"یازیلان سؤز یادیگار دیر"، بایرام درگیسیندن یادیمدا قالیب. یازینین کئچمیشینه باخدیقدا، دووارلاردا جیزماقلاردان توتوب، بیلگیسایاردا یازماغا تک اوزانیب. یازی الیفبالاری دیللرین ساییندان چوخ آز اولوب. بیزه گلدیکده بو الیفبالاردان بیر چوخونو قوللانمیشیق. هئچ اولماسا سون یوز ایلده اوچ الیفبادا یازمیشیق. اوچ الیفبادا یازماغیمیزا باخمایاراق، کئچمیشدن الده اولان یازلاریمیز چوخ آز اولوب، داها دوغروسو بیزه گؤستهریلنلر آز اولوب دیر. ماراقلیسی الیازمالاریمیزین اؤزوموزده اولماییب، باتی اؤلکهلرینده اولدوغودور.
دیلچیلریمیزین بیر چوخونون فیلولوژی اوزمانلاری اولدوقلاریندان آسیلی اولاراق، فیلولوژینین ده باتیدا ساخلانان یازیلارینا دایاندیغینی نظره آلاراق، بوتون دیل وارلیغیمیزی باتیلیلارین چیزدیکلرینده آختارمالیییق. فیلولوژییه دایانان دیلچیلیییمیزین ایرهلیلهیه بیلمهدییی، یازیلاریمیزن آز اولدوغوندان آسیلی اولا بیلر. داها دوغروسو کئچمیشدن یادیگار قالان سؤزلریمیز چوخ آز اولوب دیر.
یازیلارین هاردا یازیلدیغینا دایاناراق یازیلاری دؤرد یئره بؤلمهلییم؛
1- کیتابلار: دفترلرده یازیلیب، سونرالار کیتاب اولانلار. تاریخچیلرین یازدیقلارینا گؤره اسگی زامانلار چوخ ساییدا کیتابلاری اولان کیتابخانالار اولوب. دفترلر پالچیق،دری، هیروگیلیفدن اولوبلار. سونرالار کاغیذدان دفترلر یارانیبلار. تاریخدن قورتولوب قالان دفترلر کیتابا چئوریلیبلر. کئچمیشلرده باسینین نئجه اولدوغونا باخدیقدا بیر کیتابدان نئچه نوسخه یازیلدیغی ماراقلی دیر. یازیلان نوسخهلرین هر کسده اولمادیغینی گؤز اؤنونه آلدیقدا، باتیلیلارین بو نوسخهلرین ییغماسینا نه قدر امک قویدوقلاری اورتایا چیخیر. نییه امک قویدوقلارینی سون آیلارین اولایلاریندان گؤره بیلهریک.
کیتاب اولانلار تکجه دفترلرده یوخ، بلکه دووارلار، داشلار، تاختالار دا اولوب. دوورادا یازیلانلاری اوزمانلار تاپیب ساخلاییب، سونرا دیللرینی اؤیرهنیب کیتاب ائلهییبلر، هله اونلارین اوزوندن تاریخ بئله یارادیبلار. کیتابدا یازیلانلار بیر قانیت اولاراق، اؤزونو ابدیلشدیریر. اونا گؤره بیر کیتابا دؤنهلرله باخیلا بیلر. باخیلیب بیتیب آتیلمازلار.
بیزیم کیتاب پاییمیز دونیادا، بؤلگهده چوخ آز اولوب.
2- گوندهلیک؛ قازئته: گوندهلیکلرین یارانماسی چوخ اوزاقلارا قاییتمیر. توپلوملارین توپلاشدیق یئرلرده سایلارینین چوخالیب، بیربیرلریندن ها بئله اؤلکهدن خبر آلا بیلمهدیکلری، یئتیکلری گوندهلیک بیر نسنهنین یاراتماغینا ماراقلاندیریب، سونوندا یئرینه اوتوتدوروبلار. گوندهلیک گوندهکی خبرلری چاتدیرماق اوچون یاراندیقلارینا گؤره، اوخونوب قیراغا قویولور. اوستونده چوخ زامان کئچدییی واقتلار یئنیدن باخیلدیقدا تاریخ اولا بیلیرلر.
درگی باخیمیندان درگیلریمیز اولوب، درگیلرین یئنی یئرینه دوشن واقتلار درگیلردن پاییمیز چوخ اولوب، گئتدیکجه آزالیب، کسیلیب. سونرا یئنیدن اولوب، آنجاق ایلک گونلرینین ساییندا اولمویوب. ایندیلیکده ده درگیمیز آز دیر. درگیمیز آز اولدوغوندا درگیده یازانیمیز دا آز اولوب. بو اوزدن بیزدن یازیلانلار دا آز اولوب.
3- اینتئرنئت گلندن یازمالارین چوخو اوردا اولوب. اینتئرنئتین گئنیش آلانی اولدوغونا گؤره، چئشتلی یازیلارین یئری اولوب دیر. اینتئرنئت بیزه گلیب چاتانا باشقالاری ایستهدیکلرینی اوردا یازدیلار. هر یئره گئدیریک، باشقالارینین یازیلارینی گؤروروک. اؤزوموزدن آختاراندا تاپانمیریق، تاپدیقدا دا یاریمچیق اولور. اینتئرنئت باتیلارین یاراتدیقلاری اولدوغو اوچون، بیزده چوخ قاباق اولدولار. اینتئرنئتده بیزه وئریلن یئر اونلارین پایی اولور. بیز ده بیر بوجاغیندا اؤزوموز اوچون یازیریق. ماراقلیسی اؤزوموز اوچون یازیلانلارین باشقا دیللرده اولدوغو دیر.
4- پایلاشیم سیتهلرینده یازیلیب، یاییلانلار دیر. بئلنچی بیر یئرلرده یازیلارین نئجهلییینه باخیلمیر. هر کس الیندن گلهنی یازیر. ماراقلی یئری بیزیم آداملاریمیزین باشقالارین یازیلارینین پایلاشماسی دیر. ائلهبیل پایلاشیم سیتهسینده یازیلا بیلهجک یازیلاریمیز یوخ دیر. بو کئیفیتده یازارلاریمیز دا آز دیر. یازار دئدیکده، فرقلی دوشونمهیین. اوشاقلارین اللری قلم توتان چاغلاری دام-دوواری یازارلار. تورپاق اوستونده، توز اوستونده، قاردا، سولو قوملوقدا یازیلان یازیلاری دئییرم.
SMS-لر ده بو بؤلومده یئرلهشیر. موناسیبتلرده پایلانان مئساژلارا باخساز دئدیییمی گؤره بیلرسیز.