80 ایل حیکایه میز(حمید آرغیش)

    "80 ایل حیکایه میز"، گونئی آذربایجان حیکایه آنتولوژیسی دیر. یازاری، حمید روستمی(حمید آرغیش)، تانینمیش حئکایه یازاری دیر. حمید آذربایجانین نثرینین یئنی دؤنمینین، ایلکین یازارلاریندان ساییلیر. حمیدی تانیمایانلار، اونو اؤزوندن بیر نسیل بؤیوک یاشدا سانیرلار. 

    بو کیتابین 452 صحیفه سی واردیر. کیتابین قابیغینین طرحینین گؤزللیی ایلک باخیشدا گؤزه چارپیر. قابیق، کیتابین ایچریسینی گؤرسه ده بیلیب-بیلمه دی_یینه گرافیکدن باشی چیخانلار نظر وئرمه لی دیرلر.   

    کیتابین تانیتیم صحفه سینین دوزنلنمه سینده یئترسیزلیک دویغوسو کیمی بیر دویغو ایلک باخیشدا آدامین ایچینده جانلانیر. تانیتیمیندان همن سونرا، کیتابین باشلیق لاری یئر آلیر. یازیچی باشلیق لاری ایکی یئره بؤلوب. بیرینجی بؤلومده؛ اؤن سؤزلری، ایکینجی بؤلومده؛ یازارلارین لیسته سی، اؤیکولرین آدلاری و سونوندا قایناقلاری یئرلشدیریبدیر. 

   آرغیش کیتابا ایکی باش سؤز یازیب: 

   بیرینجی سی، "بیر نئچه سؤز" عونوانیندا بو کیتابین نئجه توپلانماسینا آچیقلاما وئریب دیر. یازیچینین یازدیغینا گؤره، کیتابین باشلانیشی 1373 اولوب، 1386 دا سونا چاتمیشیمش کی، یازیچینین توتوقلاندی واقت، بو کیتابین فایلی بیلگی سایاری ایله بیرلیکده گئدر گلمزه گئدیب، یئنیدن توپلاماسی بو گونه دک اوزانیب دیر. یازیچینین ایلک اؤن سؤزونده  قایناق قیتلیغینی قاباریق فورمادا اوزه چکیر(گونئی آذربایجان اوچون آراشدیرماق ایسته ین هر بیر آراشدیریجینین سورونو ساییلیر). 

   ایکینجی یازی؛ "ادبیات، حئکایه ادبیاتی و حئکایه ادبیاتیمیزین تاریخینه بیر باخیش" باشلیغیندا بیر یازی دیر. ایلک اؤنجه ادبیاتین نه اولدوغونا توخونوب، سونرا ادبیاتین چئشیتلرینی، حئکایه نی، اؤیکونو دونیادا تانینمیش یازارلارین یازدیقلارینا دایاناراق آچیقلاییب دیر. یازینین آردیندا نثرین گونئیده نئجه آیاق توتدوغولا تاریخی گئدیشیندن سؤز آچیب دیر. یازیچی نین یازدیغینا گؤره میللی حوکومت دؤنمینده گونئیده یازیلار پیشگینله شیبلر. ایکینجی ائتگی لی دؤنم 1357-جی اینقیلاب دؤنمینده اولوب دیر. تورکو دیلی یئنیدن یاییلماق ایمکانی تاپیب، بو دیلده درگیلر، کیتابلار ایشیق اوزو گؤروبلر. اوچونجو ائتگی لی دؤنم، 1376-جی ایلدن باشلانیب، گونوگوندن یئنی آداملاری یئتیشدیریب. گئنل ایلگیلرین گئنیشلنمه آراجلاری، یازیچیلارین ایمکانلارینا آرتیریلیب دیر. 

  کیتاب، 1380-جی ایله دک کیتابلاری، اثرلری یاییلان یازیچیلاری ایچه ریر. آرغیش کیتابین بو بؤلومونده تاخما آدلارین سورون یاراتدیقلارینا توخونوب، تاخما آدلارین، دوغما آدلارینی تاپماغین نئجه چتین اولدوغونو وورغولویوب. عئینی حالدا تاخما آدلارین، او دؤنملرده ائتگیلرینی ده وورغولویوب دیر.  

  کیتابین اؤن سؤزلری اؤزلویونده، بیلگی وئرن بؤلوم دیر. اؤن سؤزونو اوخوماقلا، نئجه دورومدا اولدوغوموز گؤره بیلیریک. 

   کیتابی تمل بؤلومونده 39 یازارین بیوگرافیسی له، هره سیندن ان آزی بیر اؤیکو، ان چوخو ایکی اؤیکو  گتیریلیب دیر. یازارلارین بیر چوخ قیسمی تانینمیشلار دیرلار. آرالاریندا بیزیم نسله تانیش اولمایان کیمسه لر ده واردیرلار(البت منیم باخیشیملا). عباس پناهی ماکوئی، قهرمان قهرمانزاده، محمدلوی عباسی، بیگلر حائیلی، محمدرضا عافیت، فیروز صادق زاده دادرس، الف.نورانلی، ع.اورمولو، ج.میاندابلی، محمد قاضی، ع.آغ چایلی... کیمی یازیچیلاری تانیتدیرغا ندن اولوب دیر. اونلارلا بیرلیکده تانینمیش یازارلاریمیزدان( م.میشوولو، حبیب ساهر، علیقلی کاتبی، صمد بهرنگی، مرضیه احمدی، اسماعیل هادی، ناصر منظوری، حئیدر عباسی باریشماز... ) اؤرنکلر گتیریب دیر.

   کیتابین سون بؤلولومو؛ قایناقلار بؤلومو اولوب دیر. کیتابین ان یوخسول بؤلومو اولوب دیر. آرغیش دئمیشکن بئلنچی بیر  قایناق یوخسوللوغوندا  بؤیوک بیر قایناق یارانیب دیر.  

   بو کیتاب گونئی آذربایجانین گئنللیکله نثر تاریخینده، اؤزللیک له حئکایه تاریخینده ایز قویان بیر کیتاب دیر. 

  کیتابین بوتون دَیرلریله بیرلیکده آخساقلیق لاری دا واردیر. آنجاق بو آخساقلیقلار کیتابین بوتونلویونون قارشیسیندا گؤزه گلمزدیلر. بئله بیر کیتابلارین یازیلیب یاییلماسی نی یئری هر زامان بوش گؤرونوب. کیتابین باشقا وورغولاناجاق دَیری، یازارین، تانیتدیردیغی یازیچیلارین یازدیقلارینی اولدوقلاری کیمی، ال دَییلمه دن گتیرمه سی دیر.  گونئی آذربایجانین نثریله تانیش اولماق ایسته ین هر کسه بو کیتاب بیر جووهر کیمی ساییلیر.