داش قاپی
دوشوندوکلریمین پارچالارینی هردن ایستهدیـییم کیمی یازیرام
داش قاپی
دوشوندوکلریمین پارچالارینی هردن ایستهدیـییم کیمی یازیرام
کندلیلر، شهرلیلر، شهرلی کندلیلر، کندلیشهرلیلر
یاشادیغیمیز یئرلرله باغلی، توپلوم کیچیلتمهلهری گؤره بیلهریک. تئهراندا اولانلار(تئهراندا یاشایان هر کیم وار)، یان-یوورهدن گلمهلری کیچیلدیرلر(اؤزلری گلمه اولمادیقلارینی نظره آلمایاراق). تئهراندا یاشایان هر کس بو دورومون یارانماغیندا ایزی وار.
سؤزوم تئهران دئییل. باشقا شهرلرده، کندلرده کیچیلتمهلری گؤره بیلیریک. ایلک اولاراق شهرلیلر اؤزلرینی(فرق ائلهمز نئچه ایل کنددن گلمکلری، اؤنملیسی شهرلیلشمکدیر) شهرلیایله کندلییه آییریرلار. کندلیلر ده اؤزلرینی شهرلیلردن آیری بیلیرلر.
شهرین بوشلوغو آداملاری بوش بئتیردییی اوچون، شهرلیلرین چرچیوهلرینی اینجه یئتیریر، اونا گؤره ده شهرلیلر اینجه گؤرونورلر(دیش گؤروشلری). کندلیلر ایسه ایشلدیکلریندن اؤترو بدنلری قالینلاشیر(دیش گؤروشلری).
ایچ گؤروشلری تام ترسینه اولور، کندین دوزلویو، کندلیلرین اورهکلرینده اوتورور، اوزلرینه یانسیدیر. شهرلیلرین بوروشوقلوقلاری ایچلریندن، اوزلرینه یانسیدیلیر. بو یانسیتمالاری ایتیرسینلر دئیه اؤزلرینی بهزهییرلر.
شهرلیلر تئهرانا گئتدیکده تئهرانلیلارا گؤره دوز اورلور، اونا گؤره صاف شهرستانلی آدینی اؤزلرینه قازانیرلار. بو قازانما چوخ تئز قورتاریر.
کیملر نهلری اؤنمسهدیر؟
دوننکی یازیدا نهلرین اؤنمسهندییندن یازیدیم. بو اؤنمسهلر زامان سورهسینده فرقلیلنیرلر. اؤنمسهمکلر فرقلی یئرلرده چوخ فرقلی اولورلار. آنجاق چوخ یئرلرده اورتاق اولان بیر پارا اؤنمسهنیلنلر وار. بو اورتاق اولانلار ملمکتلرین آراسیندا فرقلی گؤرسهنلرینه باخمایاراق نئجهلیک باخیمیندان بیر اورتامدا اولورلار. دیل، تاریخ، میللیکیمسهلر بونلار زامان بویوندا میللتلرین آرالاریندا یارانیرلار. بونلار بوتون میللت اوچون اولدوغوندان، هر بیر گؤروشده اولان قوروپلار بو اورتامی قوروماغا چالیشیرلار. بو اورتاملار پوزولمویاندیرلار. البت اولا بیلسین بیر سیرا یارانان اورتاملارین یالنیش یاپیلار اولسونلار. یالنیش قورولان یاپیلار؛ بیر دوز یاتاق یئرینه اوتورمادان بوتونلوکله سیلینمیرلر.
اورتاق اورتاما گلنلرین قایغیلارین میللتین بوتون آداملاری چکیرلر. اونلارین اؤزل قوروقچولاری تکجه اونلارین اؤزل گلیشمهیینه چالیشیرلار. بوتون میللت گلیشمهده اورتام اولورلار. بو قازانیلان هر کسین کی اولور. بو اورتاما گلن قونولاری کیمسهلر یییهلنه بیلمزلر. بئله بیر اورتاما گلن قونولار، میللت یاشادیقجا میللتله یاشار. میللتدن بو اورتامی آلماق ایسه چتین اولار.
میللتین اورتامینا گلن قونولار هر زامان اؤنمسهنیله بیلرلر، بیر قونولار دا وار کی هر کس اونو گؤره بیلمزلر آنجاق بیر سیرا آداملار اونلاری اورتاما گتیررلر. آنجاق ائله بیر قونولارین اورتامدا اولماقلاری اوزون زامانلار قوروقچو ایستر. بو قوروقچولار اؤنمسهینلر اولارلار. بونلارا تای قونولار، بیر خالقین یاددان چیخمیش دبلری، ماهنیلاری، اویونلاری، اوشاق اویونلاری و هر بیر میللتین یادیرقاماق حالیندا اولان هر وارلیغی اولا بیلر. بونلاری اؤنمسهتمک؛ چوخ راحات اولماز.
اؤنمسهتمکلری قارشیسیندا اؤزلرینی میللتین قوروقچوسو تانییان کیمسهلر ده دورا بیلرلر. داها دوغروسو بئله بیر شئیلرین اؤنملی اولوب-اولمادیقلارینی دوشونرکن اؤنمسهتمکلرین قاباغیندا دورورلار.
نهلر اؤنمسهنیلیر؟
چئورهمیزده اولان کیمسهلر نهلری اؤنمسهدیکلرینی بیلمک چتین ایش دیر. چئوره دئدیکده، عاییلهنیزدن توتوب بوتون یئر اوزونده یاشایان کیمسهلر اولا بیلر. چئشیتلی گؤروشلر بو حاقدا دوشونورلر اورتایا قویوبلار. بیریلری بیرئیلیک اؤزگورلویو، باشقالاری ایسه توپلوملاری اؤنملی گؤروبلر. بیرلری یئمهیه ساواشی اؤنملی بیلیبلر بیریلری توتقولارینی یئرینه یئتیرمهیین اؤنمسهییبلر. بو اؤنمسهمهلر آنجاق دوشونورلردن اولوب. کوتله نئجه دوشونوب، نهیی اؤنمسهییب او فرقلی اولوب.
ایلک باخیشدا نظره گلیر کوتله، گوندمده اولان اولایلاری اؤنمسهییر. اونا گؤره ده توپلوملارین ساییلان آداملاریلا( ایدمانچیلار، اویونچولار، اوخویانلار، پوللولار، گؤزللر، گوجلولر، دئولت آداملاری) ایلگیلی هر بیر اولای توپلومون بوتونلویونو ایلگیلندیره بیلیر. بو ایلگیلنمک بلکه یاشاییشین ایلک چاغلاریندان بئله اولوب. بو گون هر بیر نسنهنی ساتماق اوچون بو آداملارین ان چوخ سئویلنلرینی، نسنهلری ساتماغا قوللانیرلار.
یوخاریدا یازدیغیم سؤزلری من دئمهدن ده هر کس بیلیر. سؤزون دوشونمهلی یئری بو دور؛ کیملر، نئجه، ساییلان شخصلره چئوریلیرلر؟ بونلارین آنادان دوغما باجاریقلاری دیرمی، یوخسا باشقا ندنلر ساییلانلاری سایدیرا بیلیر؟
قارانلیقدا قارانلیغا گؤزو آلیشیب گؤرن اینسان
قارانلیقدا گؤزون آچان اینسان، قارانلیغا گؤزو آلیشدیقدا بیر شئیلری گؤره بیلیر. بو آدام ایشیق گؤرمهسه، گون گؤرمهسه ائله بیلر دونیادا ان یاخشی گؤرن اینساندیر. بو کی ایشیق نهقدر اولسا اینسان لاپ یاخشی گؤره بیلر، او دا بیر حددن آرتیق اولمامالیدیر، یوخسا یئنیدن قارانلیق اؤلکهسینه قایتارار، آنجاق بو دؤنه گؤزده ایشیق اولماز کی قارانلیغا آلیشسین.
اینسانلار قارانلیقدا گؤز آچسالار. قارانلیغا آلیشا بیلرلر، آنجاق ائله رنگلردن قارا-آغدان سونرا هئچ نه آییرد ائلهیهنمزلر. آغ-قارا گؤررلر. چوخ ایشیقدان گؤزلرینین ایشیقلارین ایتیرسهلر بیر دؤنه داها گؤرنمزلر هله قالسین آغ-قارا گؤرمکلری.
گئنیش باخمالیییق
یان-یؤورهمیزده اولوب-کئچن بوتون اولایلار، وارلیقلار، نسنهلر و ... چئشیتلی آچیلاردان باخیلیر. هرکس گؤردویونه اینانیب، اونلاری آچیقلاماقدا اینادیقلارینین اوستلرینده دیرنیب، بیر آددیم دالی چکیلمیر. بئله بیر گؤروشلرین اوستلرینده سرت دایانماق سون اونایللیکلرده چوخ آزالیب. دونیادا باشقا گؤروشده اولانلاری دا گؤرمکایستهینلر چوخالیب. هر نهیه آغ-قارا باخماقدان دونیا اوزاقلاشماغا چالیشیر. البت بو اوزاقلاشماق اینانجلاریندان اوزاقلاشماق دئمکدئییل. باشقا یؤنلری نظره آلاراق اؤزلری گؤردوکلری آچینی یایماغا چالیشیرلار.
بو سورهج فیکیر یارانان یئرلرده اولوب، آنجاق اوچونجو دونیانین فیکری آلانلارا گئج قاتیلماقلاریندان اؤترو، سورونلارین اوستونده چئورهلی باخماقلار دا آز اولوب. داها دوغروسو چئورهلی باخمایانلار آز اولوبلار. اونا گؤره ده هر کس باشقاسینی اونون گؤروشونده اولمادیقدا اینسانلیق دوشمانیکیمی او آداما توخونوب.
آغ-قارا گؤروشلر دالیسی توتولوب. گئنیش باخماق سؤزو اورتایا گلسهده بئیینلرین گئنیش باخماغا چیخارلاری اولماییب.