خانیم‌لاردان دانیشماق، ایندی‌لیک‌ده دب(سیز اوخویون مود) اولوب. خانیم‌لارین حؤرمه‌تینی قازانماق اوچون، خانیم‌لار ایسته‌دیک‌لری کیمی خانیم‌لاردان دانیشیرلار. دانیشان‌لارین دانیشدیق‌لارینا اینانما‌لارینی قانیت‌لاماق اوچون، منیم الیمده بیر آراج یوخدو. هئچ کیمه اؤلچوم اولماسا، اؤزومو اؤز ایچیمده بیر اؤلچوم واردیر.
یاخین‌لاریمدا، کیشی‌لر ساییندا قادین‌لار واردیر. قادین‌لارا باخیرام، هامیدان یاخین‌لاری آنام، باجیم، خانیمیم دیر. آنامین یئرینده اولماق ایستردیم، کسین‌لیک جاوابیم یوخ دیر. آنام گؤردوک‌لرینی گؤرمزدیم. آنامین گؤردوک‌لری موحبت-ین سونودور. باجی‌لاریما باخیرام، اونلارین دا موحبت‌لری باشقا دیر. اونلارین گؤردوک‌لرینی گؤرمک‌ده زورلاندیغیمی دوشونورم. خانیمیما گلنده دورومو بیر آز فرقلی دیر. ار-آروادلیق پوزولا بیلر، آما باجی-قارداش‌لیق، آنا-بالالیق هئچ زامان پوزولماز. آنجاق اونونلا بئله، گئنه خانیمین یئرینده اولماغی ایسته‌مه‌رم(بونا باخمایاراق، چئوره‌میزده‌کی‌لر خانیمین دورومونو اولاغان‌اوستو یاخشی گؤرورلر!).
لاپ یاخینیم اولان خانیم‌لارین دا یئرینده اولماق ایسته‌مه‌ین من، خانیم‌لارین یئرینه دوشونن‌میرم، اونلاری باشا دوشن‌میرم. اونا گؤره، خانیم‌لاردان دانیشاندا کیشی آچیسیندان باخیرام و باخاجایام. خانیم‌لار، اؤز یئرلرینه اولوب، اؤزلری باخارلار. خانیم‌لارین یئرینه باخان کیشی‌لر، خانیم‌لارین گؤیول‌لارین آلماق ایستی‌ییرلر، یوخسا ضیـیالی‌لیق‌لارین اوزه چکیرلر، قالمیشام!!!
زاتیمیزدا اؤزوموزو حاقلی بیلمک واردیر. من باخدیـغیم آچی، اؤزوم اوچون حاق آچیسی‌دیر. تکجه منیم اوچون یوخ، هر کس اوچون ائله‌دیر. ایستیرم، باخیش آچیمی ده‌ییشم، اؤزومو اؤزگه‌لرین یئرینه قویام. کیمین یئرینه قویا بیله‌رم اؤزومو! هر کیمله سورون یاشاییرام اونون یئرینه قویمالی‌یام. باشلانیشدا یاخین‌لاریمی سئچمه‌لی‌یم. هره‌سی‌ایله بیر فرقیم واردیر. سورونوم یوخ ساییلار. یوخ ساییلان سورونلارین هر بیری گله‌جک‌ده بؤیوک بیر سورونا چئوریله بیلر. دوشوندویومده قورخورام! سورون چیخاران، چیخاردار!
سورون‌لاری آزالتماق اوچون، اؤزومو باشقالارین یئرینه قویمالی‌یام، اونلار باخان آچیدان باخمالی‌یام. باشقالارینین آچیسیندان اونلار کیمی باخماق، هئچ زامان اولمایاجاق دیر. آنجاق هئچ اولماسا، باشقالارینی گؤرموش اولارام. من‌لی‌ییم، مندن سونرا بیرینی گؤره بیلمه‌یی ده‌نه‌یر!
"آریا"-نی سوی گؤرمک، هانسی بیلگینین گؤروشودو، او بیر سؤزدور. نئجه آریا او قدر گئنیش چئشیت‌لی‌دیر باشقا بیر سؤز، دیلچی‌لر نئجه دیل‌لرین قوهوم‌لوغون گؤردولر، باشقا بیر سؤز. آرادا، دانیشیلمایان دیل‌لری (فارسی باستان!!!) کیم‌دن، هاردان اؤیرندیلر، بو دا بیر باشقا سؤز. آریاچیلیق، اوروپادان باشلانیب، ایراندا یاشاماغی دا باشقا بیر سؤزدور.
آریاچیلیق، کیمین اوچون یاراندیغینی، ایندی‌لیک‌ده یاخشی بیلمک اولور. باشقا بیر مسئله، بیزلرین بو آریاچیلیغا اینانماغیمیز دیر. دیلچی‌لر، تاریخچی‌لر، سیاست‌چی‌لر، توپلومچو‌لار هامی نئجه موطلق ایناندیلار. بو آراردا بوتون آریا آدلانان اؤلکه‌لر میللت اولوب، باشقالاری یاریم میللت، ائتنیک، بربر، وحشی، کرتن‌که‌له یئیه‌ن اولدوق‌لاری داها آرتیق ماراقلی دیر. آریالی‌لار، بیلگی گلیشدیک‌جه، تمدون‌لری چوخ کئچمیش‌له‌ره قاییدیر.
هردن آریالی‌لاردان باشقالارین یئرلرینی آختاراندا، دولاشیغا دوشوروک. آریالی‌لار سیبری‌دن گلیب، اورتا دوغو، گونئی آسیا، آوروپادا یئرلشدیلر. اونونلا بیرلیک‌ده گئنه، گلمه‌میشدن نئچه مین اؤنجه، بؤیوک بیر تمدون یاراتمیشدی‌لار. آریالی اولمایان‌لار هاردان گلیب‌لر، آللاه بیلیر، یئرلری هارادیر آللاه بیلیر.
بیزه دئسه‌لر آذربایجانی تانیتدیرین. ذئهنیمیزه گلن، آذربایجانین، هاواسیندان(هاواسی‌نین یاخشی‌لیغیندان)، گؤرمه‌لی یئرلریندن، قدیمی بینالاریندان، یئمک‌لریندن، دب‌لریندن، موسیقی‌سیندن، اویناماق‌لاریندان، دوشونجه طرزیندن، تانینمیش آدام‌لاریندان دانیشاریق. سایدیق‌لاریمیزین نئچه‌سی‌نی دوز تانیت‌دیراریق قالسین یئرینده، دئسه‌لر بیر آذربایجانلی اولاراق، دئدیک‌لرینیزدن، نئچه‌سی‌نی بلگه‌لرله قانیت‌لایا بیلرسیز، جاوابیمیز اؤزوموزه بللی اولمالی‌دیر(بیردن آدام ال-آیاغینی ایتیریر، چابالاییر بیر شئی تاپا).
سالیق وئردیک‌لریمیزین ایچینده، اونلولر یئرله‌شیرلر. آذربایجانلی اونلولرین، هانسی‌نی سئچمه‌ییمیز دارتیشیلان قونو اولا بیلر!
آذربایجانین گؤرمه‌لی یئرله‌رینین هانسی‌نا اؤزوموزون گئتدیـییمیزی سوروشسالار، چوخ‌لاری قیزارا بیلرلر. آذربایجانی تانیت‌دیرماغا هئچ اولماسا اؤزوموزون تانیماغیمیز گرک‌لی‌دیر.
مودئرنیته نه اولدوغونو بیری ایسته‌سه بیله اینتئرنئت بیر مودئرنیته(Modernity) وورماغی یئترلی دیر. مودئرنیتهنین ائلئمان‌لاریلا مودئرنیته‌نیته تانی‌یا بیلر. بیزیم پایی‌میزی مودئرنیته‌ده سوروشاندا، هئچ اولماسا الده ائدیلن هر بیر نسنه‌دن فایدالانما دیر. یادیمیزدان چیخماسین بیز هله‌لیک بوتون اورون‌لرین ایشله‌ده‌‌نی‌ییک. آمما مودئرنیته‌‌یه ندن اولان‌لاری، بیز باشیمیزدان سووموشوق یوخسا یوخ، او دا بیزی ایلگی‌لندیرمیر. دوغولدوغوموز زامان‌دان، مودئرنیته‌نی یاشاماساق بئله مودئرنیتهنین ایشیغیندا یاشامیشیق.
مودئرن‌لی‌یی ایچ ائله‌مه‌دن پوست‌مودئرن‌لیک قاپی‌لاری دؤیدو. پوستمودئرنلییی یاشاماساق دا، مودئرن‌لی‌یه تای کؤلگه‌سینده یاشاییریق. مودئرن‌لیک، ها بئله پوست‌مودئرن‌لیک(Postmodernity)ایسته‌مه‌دن قولاق‌لاریمیزا چاتیب.
بیزلرین ایچینده بیرلری اؤزلرینی مودئرن، بیرلری پوست‌مودئرن بیلیر. هر کس اؤزونو هر نه بیلیر، هئچ کیمی ایلگی‌لندیرمز. آنجاق مودئرن، پوست‌مودئرن بیلیب، اونلاری سس‌لندیریب، گؤروش آرتیران‌لار، اؤزلری یاشاماق ایسته‌دیک‌ده، یاشاماغا زورلانیرلار.
اینسان بیر قونودا، بیر یؤندن آخسادیق‌دا حیس اولونمور، آنجاق بوتون یؤنلرده آخسا‌دیغی واقت، اؤزونو آیاق اوسته ساخلایانمیر. هر نه جور اؤتورورسن یئره سه‌ره‌له‌نیر( بو یازیدان بیر شئی باشا دوشوب-دوشمه‌دیـییز مودئرن‌لیک‌له پوستمودئرنلییی نئجه باشا دوشدویوزدن آسیلی دیر!!!).