شهرلی کندلی‌لر

شهرلی کندلی‌لر، کندلری شهر اولان کندلی-شهرلی‌لره دئییلیر. بئله بیر شهرلی‌لر شهرلی‌لی‌یی قازانماق اوچون ائله واقت‌لار اولور ساواشیب، قان تؤکورلر. هر نه اولسا، یئرلری بؤیویوب، اؤزونه بولوار، خیاوان، پارک، بیلیم‌یوردو، خسته‌خانا، بلدیه باشقانی و... ایسته‌ییر.  

   شهرلی کندلی‌لر کند ایش‌لرینین بوتونونو گؤرورلر. بو ایش گؤرن‌لرین ایچینده شهرلی‌لره تای آدام‌لار دا وار. بیری توکان دولاندیریر، بیری دئولت ایشینه گیریر. بیرلری ده بوش-بوش گزیب پول توپلاماغی به‌یه‌نیرلر(بئله پول قازانماق ایندی‌لیک‌ده کندلره ده گیریب). سوموک‌لری آغیرلانان‌لار، آتا-بابالاریندان قالان یئرلری(شهر اولدوقدا مئتیره دوشور، اکین اکمک یئرینه بؤلوب مئتیرینی ایسته‌دی‌یی پولا ساتیر) ساتیب-ساویریرلار. ائنینه-بولونا خرجله‌ییب سسینی گورولده‌دیرلر. شهرلی‌کندلی‌لر باشلار ایچینده باش چیخارتماغی به‌یه‌نیرلر. شهرلر آراسی هر یاریشمایا قاتیلیرلار.  

    اؤزلرینی چوخ به‌یه‌نمک‌لرینه باخمایاراق گؤزلری باشقا شهرلرده گزیر. داها دوغروسو باشقا شهرلری اؤزلرینه اؤرنک گؤتوروب گلیشدیریرلر. بیلمیرلر اؤرنک گؤتوردوک‌لری شهر، باشقا شهری اؤزلرینه اؤرنک گؤتوروب‌. 

     بو شهرلرین اؤزلرینه مجلیس وکیل‌لری اولمادیق‌لاری اوچون گؤزلری باشقا بؤیوک شهردن چیخان وکیل‌ده اولور. هردن مجلیسه وکیل یوللاماق اوچون بوتون گوج‌لرین وورورلار، اولمور کی اولمور.