"بایاغی‌لاشماق" سؤزجویونو یادیرقامیشدیم، یوخسا ائشیتمه‌میشدیم، بیلمیرم (آخی منیم بئینیمده سؤزجوک‌لر آیاق دؤیورلر). آنجاق هر نه ایدی، بو سؤز به‌تر کئشیمه یاتدی. "بایاغی‌لاشماق" آیاغا دوشمک آنلامیندادیر.
هر قونو، سؤز، اولای ایلک باخیلدیقدا، ماراقلی نظره گلر. اولای‌لار، سؤزلر، قونو‌لار، اینسان‌لار ماراقلی اولدوق‌لارینی تاپیلماز، یا بول اولمادیق‌لاری سوره‌جده ساخلایارلار. بول‌لاشان‌لارا بیردن ماراق آرتیب، زیروه‌یه قووزانیب، سورادا یئنر.
بئینیمیزده اولان‌لاری باشقالارینا چاتدیرماق، یا باشقالارینا آنلاتماق، چاتدیرا بیلمه‌دی‌ییمیز قدر چتین اولا بیلر. گونون آخینیندا اولمایان سؤزلر، آخینلاری گوندمده اولان بئیین‌لرده اوتورا بیلمه‌یه‌جک‌لر. گونده‌مه آلیشان‌لار گونده‌مدن اولمایان‌لاری آلماق اوچون زورلانیرلار. .
بئیین‌لرده اولمایان‌لار بایاغی‌لاشمادیق‌لاری زامانا دک، گئنه-بول یاییلمایاجاق‌لار. بایاغی‌لاشدیرما، سؤزلری قالیبه سالما‌قلا اولا بیلر. قالیبه دوشن بئیین‌لر، قالیب اؤلچوسونده اولان‌لاری گؤرمک زوروندا دیرلار. قالیب‌دن ائشیکده، کسین‌لیک‌له آلینماز اولورلار. آمما بو قالیبی سیندیرماغا، قالیبی سیندیران دوشونجه قایناق‌لاری گره‌کیر!!! دوشونجه قایناق‌لاریمیز، ایسته‌مه‌دن مئدیا اولوب‌دیر. مئدیا اولماسا دا مئدیا یؤنلندیریب.
قارسیز، قاری‌سیز چیلله یولدادیر. چیلله، تکجه گئجه‌لرین چوخ اوزانلادیغی آنلامینی داشیمیر. چیلله قیشین، سویوغون، کوله‌یین، اؤلومون آنلامینی اؤز ایچینده داشی‌ییر. چیلله‌نی یئنمک اوچون، بو گئجه‌نی اویاق قالماق‌لا، آیاقدان سالارمیش‌لار. اوزانلایان گئجه‌لر قورتولماق بیلمزمیش‌لر. یانلیش دوشونمه‌یین گئجه‌لرین اوزونلوغوندان آزالماییب! اوزونلوق یئرینده دیر. چیلله گئجه، ائلین، قوهومون، طایفانین بؤیویونون ائوی، گنج‌لرین قوناق ائدرمیش‌لر.
ایندی گئجه‌نی اویاق قالماق چوخ دا چتین ده‌ییل! چوخ واقت‌لار آدام اویاق قالماغا واقت آز گتیریر. گئجه یاریلمامیش یاتیلمیر! بیزی اویاق ساخلایان، بیر بوللو باخمالی(!)، قولاق آسمالی(!)، اوخومالی(!)، دوشونمه‌لی(!!!!!) قونو واردیر. یئتر بیر تیلویزیون یا دا بیلگی‌سایار الیمیزده اولا. بیلمه‌یه‌جه‌ییک چیلله هاردان گلدی، هاردان گئتدی! نی‌یه گلدی، نی‌یه گئتدی!
بیزلر بیر یاشاکیمی دونیادا اولا بیله‌جه‌ییک. هانسی یاشدا دونیادان آییریلماغی هئچ کیم بیلمه‌یه‌جک. بیزیم طالئعیمیزده اولان‌لارین چوخو، دونیانین یاشامادیق‌لاری یئرینی یاشاماغی دوشونورلر. اؤزلرینده اولمایان یئرلری. اونا گؤره ده، یئنی یئرلری تانیدیق‌لاری آن، یاشاماق مقصدلری چئوریلیر. آمما منه تای، یاشادیق‌لاری سوره‌ج، بیر یئری یاشاماق ایسته‌ین‌لر ده هردن تاپیلیرلار. چوخ یئرلرده یاشاماغیمیزا باخمایاراق، اونلاری یاشامامیش‌کیمی اولوروق. بیلمیرم بلکه ده بیر یئرده ایلیشیب قالمیشیق. کئش کیمی اوزانیب، اوتورولن‌ده یئریمیزه قاییدیریق.
قاییدیریق دئییرم، آمما قاییدیش‌دان خبر اولمور. ایستی‌ییریک قاییداق، قاییدانمیریق. نه بیلیم بلکه قاییتماقدان قورخوروق. قاییتدیقدا اوردا یاشامادیغیمیزدان قورخوروق. بئله‌لیک‌ده هئچ اولماسا سئودیـییمیز یئری، اوردا اولمادیغیمیزدا یاشاییریق. یاشاماقدا قالدیغیمیز یئر، اؤزو ساخلاییب، یوخسا یاشایان‌لاری بیلمیرم. قالماق هر کسه باشقا اولور. بیر چوخ‌لاری اوشاق‌لیق‌دا قالیب، عؤمورلرینین بوتون آنلارینی، اوشاق‌لارینی یاشاماق اوچون، یاشارلار!
اوشاقلیغی یاشاماق کئچمیشی یاشاماق اولور. آمما هردن آدام ایستیر، ایندی‌سین یاشایا. ایندیسی‌نی کئچمیش‌کیمی یوخ، ایندی کیمی یاشایا. بو اوزدن، اؤزونو یاشایا بیلن یئرده یاشامالی اولور. اؤزونو یاشایان یئرده یاشامادیغی سورج، اؤزونه چاتانمیر.
اینسان هردن اؤزونو باشقالاریندا یاشاییر. باشقالاریندا یاشاماق، باشقالاری کیمی اولماق آنلامینا گلمیر. اؤزو یاشامادیق‌لارینی بیرلری یاشاییر. بلکه ده او بیرلری‌ایله، یئرلرینین ده‌ییشمه‌سین ایسته‌سه‌لر ده‌ییشنمه‌یه! بلکه یوخ، کسین‌لیک‌له ده‌ییشن‌مز. ده‌ییشه بیلسه‌یدی چوخدان یاشامیش اولاردی. سئودیـییمیز کیمی یاشاماق،چوخ زامان‌لار یاشایانمادیغیمیز قدر چتین اولور! بو اوزدن بیرلرینی سئویرسن، سئویرسن یاشایانمادیغیمیزی یاشادیق‌لاری اوچون!
یاشایانمادیغیمیزی یاشایان‌لار، خاطیره‌لریمیزین اوچوش یئرینده یاشایاندا، هر نه اوست-اوسته دوشور. اؤزوموزدن چوخ، بیزی یاشایان‌لاری دوشونوروک. اؤز بودره‌مه‌ییمیزی چوخ اؤنملی گؤرموروک، اونلارین دوداق‌لارینین قاچیرتمالاری دا اؤنملی اولور. اؤزلرینی یاشایانماییب، یاشاماق آرزیسیندا اولان‌لار دا تکجه بیر-ایکی اولمورلار، بیر چوخ‌لاری اولور. بو اوزدن یاشایانمایان‌لاری، یاشایان‌لار، یاشاتدیق‌لاری کیمسه‌لرین هامیسینی گؤرمه‌لی اولورلار.
یاشایانمادیغینی تام یاشایان بیرینی تاپماق، هر کسین شانسینا چیخماز. شانس‌لارینا چیخان‌لار، یاشادیق‌لارینی گؤزله‌مه‌لی‌دیرلر. یاشایان‌لاری اولمادیقدا، اؤزلرینی یاشادان بیرلرینی تاپماق چوخ چتین اولاجاق. بلکه ده اولمایاجاق! یاشانمایان‌لار بیر یئره توپلاشدیق‌دا دا، یاشایانمادیق‌لارینی یاشایان بیرین یئرینی دولدورانماییب، یاشایانمایاجاق‌لار!!!
حامام‌لارا گیرنده، سولارین فلکه‌سی‌نی چئویریب، الیمیزی شیرین آلتینا توتوب، سو ایسته‌دیـییمیز ایستی‌لی‌یه یئته‌نده سویون یولونو ده‌ییشیب، اؤزوموز دوشون آلیتا وئریریق. توپلو یاشایان یئرلرین حامام‌لارینده هردن سویو آچاندا، سویو آشاغیدان گؤزله‌دیـییمیز واقت، اوستن باشیمیزا توکولوب، بیزی دیسکیندیریر.ایکی-اوچ دؤنه بئله بیر دوروملا راست‌لاشاندا، حاماما گیرنده الیمیز شیرین آلتیندا، گؤزوموز دوشدا قالیر. داها دوغروسو ایسته‌میر خاپدان تورا دوشک. حامام‌لارین ایچینده، شیرلری ترسه ایشله‌ین حامام‌لار دا تاپیلیر. ائله حامام‌لار اویانیق اولان‌لاری دیسکیندیریر!.
حامام‌لار، آدامی بیر آنلیق دیسکیندیریرلر. یاشام‌دا آدامی بیر عؤمور دیسکیندیرن آنلار تاپیلیر. گؤزوموز اویاق باخیب، قولاغیمیز داشی‌ده‌له‌رک گؤزله‌مه‌دیـییمیز ایش‌لرله اوزله‌شیریک. بو اوزله‌شمه‌لرین ایلکی باشقالارینا بیزه تای گؤزله‌نیلمز اولسالار دا، زامان سووشاراق گؤزله‌نیلمزلر یئرینی آلیشماق‌لارا وئریر. هر یاندان یانیت‌لار، سوچلامالار، دانلامار اینسانا یاغیر. گؤزله‌مه‌دیـیین ایش، گؤرمه‌دیـیین سوچ، آیاغیوا ییخیلیر. باشقالاری بو ایشه آلیشسالار دا، اؤزون آلیشانمیرسان. باشقالارینین یانیت‌لارینا یانیت وئرمه‌لی اولارسان. دانلاماق‌لاردان، سوچلاماق‌لاردان قورتولماغا چالیشاراق، دورومووا آلیشیرسان. ایسته‌مه‌دیـیین دورومو ساوونورسان. دیسکینمه‌لرین آرتیر. دیسکینمه‌لر دومسوک‌له‌مه‌لره چئوریلیر. آیاغیوین آلتین گؤزلویورسن، گؤیدن بیر شئی دوشور. گؤیه باخیرسان، آیاغین دولاشیر. هئچ بیری اولمایاندا، یاندان بیری بؤیرووو باسیر. الیوی آچیرسان، بیرینین بؤیرونه باسیرسان!