من دونیا سورونلارینین دوشونه‌نین بیری‌یم

  کندده دوغولسام دا، اؤزومو تانی‌یاندان شهرده اولموشام. آنجاق اوشاق‌لیغیمین بوتون یای‌لارینی کندده کئچیرتمیشم.  مدرسه قورتولدوق‌دا دورما گلدیم، کندیمیزه دئیردیم. او زامان کندیمیز ده آباد کند ساییلاردی. بیزه تای کنددن کؤچنلر اولسایدی دا، کندده یئنی ائولننلره ائو تیکیلیردی. کند تپه‌لردن باشلانیب، دوزه اوزانیردی. بایرامدا هر کسی کندده گؤره بیلردین. اونا گؤره ده محرملیک، بایرام اورالاردا منیمسه‌نیلردی. کندین هر سورونونو اؤزومون سورونوم بیلردیم. کندین احوالاتی ماراق‌لاندیراردی منی.  

   اورتا مکتبی بیتیرندن سونرا، آرتیق بایرام‌لارلا، یای‌لاری کنده کئچیرمک ایسته‌مزدیم. یولداشلارلا اولماغی به‌یه‌نردیم. آمما کنده گئنه داریخاردیم. یاواش-یاواش شهرین سورون‌لاریلا ایلگی‌لندیم. سورونلارینا بلکه ده قاتیلماق ایستی‌یردیم.  

زامان کئچدیکده من ده  تحصیل اوچون اؤز شهریمدن اوزاق‌لاشیب بؤیوک بیر شهرده یئرلشمک زوروندا اولدوم. بیر آز قالدیقدان سونرا بویوک شهری منیمسه‌دیم.  سورونلارینی دا اؤزومونکو بیلدیم. بؤیوک شهرین محرملی‌یین، بایرامین گؤرمک ایسته‌دیـییمده اؤز شهریمیزده اولانمادیم. عسگرلیک‌ده ده بیر باشقا شهرلرده اولوب، اونلارین سورون‌لارینی منیمسه‌مه‌سم ده  ماراق‌لاندیم.  

  زامان یئنه ده هیزلا سوروردو. من ده یوخاری تحصیله بیر باشقا شهرده یئرلشمک مجبوریتینده قالیردیم. داها منیم یاشیمدا اولان‌لار ایش‌سیز قالانمادیق‌لاری اوچون، من ده ایش فیکرینه دوشدوم. درسی قورتاریب-قورتارماز لاپ بویوک شهرده اؤزومه ایش تاپدیم. ایندی الیم آغزیما یئتیریردی دئمک. باخدیم گؤردوم بو بویوک شهرین سورونلاری لاپ چوخ‌ایمیش. سورونلاری گؤردوک‌ده ده ماراقلاندیم.  

 یاواش-یاواش دونیانین سورون‌لارینا ماراق‌لاندیم. دئدیم؛  باخ سن آللاه! دونیادا نه قدر چتینلیک چکن وار ایمیش. بیرلرینین ائولرینی زورلویورلار، بیرلرینه زور دئییرلر، بیرلری ایسته‌دیک‌لری کیمی یاشایان‌میرلار. کیمسه‌لر فهله‌لیک ده تاپانمیرلار، فهله‌لرین پول‌لارینی وئرمیرلر، چوخ‌لاری دا پیس گونده یاشاییرلار. دونیادا هر کس حاق‌لاردان دانیشیر، دانیشان‌لارین هامیسی گوجلو دیرلر. اؤزلرینین حاق‌لارینی ساوونمورلار. اؤزگه‌لرین حاق‌لارین ساوونورلار.  

  من دونیانی چوخ اوجالاردان گؤرمک ایستی‌ییردیم. اوجادان باخدیق‌دا بیر داغیلمیش یئر گؤردوم، دئدیم ماراقلانیم بیر. یاخینا چکدیکده کندیمیزی گؤردوم. اینانمالی دئییل ایدی، کنددن کندلیک قالمامیش‌دی. ائولرین چوخو خارابا، توت آغاج‌لاری قوروموشدو. تئز آتاما زنگ آچدیم کندیمیزین حالینی خبر وئریب نییه بئله اولدوغونو سوروشام.  

  نییه بئله اولدوغونو سوروشدوق‌دا آتام بیر سؤز دئدی، هر کس سنه تای یولون توتوب بوردان گئدیب، دالینا دا باخمادی. چوخ‌لاری فهله‌لیک آختارماغا گئتدیلر، بیر سیرالاری دا ائله گئتدیلر خبرلری گلمه‌دی.  

 دؤنوب اؤزومه باخیرام؛ 

 یاشیمین یاری‌سی سووشوب، ائو یوخوم‌دیر، ایش ده ائله کی وار، کندیم ده کی خارابا قالیب. دونیانین سورونلارینا فیکیرلشیرم.  

آهان کندین یولون آسفالتی دا آرادان گئدیب، دئییرلر دیمز آسفالت ائله‌مه‌یه، گونده جمعی بئش اون ماشین اوردان کئچر، اونلار دا گؤزلمه‌لی‌دیرلر.  

یادیمدان چیخمامیش کندیمیزین یانیندا بیر زیبیل‌خانا تیکیب‌لر، شهرین زیبیل‌لرین بوشالدیب هر دن یاندیریرلار.

 هله شهریمدن دئییم، یوخ دئمیرم دئیرلر شهرچی، کندچی، بؤلگه‌چی دیر! من دونیا سورونلارین دوشونه‌نین بیری‌یم!