| ش | ی | د | س | چ | پ | ج |
| 1 | 2 | 3 | 4 | 5 | ||
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 |
کئچن یازیلارین بیرینده ندن دونیایایا گلدیگیمیزین بیلینمه‌دیگین وورغولامیشدیم. دونیایایا گلدیگیمیز اؤز الیمیزده اولماسا دا دونیادا نییه یاشاماغیمیزلا نئجه یاشاماغیمیز اولدوغو قدر اؤز الیمیزده دیر. بونو آرتیرمالی‌یام، گلیب بیلینجه دونیادا نئجه یاشاماق ایستی‌ییریک، عومروموزون اوچدن بیری سووشوب گئدیر. به‌یندیگیمیز یاشاماغی دا سوردورمه‌یه یاتاق‌لارین حاضیر اولمادیق‌لاری اوچون یاتاق‌لاری سورادان حاضیرلاماق دا هم زور هم ده واقت آپاریر. بو آرادا اؤزووو تله‌یه سالیب ائولنسن ده، یاتاق سهل دیر، یاتاغا فیکیرلشمه‌یی ده فیکیرلشنمی‌یه‌جکسن. او دور کی بیر زامان گؤزووو آچدیق‌دا دونیاوی دییشدیرمه‌لی اولاجاق‌سان. ایندی بیزیم یاتاق‌لاریمیز دا حاضیر اولماسا یاخشی یاشاماغی گله‌جک نسیللره حاضیرلامالی‌ییق، ایندی نئجه حاضیرلاماغیمیز دا اؤز بوینوموزا دوشر.
چوخ گؤزل بیر دوشرگه‌ایله(چیزگی فیلم) تانیش اولدوم. بو دوشرگه چیزگی فیلم‌له ایلگی‌لنیر. عئینی زاماندا دوشرگه‌ده گئدن یازیلار ایکی دیلده اینگلیس‌جه بیر ده تورکجه ده یازیلیر. بو دوشرگه‌دن هر کسین خوشلاندیغینی اینانیرام. بو دوشرگه‌نی دولاندیران یولداشیمیزا جان‌ساغلیغی اوزون یاشام آرزیلی‌ییرام.
"گونلوکلریم" دوشرگه‌سینده دئییملریمیز چالینیر باشلیغیندا بیر یازی گئتمیش‌دیر. بو یازیدا بیزیم دئییملریمیزی فارس‌لار چئویریب قوللاندیق‌لارینا توخونموشدو. بئله بیر چئویرمه‌لر چوخ اوزون زامان‌لار تورک کؤکنلی فارسی یازانلارین وریندن اوز وئریب. چئویررمه‌لرین بیر بوللوسو ساوادسیزلیق‌دان ترسه ده چئوریلیب‌لر. اؤرنک اولاراق ناصر منظوری دئمیشکن "صبیرداشینی" "سنگ صبور"-ا، "برکتلرین یئددیسینی" "هفت‌سینه" یانلیش چئویریب.
اوزون سوره بئله بیر یانلیش‌لیق‌لاری فارسلارین بئینینه، ایندی ده فارسلاردان بیزیم بئینیمیزه سوخوشدورور‌لار. البت بئله بیر یانلیش‌لیق‌لار تورکلردن اوز وئریب، یوخسا تورکو بیلن فارسلاردان، اوراسیندا قالمیشام. ایندی‌لیکده تورکو بیلن فارس تانیمادیغیما گؤره تورکلر اؤزلری بو دئییم‌لری آپاردیق‌لاری نظره اویغون گلیر. اولا بیلسین کی بوندا دا یانیلیرام. بئله بیر یییه‌لنمک تکجه دئییم‌لر یوخ بلکه دب‌لر، موسیقی، تاریخ، فیکیرآدام‌لاری و باشقا قونولاردا دا بوللوق‌جا اولور.
اوشاق‌لیق چاغلاریمدا نییه دونیایا گلدی‌ییمی بیریندن سوروشمادیم. دوزون سوروشسان ذئهنیمه ده گلمه‌دی. دونیایا گلمه‌یی بیر دوغال حاق بیلیب، یاشاماغی دا اؤز حاققیم بیلیردیم. اوشاقلیقدا نئجه بویومه‌ییمیزه بیر پلان یوخ‌ایدی دئیه‌سن. تکجه یادیمدا قالان سؤزلر، درس اوخویوب اؤزومه آدام اولدوغوم ایدی. بیر ده هر گلنه قوشولماماغیمیزی وورغولویوردولار. آمما کیمه قوشولدوغوموزو دئمیردیلر. تکجه پیس اوشاق‌لارین یانینا گئتمکدن چکین‌دیریلمیش‌دیک. کوچه‌لرده قالمیش اوشاق‌لاردان اوزاق‌لاشمالی‌دیق. یادیما سالاندا کوچه‌لردن باشقا یئرلر یوخ ایدی بیزیم بویومه‌ییمیزه. بیر خیل اوشاق بیر-بیریمیزه گیریب کوچه‌لرده بؤیویوردوک. هر بیر قد آتدیق‌دا اوشاق‌لاردان بیرلری یولدا قالیب سیرادان چیخیردیلار. اولوردو کی هر دن من ده یولدان چیخیردیم. اویوم‌لاشمادیق‌دا یولوموزو آییرمالی اولوردوق. آنجاق هر نه اولسایدی اوشاقلیقدا نییه دونیایا گلدی‌ییمیزی کیمسه بیلمیردی. دونیایا گلمه‌ییمیزین تکجه ندنی سویوموزو داواملامدیرماق‌ایدی. آنا-آتا دا نه اولاجاغیمیزا قرار وئره بیلمیردیلر. تکجه بیلیردیلر دوقتور موهندیس اولماق یاخشی ایدی. دوقتور موهندیس اولوب هر گلنین یانیندا باشلارینی اوجالتمالی‌دیق. هر بیر سوروملولوقدان قیراقدا یاشامالی‌دیق. آغریمایان باشلاریمیزا دستمال باغلامامالی‌دیق!
۱۰-۱۵ گون تئهراندان اوزاق‌لاشماق گؤزل اولورسا دا بو قارماقاریشیق شهره یئنی‌دن دؤنمک زور اولور. ها قاچیرسان یئتیره‌سن یئتیرنمیرسن. هارا قاچدیغیوی، نییه قاچدیغیوی دا چوخ زامان‌لار اونودورسان.
هر دن نییه بوردا اولدوغوم اؤزومه، یان-یؤوره‌ده اولان‌لارا سورغو اولور. باشقالارینا دئیه‌نمه‌سم ده اؤزوم بیلیرم ایش تاپماق زوروندا تئهرانا گلدیم. دؤنوب باخدیغیم‌دا اولا بیلردی گلمی‌یم. او قدر آدام گلمی‌ییب‌لر نه اولوب کی من گلمه‌سیدیم نه اولا. ترسینه بیر آز عاغلیمی باشیما ییغیب، بیر ایش ده گؤره بیلردیم نئچه‌لری منه تای گلمی‌یه‌لر. بونلاری گؤرمک راحات نظره گلسه‌ده دوغرولماغی چتین دیر. بلکه بیر گون یوخولاریمی دوغرولدا بیلدیم!