داش قاپی
دوشوندوک‌لریمین پارچالارینی هردن ایسته‌دیـییم کیمی یازیرامداش قاپی
دوشوندوک‌لریمین پارچالارینی هردن ایسته‌دیـییم کیمی یازیرامیازمادیقلارینی یازمالی‌ییق
بیزه گؤره بیرلری یازیب‌لار. یازیلارین نه قدر دوز، یالان اولدوغو، یازانلارینین بوینونا. بویونلارینا باخیرام، باتیب یئره، یالان‌لار اغیر اولدوقلاری اوچون بیرطرفلی باتیب. اوزدن ایراق، گ...ت باش اولوب‌لار. یازیلارین باشلارینا باشماق، آیاق‌لارینا پاپاق قویولوب! هر طرفدن گیردیک‌‌ده ترسه گیریریک، ترسه گئدیریک. بیردن گؤروروک، اوهو نم هایانداییق. هردن ایزلری ایتیریب، یولا دؤنه‌نه تک خئیلک اؤز باشیمیزا فیرلانیریق.
یازیلار سالیق وئردیک‌ده، یولوموز شوخوملوغا دوشور، شوخوملوق یاش اولاندا، پالچیق اولوب، باتیب قالیریق. باشماق‌لاریمیز آغیرلاشیب، باشیمیزی سوخور پالچیغا، هردن ده سئل یولا دوشور، اولدوغوموز یئردن بیزی گؤتورور، بوغولماساق اؤزگه‌لرین یئرلرینده سئلدن آلینیریق.
هر دورومدا بیزیم ایزلریمیز اولور، ایزلریمیزی اؤرت-باسیر ائله‌سه‌لر بئله، گئنه ایزیمیزی بلله‌سک هئچ اولماسا، اؤزگه‌لرین یئرینه دوشمه‌ریک، سئل گلنده بیر بوداغا باغلانیب قالاریق. سئلدن قورتولماق اوچون، باشقالارین بیزه یازمادیق‌لارینی یازمالی‌ییق!!!!!
سینیرلار، جیزیق‌لار
اؤزوموزه جیزیق چکنده، اؤزوموزدن باشقاسی بیزیم ایزنیمیز اولمادان، گیریلمی‌‌ین جیزیق چَکه‌ریک. آمما بو کی بیزیم جیزیغیمیزا ایسته‌ین گیریب، چیخا، چه‌کیلن جیزیق‌دان آسیلی اولمور. جیزیق قورویان‌لا، جیزیغی پوزان‌لاردان آسیلی اولور.
بو کی جیزیغین هاردان اولونسا قورونا بیلر، چوخ بیلینمز. البت بونو دا دئمه‌لی‌ییک، جیزیق گوجلشدی‌ییمیز، گوجله‌ره چکیریک. گوجله‌شه بیلمه‌دی‌ییمیزلری ده، دیلی‌ایله اوزاقدا ساخلاشدیریریق. گئنه قاییتدیم، گوجه. اینانین اؤز الیمده ده‌ییل، گوج هر بیر سینیری آشا بیلن نسنه دیر.
من اؤزوموزه باخدیق‌دا جیزیق گؤره بیلمیرم. آمما نئجه دئییب‌لر، هر زامان دا جیزیق‌لاری آیاق‌لاییب، سینیرلاری آشمایین جومله‌لری قولاغیمیزین سیرقاسی اولوب. بیز ده، ایستر ایسته‌مز بیزه توشلاشان هر کسدن، سینیرلاریلا، جیزیق‌لاریمیزی ایسته‌ییب، چالیشمیشیق گؤزلویک. آمما جیزیق چکن‌له، سینیر بللندیرن‌لر بیر اولمادیغینا گؤره، هردن بیرینین سینیرینی، باشقاسینین سینیرینا گیریر، البت بو سینیرلار بیز اولان یئرلرده اولور. اونا گؤره، سینیرلارین پوزولماسینین باش آغریسی بیزه قالیر.
باشقالاری بیزیم سینیرلاریمیزی پوزاندا(بیز دئدیک‌ده، بیزی چیزیلن سینیرلاری دئییرم، هره بیرین چیزیب)، پوزان‌لارین سینیرلارینی پوزماق، گؤیلومدان کئچیر. آمما باخیرام گؤرورم، هر سینیری پوزسام، اونلارین سینیرینا چاتانمایاجایام. یئر قالیب، سینیرلاری اولمویا! آمما نئینک، دئییرم بئینیمده چه‌که‌رم. باشلاییرام چکمه‌یه گؤرورم، بئینیمده بئله اونلارین سینیرلارینی یاخین‌لاشانمیرام!
یاخشی‌لیغیمیزی ایسته‌ین‌لر
اوشاقلیق‌دان بیزیم یاخشی‌لیغیمیزی ایسته‌ین بیرلری اولوب. آنا آتادان توتوب، بؤیوک قارداش-باجی، اؤیرتمنه دک. بیزیم یاخشی‌لیغیمیزی ایسته‌ین‌لرین اوره‌ک‌لری یانیب، بیزه تاپشیریق‌لار وئریرلر. اؤیوت وئریرلر. بؤیوک‌لردن سؤز ائشیتمک بیزیم توپلوموموزدا بیر یاخشی دب دیر، بیز ده ائشیدیریک. آمما بو اؤیوت‌لر هردن، اؤیوت‌لوکدن کئچیب، حاکیم‌لی‌یه چاتیر.
اوشاق بؤیودوکجه، یئنی دوروملارلا تانیش اولور. یئنی دوروملارین بیرسیراسیلا اؤزو تک ایلگی‌له‌نیر. ایلگی‌لندیک‌لرینده اؤزونون ایستیقلالی اولمویان واقتا دک، اؤز آیاغینین اوستونده دورا بیلمه‌یه‌جک. اؤزو آددیم آتماقدان قورخاجاق. یاواش-یاواش اؤزل سئچیم‌لرینه یاخین‌لاشاجاق. اوندا دیر کی اؤز سئچدی‌یی‌له، بؤیوک‌لری سئچدیک‌لرینین آراسیندا فرقلیک‌لر اورتایا چیخاجاق. اؤیوت وئریب، یاخشی‌لیغیمیزی ایسته‌ین‌لر، اونلارین سئچدیک‌لرینی سئچمه‌دیک‌ده، ال‌لریندن گله‌نی اسیرگه‌مه‌یه‌جک‌لر.
اینسان‌لار نه قدر دموکورات اولورلار اولسون‌لار، قودرت قایناغینا چئوریلن زامان، گؤروش‌لرینی تام بیلیب، فرقلی سئچیم‌لری انگل‌له‌مه‌یه چالیشاجاق‌لار. اوندا دیر کی آرا قاریشیب، مسسب ایته‌جک. سؤز-سؤزون دالیسیجا گله‌جک، او بونا بو اونا. بیز اونلارا، اونلار بیزه. سونوندا دا یاخشی‌لیغیمیزی ایسته‌ین‌لر، بیزی ایسته‌مه‌یه‌نه چئوریله‌جک‌لر.
یاخشی‌لیغیمیزی ایسته‌ین‌لرین یادینا بیزه ائله‌دیک‌لری یاخشی‌لیق‌لار دوشه‌جک، دونیانین وافاسی اولمادیغینی تئز-تئز دئییب، دئییب دوراجاق‌لار. اَمک‌دن دانیشیب، بیزی آدام ائله‌دیک‌لرینی دوشونه‌جک‌لر، بیزیم ده "نابئه به حرام"(مام بیلمز، حق سای بیلمز) اولدوغوموزو هر کسه دئیه‌جک‌لر.
یاخشی‌لیغا اوغرایان‌لار ایسه، زیندگانلیق‌لارینداکی پولچوک‌لری یادلارینا سالاجاق‌لار، هر بیر اؤزلری گؤرمه‌دیک‌لری ایشی، یاخشی‌لیغی ایسته‌ین‌لرین بویونلارینا ییخاجاق‌لار. اوتوروب-دوروب اونلارین یوخاری یئرلرده اولمادیق‌لارینین ندنینی یاخشی‌لیق‌لارینی ایسته‌ین‌لری بیله‌جک‌لر.
یاخشی‌سی بودور، یاخشی‌لیغی ایسته‌ین‌لر بو باشدا، یاخشی‌لیغی بوش توتسون‌لار. برکی‌ینده، قوپماز اولورلار.
منه تای ایکی طرفده اولان‌لار، گؤرون نئجه اولارلار!.
گؤل قورتولوب دریا اولاجاق
اوشاقلیقدا "گؤل" دئینده، کندیمیزین اَته‌یینده اولان گؤلو دوشونردیم. گؤل بالاجا گؤل ایدی. ولدیان داغلارینین(ولدیان داغلاری اورمو دَنیزینه یاخین دیر.) باتی اته‌یینده اولان چئشمه‌کندینین کؤوشنین قورتولاجاغی یئرده، ارسی، هه‌شه‌ریت ایله نَوایی کندلرینین آراسیندایدی. خوی چوخورونا آشان سون تپه‌لرین آراسیندا دا دئیه بیله‌ریک. چئشمه کندینین، یئرلری وئریملی اؤزو ده بول بولاقلی ایدی. کندین هر یئرینده بولاق وار ایدی. بولاق‌لارین سویو ایسه شیرین، ایشمه‌لی سویودی.
گؤلدن اوزاقلاشمی‌یالیم، او گؤل شور گؤل ایدی. یان-یؤوره کندلرله، خویدان گلیب اوردا چیمردیلر. کندین اَکین یئرلرینین سویو ایسه، قاراسودان گَلَرمیش. موسووقولو کندیندن بندی باغلاییب، سویو یئرلره گتیرردیلر. من او آرخدان سو گتیرمه‌یی گؤرمه‌میشدیم، آنجاق آتام گیل دئییردی، چتین ایش ایمیش. قویولار قازیلاندان سونرا، آرخدان سو گتیرمه کسیلدی. قویولار ایشه دوشن کیمی، شورگؤل ده قورودو. قویولارین سولاری بیریندن سونرا قیجیر دوز اولدولار. وئریملی تورپاق‌لاری یاندیریب، بوزقیرا چئوریلدی‌لر. چولون ساتان کنددن قاچیب، شهرلره یئرله‌شدیلر. هر کس هارادا ایش تاپیردی گئدیردی. کندده قالان‌لار ایسه اَل-آیاق‌سیزلار اولدولار.
کنددن خویا گلن‌لرین ایچینده بیزیم ده عاییله‌میز وارایدی. شؤرگولوموز قوروموشدو، آمما شور دریامیز قالیردی. سالماس بیزه یاخین اولدوغو اوچون،سالماس دریاسی دئییردیک. آرادا اورمو دریاسینا دا گئدیردیک. یادیما گلیر بیرینجی دؤنه اورمو دریاسینا گئتدی‌ک‌ده، دریا دالغالانیردی، داها دوغروسو سالماسی سووشوب گئتمیشدیک، دریانین قوخوسونو سالماسدان چکیردیک. گؤز ایشله‌دیک‌جه گؤی ایدی گؤم گؤی. دریا قورتولان ده‌ییل ایدی دئیه‌سن. دریایا آچیلان هانسی یئر اولدوغو یادیمدا ده‌ییل، آمما هر نه ایدی، اوردا آدام چوخ ایدی. قالاجاق یئرلرده یئر یوخ ایدی. هر کس گولوردو. گؤلو گیریب، چیخیب، گونه‌شه سریلیردی. خانیم‌لارلا آقالارین یئرلری ده آیریدی.
دریا گولوردو، قوناق‌لارینی گولدوروردو. دریایا دوشن، باتمیردی. دریا کیمسه‌نی باتیرمیردی. هردن گؤز-قولاغا دولوب، آجیشدیریردی. بلکه ده دریا اویاریردی. چاراسی بیر خییار ایدی، سورتوردون گؤزه، آجیلیغین آلیردی. چوخ دا دریا دا قالماق اولموردو، دوزلو سو، بیر ده گونش درینی فیریق چیخارداردی.
دریا یولوندا هر یئرده، قویو وورموشدولار. هردن قورخوردوم، اولمویا قویولار دریانی قورودا. آخی بیزیم کندین قویولاری شورگؤلو قوروتموشدو، تورپاق‌لاری یاندیرمیشدی. چولون گؤتورن قاچمیشدی. اوشاق آغلی ایدی، دریا قوروماز ایدی. قویولارین سویو آزالدیقجا اَکین یئرلرینه سو چاتمیردی. باشلامیشدیلار، سولارین قاباغین کسمه‌یه، هر یئرده سویون قاباغین کسیردیلر. سونرا ائشیدیردیک، دریا اورمولا، تبریزی اوزاق سالیب بیر-بیریندن، یاخین‌لاشمالی ایدی‌لار. دریادان کئچیت یول ووروردولار. ایلدن ایله، قورولوق اولوردو. قاباقکی یاغین‌لاردان خبر یوخ ایدی. سولار آزالیردی.
هر کس الیندن گله‌نی دریاداناسیرگه‌میردی. بیری قویو ووروردو، بیری سویو باغلاییردی، بیری تورپاق توکوردو، آللاهین دا یاغینی آزالمیشدی. دریا دؤزوردو. دوزون وئریردی، سویون وئریردی، تورپاغین وئریردی. چؤرک وئریردی، یول وئریردی. آمما دؤزومو قورتولموشدو. یول چکیلمیشدی، سولار کسیلمیشدی، یاغین آزالمیشدی. دریانین جانی قورتولموشدو.
دریامیز گؤل اولموشدو، گؤلوموز قورویوردو. کیم بیلیردی بئله اولاجاغین!!! اولاجاغینی بیلمه‌ین، نئینه‌یه بیلر. تکجه باشینا دؤیر. دیزین دؤیرلر. دئییرلر گؤلدن دوز یاغاجاق، شور سالاجاق، آغ یاخاجاق، یئرلری یاندیریب یاخاجاق. بومب اولاجاق.
یا گؤل قورتولاجاق، دریا اولاجاق. یا دا سیز دئیین، کیمدن اؤجون آلاجاق، کیم قورتولاجاق، کیم قالاجاق.
گؤره‌سن گؤلو کیمقورتاراجاق، کیم قورتاراجاق.
بیر بوتون، بیر چه‌ره‌ک
"بویلاشماق" سؤزجویونو بیز اوشاق اولان زامان‌لار چوخ ایشله‌دردیک. تای-توش‌لاریمیزین آراسیندا بویلاشماق چوخ اولاردی. کیم-کیمدن اوجادیر دئیه، دوراردیق بویلاشاردیق. اوشاق آغیلی نئینه‌مک. تئز بؤیومه‌یه جان آتیردیق. هردن بویلاشماغیمیز تای-توش‌لاریمیزلا یئتمه‌ییب، بؤیوک‌لریمیزله ده بویلاشاردیق. بویلاشماغی اوشاقلیقدا اؤیرندیک. بؤیودوکجه، آنلادیق، بویلاشماق هر نه‌ده اولا بیلر. بویلاشماق، بیر جور زورلاشماق‌ایمیش.
بؤیودویوموزده دونیا خئیلک ده‌ییشمیشدی، اوشاقلیق چاغ‌لاریمیزین بویلاشمالاری گئچرلی دئییل ایدی. هر گون ده‌ییشمه‌یه گؤروروک. بویلاشماق اوچون، چوخ بیلمیرم نه‌له‌ری اؤیرنمه‌لی‌ییک. اؤیره‌نه بیله‌جک‌لریمیزین، بیر سیراسی بَللی اولسا دا، چوخو بَللی اولمور. اونا گؤره، دونیادا بویلاشماغا دوردوغوموزو یاددان چیخاریریق. اؤزوموزو دونیاداکی‌لارین چَره‌یی ده بیلمیریک.
آمما هردن بیزلردن بیری تاپیلیر دونیاداکی‌لارلا بویلاشماق ایسته‌ییر. بویلاشماق ایسته‌ین نه‌یینه گووه‌نیر، بیلمیریک. ایلک گؤروشده گولونج نظره گلسه بئله، یاواش-یاوش بویلاشماق هاواسی‌نی اوندا گؤروروک. اؤزوموزو یاخین‌لاشدیریریق، الیمیزدن گلسه بویلاشماغینا یاردیمچی اولاق. بیلدیک‌لرینی بیزه دئدیک‌ده(نظریمیزه گلیر هر نه وار دئییب، بیر شئی قالماییب)، بیزیم اوندان چوخ بویلاشماقدا چیخارلی اولدوغوموزا اینانیریق. بیزیم بویلاشماغیمیزا ایلک آددیم، بویلاشان‌لا بویلاشدیغیمیز اولور. هر نه‌یی بوراخیب، اونو یئندیرمه‌یه چالیشیریق. بیز بوتون اولوروق.