تونلانان

باشی آشاغی یا ساللانمیش ایدی، بوینو لنگر کیمی چییین لری سانکی دیزلرینه ساپلامیش ایدی، گؤزلرینین یومولو  اولمادیغینی آیاقلارینی اویناتماغیندان بیلمک اولاردی، بلکه ده اولمازدی. آیاق قابیلارینین اوجولا یئرین تورپاقلارینی اویان-بویانا آتدیغینین ایزین گؤرمک اولوردو.، تورپاقلار باشماقلارینین اوستونو بوروموشدور. دئیه سن بارماقلارینین اوجونو یئره ساپلاماق اوچون یئری قازمیش دی. باشینین آغیرلیغی  قدینی ایکی بوکموشدی.  

دئیه سن اؤزونو تونلاما یاریشینی حاضیرلیـییردی، بدنینی ائله چکمیشدی بیردن بوشلانسا گؤیده گؤزدن ایتسین. بئله بوشلانماغین اولا بیلردی ضرری چوخ آداما توخونسون، هر کیمه دَیسَیدی اونو دا اؤزو کیمی گؤیه آپاراردی.  

بدنی اَیری-بویرو دیر. آمما بللی دئیلدی بو دنگه نی نئجه ساخلاماق اولار یانی بئله دنگه نی هر کیمین ایشی دئییل ایدی ساخلاسین. چوخلاری ایسته ییردیلر بدنلرینی بو قدر یوموشاق گؤره بیلسینلر، هر یاندان بدن چکیلیب بیر-بیرینه قووشماق دورومدایدی، یاواش یاواش ائله بیل هر یانی بیتوولشه جه یدی، دابانلار قووزانیب، بئلدن ده یوخاری یومورولانیب بارماق لارین اوجونا آز قالیر دی یئتیرسین. گؤرن دئیردی ایندی زووشه جک، یوماق کیمی دایانمیش دی. داغین باشیندان اؤتورسَیدین، درَنین ترکینده دایانمادان، دره نین او تاییندا اولان زیروه یه قووزانا بیلردی. تله سیک ایشی اولماسایدی ماشینی دایاندیریب، نئجه بئله اولدوغون سوروشا بیلردی. داها دوغروسو دئیه سن چیلله سینه چاتمیش دی.  بئله کی گؤروردی اونو اوردان ترپتمَدن اوردا ائله دایانمالی دی.  

آخشام اوستو ائوه دؤندویو زامان یولونو سحر کئچدیـیی یولدان سالدی. او کیشی دایانا یئر دئیه سن قالابالیق ایدی. بیر اؤلو آپاران ماشین دایانمیش دی، هر نه ائلییردیلر جنازه نین صافالدانمیردیلار. دئیه سن 24 ساعاتدان چوخ توللانمیش ایمیش!  

یاغین لارین فرقی

   بوگون ده یاغیش یاغیر، هاوانین قاش-قاباغی یئری سوپورور. یاغیش یاغدیغیندا دئیه سن یئنی دن نفس وئریر هر کسه، هر یئره، هر ائوه. یازین یاغیشینین دا باشقا دادی وار. یاشیللیق لاری اوزه چکیر. یاغیش یاغاندان نئچه گون سونرا هاوا آرینیر، نفس لر راحات گلیر گئدیر. نئچه گون یاغیش یاغاندان سونرا هاوا بیر داها خارابلاشیر آدام بئله نفس چکمه یه ده زورا دوشور.  

   تئهرانین یاغینی ایلا بیزیم طرفلرین یاغینلارینین چوخ فرقلی لیـیی وار، ایندی دئیه رم نئجه؟ 

  هر زامان تئهراندا یاغین  یاغاندان سونرا ائله بیل ماشینلاری باسیب سان بیر لیل لی، قارا سویون ایچینه، اونو تمیزلمه یه گرک گئده سن ماشین یویان یئره ماشینی یودوداسان. بیزیم طرفلرده لیلدن چوموردان خبر اولمور، یاغیندان سونرا ماشینلار ائله بیل کارواشا گئدیبلر، تکجه قورولاماق ایستیـییر.!   

ایندی ده بونون فیکرینده یم، ماشینی ساخلییام، بوتون یاغیش لار یاغاندان سونرا، اؤز یئرلریمیزه گئدن زامان یویوب چیخام.

یولداشیمین دایی سی

  کئچمیش گونلرده نئچه نفر سوبای،  بیر قالدیقدا بیر یولداشیمیز وارایدی لاپ ائو اوشاغی. شهرلرینده ایش تاپمادیغینا گؤره تئهرانا گلیب بیر دولتی ایداره ده ایشه باشلامیش دی. بیزیم  یولداشیمیزین تئهراندا قوهوم قبله سی وارایدی، کی هر دن بیرینه قوناق گئدردی. قوهوملاری دا خئیر-شرلرینده بیزی یانی یولداشیمیزین ائو بیرلرینی چاغیراردیلار. اونون 30 ایل باشی اوجالیقلا خیدمت ائله ین بیر نیظامی دایی سی وار ایدی. دایی نین ائوینده گئجه ساعات 8-ده شام یئییلب، ساعات 10-دا دا باشلار یئره آتیلیب  یاتیلاردی. یاتمامیشدان دا قاباق، ائوده تیلفون، تیلویزیون، آیفون سسلری کسیلیب باغلاناردیلار. یانی قوهوملارین دا ایشلری اولسایدی آغا دایینین قورخوسوندان صاباح صوبحه دک دؤزمه لیدیلر.  

  آغا دایی نین دا دونیادا ایکی قیزی وارایدی،  گؤزل، اردملی، باجاریقلی و بیرینجی گؤروشده ائلچی قازانان بیرلری. ائله بیر گون بو قوناقلیق لاردا بیزیمله قالیب سیننی  اؤتوشن یولداشلاریمیزدان بیری، قیزلاردان بیرینی بَیَنیب ایکی آیاغین بیر باشماغا تپیب، ائو اوشاغی یولداشیمیزدان دایی قیزیسینی ائلچی  لیک ائدیب،بو ایشین یئرینه اوتورماسیندا اونون کؤمَیینی ایسته دی. او اوشاغی یولداشیمیزدان بو سؤزو ائشیت دیـیینده رنگی قاچیب، اولمویاجاغینی سؤیله دی. دایی سینین بیلمه یینده هم قیزیزن، هم اوغلانین، هم ده اؤزونون اؤلمک لری گؤزلنیلمَیین  بیلیندیری. بیز ده نه قدر سؤز دئدیک قولاغینا گیرمه دی. تورشامیش یولدشیمیز بیر آیری قیزلا ائولنیب بیزدن آیریلدی. آنجاق ائو اوشاغی یولداشیمیزین دا سؤزلریندن بئله دوشوندوم اونون دا  دایی قیزیدا  گؤیلو وار. آمما بئله بیر سؤزون بیلینمه ییله اونلا دای قیزینین باشلارینین کسیلمک لری  گؤزو قاباغینا گلدیکده، هئچ زامان بئله بیر سؤزو دیله گتیرنمدی.  

هر باهانا ایلا دای یا بیر شئی آلیب وئریردی، البت بونو دا وورغولامالییام خان دایی اونا ایش تاپمیش دیر. قالدی قالدی سوزالیب سارالیب باشی آغاریب ساققاللاری تؤکولدو، دای قیزی سی دا ائو اوشاغینین خالااوغلوسولا ائولنیب گئتدی، او دا قالدی گؤزلرینی اووشدورا-اووشدورا!   

نییه کئچمیش یازیلارین فونتلاری قاریشیق اولور؟

گؤردویونوز کیمی کئچمیش یازیلاردا، بیر سطیرده اولان یازیلارین آراسیندا یئرسیز آرالار یارانیب، چیرکین لشیب، بونون ندنی یازیلاری WORD-دا یازیب، اوردان بورا  گتیریلمَیی دیر. نه قدر اَللشدیم اونلاری دوزنلییَـنمه دیم، سیزلردن بو چتینلیـیی نئجه پوزا بیلَجه ییمی بیلن اولسا یازسین، چوخ سئویندیرر. 

آیلی شهر

                                                  آیلی شهر   

قارانلیق یئتیشیب هر یئری بوروموشدو، یولدا اولان ماشین­لارین دا چیراق­لاری یاندیریلیب، قارشی­دان گلن سوروجولرین گؤزلرینه گیریب، دلیردی، سوروجولرین چوخلاری   چیراق­لارینی یوخاریـیا وورموش اولسایدیلار دا  قارشیدان گلن ماشین­لارا یئتینجه آشاغی­یا ائندیریردیلر، بیر سیرالاری دا تاپیلیردی یوخاریدا ساخلیـییب، اوز-اوزه گلن­­لری یولدان چیخاردیردیلار. یولون بوروق­لارین دا بو گؤزه سالماق­لار قورخولو اولوردو.

     یاندا اولان تابلو­لاردا، 35 کیلومئتر زنجانا قالماغی بیلندیریردیلر.  بوروغو دؤندوکده توپ کیمی ایشیق اوزاقدان گؤز ووردو. دئیه سن دنیزه قویولان فانارلار یوللارا دا قویولور. فانارین ایشیغی چیریلداسا، بو ایشیق باشقا بیر ایشیق اولمالی­دیر. دئدیم بلکه زنجانا دا قوندارما ایشیق قالاسی قوروب­لار. بو ایشیق دئیه­سن منی قارشیلادیق­دا ال-­آیاقدان گئدیر. تئز-تئز ساغدان سولا، سولدان ساغا کئچیر.  ایشیق ائله بیل قلمه آغاجلارینین باشینا ساپلانیب، آغاجلاری دا یئرده اولانلار جوشدوروردولار.

   گئتدیکجه ایشیق بویوب آغاجلارین چیگینیندن یئنیردی. او دئیه­سن بیر یئره باغلانمامیش­دی، نئجه دایاندیغینا فیکیر وئردیکده ایندیجه دوشدویون خاطیرلادیردی. قاباقدا گلن سوروجولر دئیه­سن پاخیللیق­لاری گلیردی، توپ ایشیغی گؤرمویوم دئیه آرابا ایشیق­لارینی یوخاریـیا قالدیریب، گؤزلریمه سالیردیلار. گؤزومو گؤیدن آلیب یولا سالدیق­دا ماشینین دره یوللانماغینی دویدوم. فرمانی بیر آز بوروب بیر داها یولا دؤندوم. باخیشلار یولدان قووزانمالی­دیلار، چوخدا یوخارییا قالدیرماق مجبورییتینده دئییلدیلر. ایشیق آیا بنزه­ییردی، آنجاق بو بویدا آیی، ایندیـیه­جن گؤرمه­ییم یادیما گلمیردی. بو آی بوتون آیی­دیر، دوورانلارین بوتونلشمیش آیی، زنجانا قوناق گلن­لری قارشیلییردی. آی، بالا-بالا داملارین اوستونه یئنیردی، نردیبان دا ایسته­مزدی اونو توتماغا. توتان ایستیـین اؤزو توتولاردی. شهر بوتونلوک­له آیا بورونموشدو. من ده آیا بورونمه­یی سئوردیم. آی بوتون آی، سوت کیمی آی، من ایسه آیسیز. نه قدر سوروب سووشماق ایسته­دیم اولمادی. دئیه سن قالمالی دیم آیلی شهرده.