| ش | ی | د | س | چ | پ | ج |
| 1 | 2 | 3 | 4 | 5 | ||
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 |
تئهراندان اوزاق‌لاشماق بیر-ایکی گونلوک اولاراق، بئینی تمیزلمک نظره گلسه ده، تئهرانین هاواسیندان اوزاقلاشدیرمیر. آذربایجانلی لاشما بیر-ایکی هفته واخت آپاریر. بئش-آلتی گون اولار تئهراندا دئییلم، آنجاق هله آذربایجاندا اولان دوروملا تام تانیش اولمامیشام. بو تانیشلیق یازیلارا دا ائتگی لی اولور. بورانین دورومون یازماغا بوردا یاشاماق گرکیر. اؤزوموزو تام آذربایجانلی گؤرسک ده آذربایجانی یازماغا آذربایجاندا اولمالی ییق. اولمادیقدا تکجه آذربایجانی یامسیلامالی ییق. البت یازان لار یازیلارینی تئهراندا یازسالار دا آذربایجانا نوستالژیک باخیش لاری اولدوغو اوچون، یازیلاریندا دا او باخیشی گتیرمکدن قاچانمازلار. اونا گؤره ده آذربایجانی یازماغا آذربایجاندا اولماق گرکیر.
دوننکی اویوندا تاماشاچی‌لارین آرالاریندا دیدرگین آن‌لار یاشاندی. پرسپولیش تیمی‌نین تاماشاچی‌لارینین چیلخا یامان‌لاری هر کسی سینیرلندیره بیلردی. هر کس ده سینیرلندی دئیه‌سن!. من ائودن باخدیقدا تئلویزیوندان سئزن سسلردن موستقیم آذربایجان‌لی‌لاری یامان‌لامالاری قولاغیما دییردی.
سؤز بوردا دیر، بئله بیر دوروملا اوزلشمک تاماشاچی‌لارین ایچینده اولا بیلر!. البت موستقیم بیر میللته یامان دئمک و یامانی ائشیدن آپاریجی‌‌نین دا گولومسومه‌یی تکجه اؤزگه‌لره توخونان‌لاردا اولار. بونلاری ترسه گؤرستمک تکجه اؤزلری بگنن‌لردن اوز وئرر. فارس کؤکنلی آژانس‌لارینین بوتونلویو اولان‌لاری ترسه گؤرستدیلر. هر کس اولان‌لاری گؤروب و سسلری ائشیتدی. بئله بیر گؤرستمه‌یین تکجه بیر ندنی وار، گؤزلری تعصب‌دن هئچ نه‌یی دوزگون گؤرنمه‌ییب‌لر. یا دا کی اونلار دا یامان‌لاری یامان بیلمیرلر!.
سون ایللرده هر کس بیر یازی‌نی یایماغا رسمی اورگانلاردان جواز آلماق ایسته‌ینده، یاییلماغین شرطلریندن بیری رسمی رسم‌الخط‌لرینه اویغون یازیلماغی دیر. دئییلن رسم‌الخط‌له یازماغا هئچ بیر بلگه گؤرستمیرلر. تکجه آغیزلاریندا دئییرلر اولماز. بیز ده هر زامان‌کی کیمی اولماز سؤزونو ائشیتدیکده یولوموز چکیب گئدیریک. گؤرورسن بیرینه اولماز اولان، باشقاسی‌نا اولماز اولمور. اؤزلری دئمیشکن "رسمی رسم‌الخطین" لاپ چتین‌لیک تؤره‌دن یئری"ئـ" حرفی‌دیر. بو حرف دوز یازیلمادیقدا چوخلو چتینلیک‌لر آرایا گتیریر. "ئـ" حرفینی اؤزلری رسمی یازی قایدالاریندا ایشلدیرلر.
سئول، مطمئن کیمی کلمه‌لره باخدیقدا بو حرفین ایشلندیـیین گؤروروک. دئمک بو حرف رسمی رسم‌الخط‌ده وار.
بو گونکو دونیادا هر بیر یازی یازیلیب، یاییلمامیش‌دان اؤنجه دؤنه‌لرله گؤزدن کئچیریلمه‌لی‌دیر. هر یازی‌نین ایکی یؤنو واردیر. بیری اونون مفهومو دیر، باشقا‌سی دوز یازیلماغی دیر. ایکی یؤنو بیر یئرده داشیمی‌یان یازیلار، اوره‌یه یاتمیر. مفهوم، یا دا بیر دوشونجه‌نی داشیماق یؤنوندن، اینسانین اوخویوب، دوشونمه‌یینه باغلی دیر. دوز یازماق‌ایسه دیلی بیلمک‌دن آسیلی دیر. اولا بیلسین بیر دوشونجه‌لی آدام دیللری دوز بیلمه‌دن سؤزونو اوخوجولارا چاتدیرا بیلمی‌یه. بیر یازیچی یازی یازان زامان دیلی اؤیره‌نه بیلر.
بیزیم یازیلاریمیز دا دوشونجه باخیمیندان نئجه اولدوغونا باخمایاراق، دیل باخیمیندان آخسی‌ییر. بو آخسیماق‌لاری آزالتماق اوچون دیل بیلن‌لر یئری گلن زامان یازیلاردا گؤرولن یانلیش‌لیق‌لاری وورغولامالی‌دیرلار. سیز وورغولویوب دوزون دئیین، دیلیمیزی بیلن‌لری آرتیرین. وورغولاماق‌لارا یئنی اؤیرنن‌لری سوروملانسین‌لار.
کئچن گونلرده آذربایجانین ایکی شهرینین خالچا ناخیش‌لاری، اؤز آدلارینا یازیلماق اوچون اولوسال اؤرگوت‌لره تانیتدیریلدی. بیرینجی‌سی تیکان تپه شهرینین تانینمیش افشار ناخیشی، ایکینجی‌سی ده خویون ریز ماهی ناخیشی ایدی. بونلارین تانینماغینا آددیم آتماق گئج ده اولسا دیرلی ایش ایدی.
بئله تانیتدیرمالار تکجه رسمی اوگانلار طرفیندن اولوب اولمادیغینی بیلمیرم. آذربایجانا عایید دونیایا تانیتدیریجی ائلئمان‌لار چوخ اولماسینا گؤره آذربایجانین بیر کسی ده اولماسا آذربایجان اؤزو ال چیرمالامالی دیر.