اؤر حاققیمیزدا دورساق گؤرر

   قادین‌لارین حاق‌‌لارین ساوونماق، ائرکک‌لره بیر پرستیژ اولوب دیر. هر گون بو کیشی‌لرین سای‌لارینا دا آرتیر. هر کس اؤز آچیسیندان باخدیق‌دا دا اؤزونه بوتون قادینلارین قوروقچوسو، و قورتاریجی‌سی بیلیر. هر بیر اینسانا آرخا دورماق اؤزلویونده یاخشی دیر، نئجه آرخا دورماق و نییه آرخا دورماق دا بلکه چتین‌لی‌یه سالیر. نییه و نئجه‌لی‌یی دوز دئینمه‌دیکده ده سورونلار اوزه چیخا بیلیر. بیر ده منه تای کیشی‌لره دئمه‌لی‌یم، سیز کیشی‌لیک حاققینیزی ساوونوب اؤز حاققیزدا دورساز گؤرر!. من کیشی اولاراق قادینی نئجه باشا دوشه‌جه‌یم کی اؤزلریندن یاخشی اولا بیله.

و آینالی گئجه‌لر منی گؤزلویوجک

    گون دوغدو آی باتاندان، بولاق چیخدی سو باتاندان. آی دوغاجاق گون‌باتاندان، و  چیریلدییاجاق چیراقلار. سولار داماجاق بولاق‌لاردان و من سوسوزلوقدان قورخمویاجایام. سولار دورولاجاق، سو باتان یئرلرده. داغین اته‌یینده گؤزه‌لر گؤزه دیه‌جک. گؤزللشه‌جک داغ‌اتک‌لری و من دینجلمه‌دن، گؤزه‌لری گزه‌جه‌یم. یقین هر داغین اته‌یینده بیر گؤزه منی گؤزلویه‌جک. آی‌باتان‌دا آی باتسا دا آی‌دوغموش آیی تاپاجاغام. آلیشیقدان چیرا دک قارانلیق‌دره‌لردن، جهنم دره‌لره تک آینا تکین آی آییلاجاق و آینالی گئجه‌لر منی گؤزلویوجک.

یانسیلامی‌یالیم اؤزگه‌لرین

   باشلادیم بیر باشدان یازیلمامیش‌لاردان یازام‌‌‌‌‌‌‌، البت دونیادا چوخ یازیلار یازیلیب، یازیلان یازیلار کؤهنه‌لیب، کؤهنه‌لر بیر داها گونجل‌لشیب، اوخشاتمالار یازیلیب. هر قونودا یازیلیب. هر بیر قونویا دا ماراقلی اولان‌لار واردیر. بیر قونو اوچون ماراقلانمییان اولا بیلمز. بو دونیادا او قدر آدام وار کی قونولارلا ماراقلانالار. دونیادا نه قدر یازیلسا دا چوخ قونولارا آذربایجاندا باخیلما‌ییب، آذربایجاندا باخیلمادیغینا گؤره ده آذربایجان باخیشی یازیلمی‌ییب. آذربایجانین باخیشی‌لا  قونولارا باخیلماغی دونیا گؤزلویور. قونولارین چئشیتلی‌لیـیینه گؤره من بیلمیرم هانسی قونودان باشلی‌یام یازام. البت من بیلمیرم آذربایجان باخیشی‌لا باخا بیله‌جه‌یم یوخسا یوخ!   

  ‌آذربایجان باخیشی اولدوغونو هاردان بیله‌جه‌ییمی ده بیلمیرم. آنجاق بیلیرم ایستی‌ییرم اؤیرنم. یانسیلامی‌یالیم اؤزگه‌لرین.

یایمی، یوخسا یاز

 فصیل‌لری ایشلتدیکده، بیز بئله ایشلدیریک. یاز، یای، گوز(پاییز)، قیش. تورکیه‌ده ایسه بئله ایشلنیلیر؛ باهار، یاز، پاییز، قیش. باخدیق‌دا بیر سؤزجوک(یاز) گؤروروک ایکی فرقلی قوللانماغی اولور. هانسی قوللانیمی دوز اولا بیلمه‌یین بیلمک اوچون، بو کؤکدن اولان سؤزجوک‌لری آختارمالی‌ییق. ایکی طرفده ده گئنیش ایشلنن یایلاق‌لا قیشلاق سؤزلری وار دیر. یایلاق، یایدا سرین هاوالی یئره دئییلیر. قیش‌لاق ایسه قیش‌دا یایلاغا گؤره ایستی یئره دئییلیر. یای کلمه‌سینی تورکیه ده قوللانماسالار دا یایلاق سؤزونو قوللانیرلار. گؤرونن یازلا یای بوردا دوز قوللانیلیر.

کاش یازایدیم

   یادیما گلیر، اوچو اوخویوندا، اینشا دئییلن درسین بیرینجی ثلث(اوچلوک)-ون سیناویندا دوققوز وئرمیشدیلر. وئرمیش‌دی دئییرم اونا گؤره کی، منیم یازدیغیم بیرلیک ده اولا بیلمزدی. اینشانین قونوسو چؤره‌یه گؤره ایدی. چؤره‌یه گؤره من چوخ دئیه بیلردیم. آمما فارسجا یازانمادیم. تورکجه‌نی ده یازماغین باشارمازدیم، باشارسایدیم دا یازماغا ایزنیمیز یوخ ایدی. منیم درسلریم یاخشی‌ایدی، اونا گؤره ده دوققوز وئرمیشدیلر. درسلریم‌ده بیرینجی آقساقلیق اوردان‌ باشلادی. سونرالار بئینیم‌ده کودلانمییان درسلر ده اولوردو . او درسلری هئچ زامان اؤیرنمه‌دیم، تکجه آتلاتدیم. اینشا دئییلن درس، بیزیم‌له سوردو. او زامان‌لار او درسی باشا دوشه بیلمیردیم. اؤز دیلیمیزده یازماغی بوتونلوکله اونوتدوم. اونوتماق زوروندایدیم. اونوتماسایدیم نه اولاجاق‌ایدی. اؤز دیلیمیزی نئجه اؤیرنمه‌لیدیم بیلمیردیم. الیمه نه کیتاب دوشسه‌یدی اوخویاردیم. آختاریب تاپاردیم دا. یازماغی بئینیمده یئرلشدیره بیلمزدیم. شئعیر دئمه‌یی دوشونردیم آمما یازماغی یوخ. آخی او کیتابلاردا نئجه یازماغی اؤیرتمیردیلر. ایندی آرزیلیییرام کاش اوندا یازایدیم، دوزدن غلطدن یازایدیم.