داش قاپی
دوشوندوکلریمین پارچالارینی هردن ایستهدیـییم کیمی یازیرام
داش قاپی
دوشوندوکلریمین پارچالارینی هردن ایستهدیـییم کیمی یازیرام
دویمازلار
دادآلما، آلا بیلسک، یاددان چیخماز آن اولار. تانیمادیغیمیز تاملاری داددیغیمیزدا، کئشیمیزه یاتسا، یادیمیزدان چیخماییب، بیر یئریمیزده ییغیشیب قالاجاق. یئمک اولسا خاطیرلادیقجا، آغزیمیز سولاناجاق. ائشتدیـییمیز بیر ماهنی، سؤز، سس قولاغیمیزی چینلاداجاق. گزمکلر، گزیشمهیه هوسلندیرهجک. سؤزون قیساسی، گؤیلوموزدان تیکرارلانماسی کئچهجک.
دادی، داماغیزدا قالانلاری، داماغیمیزدا ساخلاماق ایستیییریکسه، هردن دادمالیییق. آما بیزیم گؤزوموز دویمور. او قدر دادیریق، دادی دادلیقدان چیخاریریق. بلکه ده تیکرارلانمایین هوهسی دادلی اولور، تیکرارلاندیقدا دادی قاچیر.
بیر زامانلار ائشیدیب، گؤروب، یئـییب، گئییب، اوخویوب، باخدیقلاریمیز سینیرلی اولوردو. آمما ایندی هئچ نه بیزه یئتمیر. هر نهیه اومساغیق دئیهسن. گؤزوموز آچیلیب، گؤزون اؤزللییی دویمازلیق دیر.
آیری یئرلیلشمه
"آیری یئرلیلشمیشیک یوخسا یوخ؟" سورغوسونا، سیزین جاوابینیز نه اولاجاق بیلمیرم. اؤزگهلشمک، قالدیغیمیز یئرله اوزاقلیق-یاخینلیغیمیزا گؤره فرقلهنیر. دونیادا تکجه بیز اؤزگهلشمیشیک یوخسا، هر کسین باشینا گلن اولوب! جاوابینی هرکسدن سوروشدوقدا آلا بیلهریک. آیری یئرلیلشدیرن دوروموموز اولوب. زامان بیزی گؤزلهمیر، یولون گئدیر. دونیادان اوزاق دوشدویوموزه اینانانلارین تپگیلری نئچه جور اولور.
بیرلری، دونیانین ایرهلیلهمهسین اؤزوموزدن بیلیب، اینسانلارین فرقلی اولدوقلارینی دوشونمویوب، الده اولونان هر بیر وارلیغی منیمسهییب. ایرهلیلهمهلر کیمین آدینا اولور اولسون، سونوندا فایدالانان هر بیر کسین اولاجاغینی دوشونوب، فایدالاندیقلارینی یئترلی بیلیرلر. بئلهلر، اؤزلرینی گؤردوکلری اوچون(قیسا مودتلی اولاراق اؤزلرینی دوشونورلر، جاوانلیق کئچندن سونرا غریبسهییرلر، یالقیزلاییرلار.)، گرهکن هر بیر یئره داشینیرلار. اونلار چؤرک هر یئردن چیخسا وطن اورادیر دوشونورلر، داها دوغروسو وطنسیزلییی، وطنین سوروملولوغوندان قاچیب، باشقالارین وطنلرینده، یاشایا بیلدیکلری قدر یاشاییرلار.
باشقالاری ایرهلیلهمهیی اؤزگهلرینکی بیلیب، اونلارا بنزهمک اوچون، گرهکن هر بیر دهییشیمه قاتیلیرلار. ائولرینده اؤزگهلهشیرلر. اؤزگهلهشمهلرینه باخمایاراق، دونیانین گلیشمهسینده پایلاری اولمور. یاشام طرزلری، دوشونجه طرزلری، دونیا گؤروشلرینی دهییشدیریرلر، آما گرهکن سونوجو آلا بیلمیرلر. بونلار وطنلرینه، باشقا بیر وطن اولماق اوچون چالیشیرلار.
بیرلری ده وار، اؤزگهلشمهدن، دونیانین ایرهلیلهمهیینه، اینانیب، گلیشمهیه یول آختاریرلار. باشقالارین دئنهییملرینی گؤز اؤنونه آلاراق، آددیم آتیرلار. اونلار وطنلرینی اؤز آخیملاریندا ایرهلیلهمهیینی یاشاتماق ایستهییرلر. نه قدر اوغور قازانماقلاری، هانسی گؤروشون اوستون اولدوغوندان آسیلی اولور.
برکه بوشا دوشمک، گؤروشلری یئرینه اوتوردور
بئینیمیزده بیر شئیلری قوروروق، قوردوقلاریمیزا دایاناراق دهیرلندیریب، آتدیم آتیریق. اولدوغوموز یئری دونیانین اورتاسی بیلیب، اولمازلاری اولدوروروق. دهییشیکلری اؤزوموز ایستیییریک، ایستهدیـییمیزی آغلیمیزجا یئرینده اوتوردوروق. یئرینده اوتورموش کیمی داورانماغا باشلاییریق. یارغیلاماغیمیز بئله دوشوندویوموز یئرله، دورومدان آسیلی اولور. اینسان بئینینده بیر ایشی قوردوقدا ایشه باشلاییر.
بئینیمیزده قوردوقلاریمیزا ایناناراق ایشه گیریشیریک. آددیم آتدیقجا، گؤزلهمهدیکلریمیزله اوزلهشیریک. یئرینده اوتورموشلار، سانکی هئچ زامان اوردا اولماییبلار. هر نه لاخلاییر. گؤردوکلریمیزه اینانمیریق. قوردوغوموز اورتام، اورتاملیقدان چیخیر. ایشی زورلا یئرینه قویماق ایستیریک، زورلا یئرینه گئتمیر. فتلر ده ایشه گلمیر. یئریمیزدن اوینامیشا چئوریلیریک. زامانا تاپشیریرسان، هر واقت توولا گئدن زامان، چوخ یاواشیر. زامانلا اوز-اوزه دایانیرسان. یورولورسان، اوتوروب تازاشدان باخیرسان، هر نهیی کئچمیشدن فرقلی گؤرورسن. یئرلی یئرینده گؤرورسن. ائشیتدیکلریوی بیر یانا بوراخیب، گؤردوکلریوه اینانیرسان. سؤزلرین، سؤز اولدوقلارینا اینانیرسان!
گؤرونن طالئعیمیزه ایکیلیک یازیلیب
دونیانین یئنی ایلیندن کئچن ایل یازمیشدیم. عیسی حضرتلرینین دوغوم گونو، تکجه خیریستان دونیاسینین یوخ، بلکه بوتون دونیانین یئنی ایلینه چئوریلیب. خیریستییانلیق دونیاسیندا عیسی حضرتلری دوغولمامیشدان اؤنجه یئنی ایله نئجه گیرردیلر بیلمیرم!(بلکه ده یانیلیرام، یانیلیرامسا منی آیدینلادین).
دونیانین باشقا یئرلرینده، خیریستییانلیق دونیاسیندان سئوای)، اؤزلرینه اؤزل یئنی ایله گیرمهلری وارایدی. تورکلر، چینلیلر، ژاپونیالیلار، عربلر، یهودلار اؤزلرینه اؤزل یئنی ایللری وارایدی. ایسلام دونیاسینین ایل سایما تاریخی، محمد حضرتلرینین دوغوم ایلیندن باشلانسا دا، یئنی ایلی دهییشیلمهدی. عربلر، اؤز یئنی ایللرینی(آی ایلی)، تورکلرله، فارسلار اؤز یئنی ایللرینی(گونش ایلی) توتدولار. تکجه تاریخی ایل ساییسینی دهییشدیردیلر.
چینلیلرله، ژاپونلولار دا، اؤز یئنی ایللرینی قوتلویورلار. آنجاق بو آرادا، بیر سیرا اؤلکهلر اؤزلرینی دونیالا اویغونلاشدیرسین دئیه، دونیادا حاکیم اولان، ایلی اؤزلرینه یئنی ایل سئچدیلر. کئمیشلرده موسلمان اؤلکهلرین سیمگهسی اولان تورکیه، دونیالا آیاقلاشمانین یوللاریندان بیرینی دونیادا حاکیم اولانلارلا عئینیلشمهیی سئچدی. تورکیه اوندان اؤنجه ایسلام سیمگهسی اولدوغو اوچون، ایسلاملا اویغونلاشمیشدی. بو اوزدن تورکلره عایید اولان دبلرین یئرینه ایسلام دبلرینی یاشاتمیشدی. داها دوغروسو، تورکیه هر زامان دونیالاشماغی سئویر، دوینالاشدیغی سورهجده ده، اؤزوندن ایتیردیکلرینی چوخ اؤنمسهمیر(بلکه ده تکجه بیر گوجلو تورک دوولتینین آیاق اوسته قالما ندنی ائله بو دور!).
هدفیم بوردا تورکیهنی الهشدیرمک دهییل. مقصد تورکیهدهکی گونئی آذربایجانلیلاردیر. تورکیهده اولدوقدا تورکیهنین بوتون اؤزللیکلرینی منیمسهییرلر. بو اوزدن، اؤزلرینه ایکی دؤنه یئنی ایل توتورلار. البت، اوردا اولمادیغیم اوچون، کسینلیکله یولداشلاری دوشونه بیلمیرم. آمما گؤرونن طالئعیمیزه ایکیلیک یازیلیب (ایکی دیللیلیک، ایکی یئنی ایللیلیک، ایکی یئرلیلیک، ایکی آغیز"لهجه"لیق).
گئتمک، قالماق
قالماق؛ خوشوموز گلن یئر، واقت، دورومدا اولور. ایستیریک اولدوغوموز یئرده قالاق. اؤزوموزه خوش کئچیردیریک. زامانی دایاندیرا بیلسک، قالا بیلهریک. قالماغیمیز، بیر یئره کیمی اؤز الیمیزده اولور. اوندان اویانا، بیزلیکدن چیخیر. قالماغیمیز اوچون بیرلرینی قاندیرمالیییق. ائله یئرلر ده وار، قاندیرماق یئترلی اولمور. تکجه یول گئتمکدیر.
گئتمک؛ قالمادیغیمیزدا اولور. قالماقدان یورولدوغوموزدا اولور. بیر یئرده دایانماقدان یورولوروق، باش گؤتوروروک گئدک، هارا بیلمیریک. تکجه بیلدیـییمیز گئتمهییمیز دیر. قالماقدان یورولدوغوموزدا گئتدیییمیز یئری بیلمهدیـییمیزه باخمایاراق، گئتمهیی سئویریک. گئتمکدن سؤز سالیریق، بلکه بیری دئیه گئتمه. بیری دئمیر، هامی بیلیر گئتمهلیییک. قالماغیمیزا سؤز آلانمیریق.