آلما یولو وئبلاگین دا کؤچرن یازیلیمین سایتینین یولا دوشمه‌یینین خبرینی گؤردوم. آلما یولو بئله یازیر:
"کؤچورن یازیلیمی آنلاین شکیلده سیزین یازیلاریزی عرب الیفباسیندان لاتین و کیریل الیفباسینا و لاتین ایله کیریل الیفباسیندان عرب الیفباسینا کؤچورور.
بو یازیلیم موهندیس علیپور-ون امک‌لری ایله یازیلیبدیر.
علیپور بوندان اؤنجه بو یازیلیمیین اؤنجه کی وئرژی‌یالارینی یاییملامیشدی.
آلما یولو اؤز نؤوبه‌سینده سایین علیپور به‌یه یورولماسین دئییب اونون امک‌لرینه سایقی بسله‌دی‌یینی بیلدیدیریر."
"غَفور بَی" اللرین آغریماسین.
بیر گون بیری منه دئدی سیز پان‌تورک‌سیز. پان‌تورکون نه اولدوغون سوروشدوقدا دئدی یانی بو کی سیز هر زامان آذربایجانی دوشونوب، آذربایجانا چالیشیرسینیز. من دئدیم مه‌یر سیز آذربایجانی دوشونمورسوز، یا دا کی آذربایجانا چالیشمیرسیز؟!
بیر گون بیر کیلاس‌داشیم وار ایدی، منه اؤیوت وئریب، اؤز دوشویوندویونو بئله دیله گتیردی؛ ایراندا جمعیت باخیمیندان اورتا یئرلرین جمعیت‌لرینین آز اولدوغونا گؤره، آذربایجان کیمی جمعیت‌لی یئرلری بوشالتمالی و جمعیت‌سیز یئرلره یئرلشدیرمه‌لی‌ییک. بونو دئدیک‌ده تئهرانین بو قدر جمعیتی اولدوغونو وورغولادیق‌دا او شهرین ایرانین اورتاسیندا اولدوغونو وورغولویوب امنیتی یؤندن یاخشی اولدوغونو بیلدیردی.
سول یولداشلاریمیزین‌دا دونیادا اولان بوتون ساواشلاری قات ساواشلاری گؤرمک‌لرینه باخمایاراق، شاه دئورینده شاه رژیمینین کاپیتالات اولماغینا باخمایاراق، آذربایجان‌دا اولان میللی موباریزه‌یه انگل اولوب، رژیم‌له بیرلیکده ایراندا بوتون دیللرین آرادان گئدیب تکجه فارس دیلینین قالماغینا دستک اولموشدولار. آذربایجانین فولکولورونا ماراق گؤستریب، تام بیر موباریزی سرگی‌لی‌ین سول‌لار دا آذربایجان‌دا میللی مسئله‌نین چؤزمهیینه مرکزده اولان پان‌فارس‌لارلا فیکیربیر ایدیلر.
ایدئولوژی‌لارین چئشیتلی اولماق‌لارینا گؤره دونیادا چئشیتلی ایدئولوژی‌لرده اولان آدام‌لار دا اولوب و اولاجاق‌دی دا. بو ایدئولوژی‌لارین دوز اولوب-اولمادیغینا باخمایاراق هر کسه عایید بیر یئر وار دیر. اینسان نه قدر اؤزونو دونیا وطنلی بیلسه بیر یئرده دوغولوب بؤیویوب. دونیالا بیرلیکده او یئره ده دوشونمه‌لی‌دیر. آذرباجانلی سول، ساغ، و هر بیر دوشونجه‌یه باغلی اینسان‌لار بونو دوشونمه‌لی‌دیرلر. آذربایجان تکجه میللتچیلرین یوخ، آذربایجانی ساوونان هر کیمه عایید دیر. آذربایجانی ساوونان هر کیم هر دوشونجه‌ده اولدوغونا باخمایاراق آذربایجانین گلیشمه‌سینی دوشونمه‌لی دیر. آذربایجانین وارلیغی آذربایجانا باغلی بوتون وارلیق‌لار دیر. دیل، دین، آیین دوشونجه، ایقتیصاد، کولتور... بونلارین هامیسی آذربایجانین وارلیغی ساییلیر.
کئچن گونلرده، غربی آذربایجانین ایرانین بیرینجی فوتبال لیگینده تیمی اولماق خبری غربی آذربایجانین خبر آژانش‌لارین‌دا!!! یاییلمیشدی. خبری ائله یازمیش‌دیلار سانکی بیر بؤلگه‌نین بوتون چیخارلی آداملاری بیر یئره ییغیشیب، تئهرانلی تیم‌لرینین بیرینین ایمتییازین آلیب‌لار. نه قدر سئوینمه‌لری اؤز یئرینده، بو ایشی غربی آذربایجانا بیر بویوک قازانج بیلیب‌لر. دئین یوخدو آی قارداش اویونچو بئجردیب‌سیز، استادیوم تیکیب‌سیز، نه‌یه سئوینیرسیز؟! سیز آلدیغینیز تیم بیر ایللیک سیزینکی اولار. آلماغینیزا آلدیز لاپ یاخشی دولاندیرماغینا پولوز وار آخی؟!. دئییرم گؤر بیز نه‌یه راضی‌ییق، تئهرانین الده اؤلن تیم‌لرینین بیرینین ایمتییازین آلماغا!
یای، یاز بیتمک‌له باشلاییب، گون-گونه قیزیب چیلله‌سینه چاتار. یایین چیلله‌سی قویروق دوغماق‌لا باشا یئتریب اوزو آشاغی فیرلانار. هاوانین ایستی‌لی‌گی آلینار. اونا گؤره ده هر ایل قویروق دوغمامیشا قالان چیممک ایسته‌ین‌لره سولار سویوماسین دئیه چیممه‌یه گئدرلر. قویروق دوغاندان سونرا هاوا سرینله‌دیکده سویا گیرمک‌له سویوغون جانا اوتورماغی بیر اولار. بو ایل قویروغون دوغماسی‌نی گؤزلسک ده، قویروق دوغاندان سونرا، هاوا بیردن چوخ ایستی‌له‌دی. آغ یئل اسیب، جانلاردان تری آخیتدیردی. آخان ترلر ده گؤزلره دولوب گؤزلری قان چاناغینا دؤندردیلر.
دئیه‌سن تکجه بیزیم گؤزوموز یوخ آذربایجانین گؤزو ده قان آغلاماغا باشلادی. نئچه ایللردن قاباق ترله‌مه‌یه باشلانان اورمو گؤلونون آخان ترلری گؤزلرینی ده قیزارتماغا باشلادی. گؤزلرله بیرلیکده گؤزه‌لر ده قان آغلادیلار. آد آلان آدالار دان دا آد قالمادی. قویون داغین‌دا قویونلارین قویروق‌لاری دوغمادی. ایچینی چکیب هؤنکور-هؤنکور آغلایان گؤل قان چاناغینا چئوریلدی. قان چاناغی اولان گؤلو کیم اوووتمالی‌دیر؟! کیم سو وئریب گؤزلرینی توختات‌مالی دیر؟!
یقین سیز ده بیر چوخلو دیلدن دانیشان و دیلیمیزین دوغرو-دوزگون اؤیرنمک سیستمی اولمادیغیندان گیلئی‌لنن یولداشلار ایلا اوزلشیب‌سیز.
بو گیلئی‌لنن یولداشلارین چوخونا دیله گؤره سوروشاندا دیل اوزمانی اولمادیق‌لارینی وورغولویوب، دیلین ایلکین سورغولاریندان بویون قاچیریب‌لار. گیلئی‌لی‌لیک‌لر اولدوقجا دوز دیر. هر کس بو چتینلیک‌دن دانیشما‌لی دیر. بو چتینلی‌یین چؤزمهیینه ایندی‌لیک‌ده الیمیزده نسنه اولماسا دا، باشقا چیخیش یوللاری آختارمالی‌ییق. چیخیش یوللارینین بیری ده هر کس اؤز قدریجه دیل اؤیرتمنی اولماق‌دیر.
آذربایجان تورکجه‌سی یقین آردان گئدن دیل دئییل. آنجاق بو دیل دونیادا اولان باشقا هر بیر دیل کیمی دونیانین معنوی وارلیق‌لاریندان بیری‌دیر. دیلی دوزگون اؤیرنمه‌دیک‌ده، دیلده یارادیجیلیق آزالیر. هر بیر دیلین یارادیجیلیغی آزالسا او دیلین گلیشمه‌سی چتین اولار. آنجاق بوردا بیر سؤز وار دیل حاق‌لاریندان دانیشانلار، اولدوقجا بو دیلی اؤیرنیب، اؤیرتمه‌لی‌دیر‌لر. هر کس یاشاماق اوچون بیر بؤللو سورونلاری اولسا دا، بیر دیلی اؤیرنمه‌یه یقین واقت تاپا بیلر. من بئله دوشونورم، بیر دیلی اؤیرنمک‌دن بویون قاچیرانلار، دیلین یاییلیب اؤیرنمه‌یین گرک‌لی‌یینه اولدوغو قدر اینانماییب‌لار. البت دئدیم بئله دوشونورم اولا بیلسین یانلیش دوشونورم.