ایکی چیلله گئجه‌سی‌

زامان 1359 چیلله گئجه‌سی، یئر بیزیم کند، بیزیم شهر 

  دولو قار یاغیب، هاوا آیازلاییب. اودون‌لاری ایچری تندیره(ائوین تندیرینده) یئرلشدیریب‌لر. بیزده بیزیم شهردن، چیلله‌گئجه‌سی اوچون بیزیم کنده گئتمیشدیک. داها دوغروسو گلین‌پایی آپارمیشدیق. گلین ده منیم عمی‌قیزیم اولوردو. پایی‌وئریلیب، گون باتمادان بابام‌گیلین(آتامین آتاسی‌گیلین) ائولرینده ییغیشمیشیق. عمی‌لر گلمیشدی، عمه‌لردن ده بیزیم کندده اولان‌لار گلمیشدی‌لر. تو دئییردین گؤیده دونوردو(بؤیوک‌لر دئییردی).  

   ننه‌م‌له گلین‌لری چیلله‌گئجه‌سینه یئیه‌جک‌لر حاضیرلاییردیلار‌. قووورقالاری ننه‌م قووروردو. لاپ بؤیوک گلین‌باجی شام پیشیریردی. آنام‌لا او بیری گلین‌باجی‌لار هره‌سی بیر ایش گؤروردو.  

  او زامان بیزیم کنده ایشیق گلمه‌میشدی. بیر چیراغ‌قاز‌لا هر یئر ایشیق‌لانمیشدی. شام یئییلدکدن سونرا هامی کورسونون آلتینا گیرمیشدی‌. قوورقالار یئییلیردی، توخوم‌لار چیتلانیردی.  

  بابام‌ دا گئچمیش‌لردن دانیشیردی(اوروس‌لارین کنده گلمک‌لریندن، کوردلرین یایلاقدا اونلارین مال‌لارینی اوغولادیق‌لاریندان، کندین احوالاتیندان). بیزلر ده بویوموز کورسودن قووزانمیردی.

  سونرا هره بیر آغیز آشیق هاواسی اوخودولار(البت کیشی‌لر اوخودولار). اکین‌لرله، کندلی‌لردن دانیشیردیلار. ائودن ائشیک هر یئر سس‌سیز‌ایدی، قارانلیق ایدی.    

زامان 1389، یئر تئهران(سیز دئیین کیمین شهری دیر) 

   چوخدان دیر سویوخدان خبر یوخدور. چیلله گلسه ده چیلله‌لیک هاوا گؤرمه‌میشیک.  

   چیلله‌گئجه‌سینی قایین‌آتا گیلده اولمالی‌ییق. بیزیم شهردن، بو شهره چیلله‌پایی گتیریب‌لر. بیر تازا گلین وار اونون اوچون پای گتیریب‌لر. ایشدن چیخیرام، ائوه گئده‌نه دک بیر ساعات چکیر. هن-هون ائله‌یه‌نه ساعات 8 اولور. سکگیزیاریما هامی ییغیشیر. 

   چیلله‌نین یئمک‌لرینی هامیسی ائشیکدن آلینیب. سوفرانی ییغیشدیرمامیش تئلویزیون آچیلیر. ائو ایستی‌لی‌ییب، هردن پنجه‌ره‌لر آچیلیر.  

  ائوده قایین‌آتادان سونرا هر کس دانیشیر. گاه تئلویزیونا باخیلیر، گاه دا تئلویزیونداکی‌لارا گؤره دانیشیلیر. چیلله‌گئجه‌سینه گلن اس‌ام‌اس‌لر اوخونولور. همه‌شه‌کی‌کیمی منیم جیب‌تئلیم یانیمدا دئییل. یارانه‌لردن(دولت پاییندان) دانیشیلیر. خیریستی‌یان‌‌لارین تازا ایل‌لری گلیر(ژانویه). دئیه‌سن چؤره‌یی باهالاتمالی اولاجاق. ائله‌بیر لاواش یوز تومن اولاجاق. هر یئردن دانیشیلر. بیز اوتوران کوچه‌ده بیر ماشینین شوشه‌سینی سیندیریب، ایچیندن ضبطینی آپاریب‌لار.  

  چوخ اوتورموشوق دئیه‌سن، سحر تئزدن ده دورمالی‌ییق.