‌له‌شه‌نده، هردن بئیین‌لرینده اولان‌لار ترسه ده ایشله‌یرلر. دوز باشلانقیج یئرینه دک، بلکه ده تووا دوشدوکده درینی ده آتدی‌یا بیله‌لر. اوندا دیر کی اونلارین اؤزلری ده باشقالارین کیتاب‌لارینا یانسی‌یا بیلرلر.
کیتابا یانسیدان‌لار، باشاردیق‌لاری قدر ایسته‌دیک‌لرینی یانسیدارلار. آنجاق ایسته‌دیک‌لرین هامیسینی یانسیماغی(ایسته‌نیلن کیمی) چوخ چتین اولار، بلکه ده هئچ اولماز.
گؤرورسن، بیر نفرین بوتون عؤمرونو بیر کیتابا یئرلشدیریب، یاییرلار. البت، یاشاییش‌لارین یازیلماغی هر کسه قیسمت اولماز. یاشاییش‌لاری یازین‌لار، توپلومون ائتگی‌لی آدام‌لاری اولورلار. گئنل‌لیک‌ده تانیلا بیلن‌لر ایسه، بیر نسیل‌لرین آراسیندا بارماق سایی اولا بیلیر.
اینسان‌لار بیر کیتابا یانسیماق اوچون، چئوره‌لرینده اولان کیمسه‌لردن فرقلی اوینویورلار.
فرقلی اوینادیقدا، یاشاییش‌لاری دیققت چکیر. اوینایانلارین دوروم‌لارینا باغلی، یاشاییش‌لاریندا چتین‌لیک‌لر ایله اوزله‌شیرلر. کیتاب‌لارا یانسی‌یان‌لارین، گئنل‌لیک‌ده اورتاق اؤزل‌لیک‌لری وار دیر. بو اؤزل‌لیک اونلارین، بیر کس‌لری یانسیماماق‌لاری دیر. بئیین‌لرینده اولان دوشونجه‌لرین قوروقچولاری دیرلار. اولا بیلسین بیر دوشونجه یه، نئچه نفرلر لیدئرلیک ائتسین‌لر. داها دوز آچیق‌لایا بیلسم، بئله دئمه‌لی‌یم. اونلار باشلانقیج اولورلار.
باشلانقیج کیمسه‌لردن باشقا، کیتاب‌لارا یانسی‌یان‌لار، حاکیم‌لر اولور. حاکیم‌لر گوج قایناغی ساییلدیقدا، بیر توپلومو بئیین‌لرینده‌کی‌لره گؤره فرقلی یئره سوروک‌لویه بیلرلر. هر هالدا حاکیم‌لرین اولدوق‌لاری یئر، ترپنمه‌یی گرکیر. ترپه‌نیشدن آسیلی اولاراق، حاکیم‌لر هر زامان، کیتاب‌لارا یانسی‌ییرلار.
کیتاب‌لارا یانسی‌یان‌لارا فرقلی سه‌ویه‌ده یاناشمالار اولور. بیر سیرالار، اؤز میللت‌لرینین آراسیندا قالیر. بارماق سایی‌لاری دونیالاشیرلار. بیر سیرالاری اؤز یوز ایللیک‌لرینده قالیرلار. هر دن بیری ده ابدی‌له‌شیرلر.
ابدی‌لشمه‌لر، دونیایا وئردی‌یی اتئگی‌لردن آسیلی اولور. ابدی‌لشه‌نلرین ایچینده کؤتولری ده اولور. بلکه ده سونرادان کوته‌لندیریلیرلر. یا دا سونرادان آریندیریلیب، گله‌جک نسیل‌لرین یایقین آدلاریندان اولورلار.
داش اولماقدان، دؤنوش یوخ دیر. داشی ایمک اولماز. داش ده‌ییشیلمه‌یه یونتانیلمالی دیر. داشدان یونتالانمیش بیر داها او داشا قاییتمازلار. یونتانیلماسا، بؤلونمه‌لی دیر. بؤلونموش داشی هئچ نه ایله، بوتون داشا چئویرمک اولماز. یاپیشقان‌لا یاپیشدیرساق، زورا دوشنده یاپیشدیریلان یئردن قوپور. داش بوتونلویونو ساخلاماغا، بؤلونمه‌مه‌لی دیر. بلکه ده داش اولمامالی دیر.
داش اولماقدان چتینی داش کیمی یاشاماق دیر. دوشدویو یئرده قالیب، اوزونو ترپت‌میر. قالدیغی یئر اونو باشقالاری ترپت‌مه‌یه گوجو اولمایانا کیمی دیر. گوج چوخالدیقدا یئریندن اویناییر.
سؤز وئردی، اوره‌یینده اولان سؤزلرینی بیر کس‌لره چاتدیرا. بو سؤز هر کس دانیشان سؤز ایدی. هر کس دانیشان سؤزو نی‌یه چاتدیرسین، بیلمیردی. سؤز دئدییین، شهرده اولان داش‌قاپی‌نی اوچوتماق ایدی.
داش‌قاپی چوخدانین داش‌قاپی‌سی ایدی. اوستوندن ایل‌لر، گونلر کئچمیشدی. کچئمیشده اؤتن داش‌قاپی‌یا بیر تپیک ووروب کئچمیشدی. داش‌قاپی لاخلامیشدی. داش‌قاپی‌نی آللاه ساخلامیشدی. لاخ قاپی‌دان کئچمه‌یه هر کس قورخوردو. کئچن بیر تپیک ووروب کئچیردی. دالینا باخیردی. باشینی اوغورلویوردو. بوینونو قیسیردی. قاپی تیتری‌ییردی. کئچن تئز میسیردی.
هر گون قاپی‌نین لخشئه‌لی‌یی چوخالیردی.
هر کس قاپی‌دان دانیشیردی. هان-هان ایدی خالقین باشینا ییخیلا. داش‌قاپی ترپندیک ده شهر ترپنیردی. هر کس ییرقالانیردی. دئیه‌سن قاپی شهرین دیره‌یی ایدی. هر کس بو قاپی‌دان قورتولماق ایستی‌ییردی. قاپی اولمادیقدا، بؤیون‌لار قیسیلیب، گؤزلر یومولمویاجایدی.
او باشقا جور دوشونوردو. او دوشونوردو قاپی ییخیلسا، شهرین اوستونه ییخیلاجایدی. یوخ شهری باش اوسته قویلویاجاق‌ایدی. شهرده اولان‌لاری باسدیراجاق‌ایدی. بیلیردی آنجاق دئیه‌نمیردی. شهرین دارقالاری بیر کس قاپی‌دان یانا اولسایدی، باسیب دؤیردی‌لر. هئچ کس قاپی‌دان یانا اولا بیلمزدی. البت گؤرن‌لر اولوردو، آنجاق اونلاری دا سیخما-بوغمایا سالیردیلار. وار یوخ‌لارین آلیب، شهردن قوووردولار. قوولان‌لار، شهره قاییدیردی‌لار. او دا ایستی‌ییردی، داش‌قاپی‌دان یانا اولا. داها دوغروسو یانا ایدی. قورخاق یانا ایدی.
تاخما آدلارلا یانا دوران‌لار وارایدی. دؤینج، داشلی قایا، قاپ-قاشیق، شهرداشی، قاپالی شهر، دیره‌ک، کوره‌ک کیمی آدلار ائشیدیردی. آنجاق بیلمیردی کیملرایدی.
سؤزون توتموشدو. داش‌قاپی اولاجاق ایدی. داش‌قاپی اولدو. هر کس ده بیلدی بیر داش‌قاپی وار.
داش‌قاپی اولمامیشدان دا داش‌قاپی‌نین اولدوغونو هر کس بیلیردی. ایستی‌ییردی داش‌قاپی‌نین ایچینه گیره، هر گون بیر یئرینده اولا.
گئجه‌لر یوخودا داش‌قاپی اولوردو. گلن گئدنی گؤروردو. بیرلری داش‌قاپی‌نی داغیتماغا دؤیوردولر. داش‌قاپی‌یا سو باغلامیشدی‌لار. شهرده اولان‌لارین چوخو داش‌قاپی‌نی سئویردی‌لر. سئوینج‌دن داش‌قاپی‌یا تپیلیردی‌لر. داش‌قاپی تیتری‌ییردی. سئون‌لری چوخ ایدی. تومارلایان‌لار دا اولوردو.
داش‌قاپی هردن داش اولماقدان دویوردو. تاختا، دمیر اولسایدی، ایندی‌یه دک یوز یول ده‌ییشیلمیشدی. بو قدر ده شهره باتمامیشدی.
هر کس شهرده داش‌قاپی اولوردو. شهرده قاپی‌‌لار دویولوردو. کیم اولدوق‌لاری سوروشولدوقدا، قاپی دالیندان سس گلیردی. آچ قاپی‌نی، منم داش‌قاپی.