داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
وان زلزله‌سی
هردن دونیانین بیر بؤلگه‌سینده، دوغا ترس اوزونو اوردا یاشایانلارا گؤرسه‌دیر. اسگی اینانج‌لارا گؤره تانریلار اینسانلاردان اینجی‌دیک‌لری واقت اونلاری دوغانین ترس اؤزو ایله اینجیدرمیش‌لر. سئل، زلزله، یئل، بوران و بیر چوخ بونلارا تایلارینی باشلارینا گتیررمیش‌لر. بئله اینانج‌لار دینی کیتاب‌لارا دا یول تاپیب‌لار. آمما هر نئجه باخیریق باخاق، بیر یئرده فلاکت یارانان واقت، اوردا اولان‌لاردان سئوای دونیادا باشقالارینی دا ائتگی‌له‌ییر.
بو دؤنه دوغا ترس اوزونو بیزیم قونشولوغوموزدا اولان وان بؤلگه‌سینه گؤرست‌دی. وانداکی زلزله خوی، قره‌عئینی، سالماس، مرند، قره‌ضیادین دا حیس اولونموشدو. وان، تورکیه‌‌نین دوغوسوندا سینیرا یاخین لاپ بؤیوک شهر دیر. سینیرین بوتاییندا خوی، قره‌عئینی واردیر. سینیرلار قراردادی یارانسالار دا زامان سوره‌سینده، سینیر آدلاندیرلدیق‌لاری اوچون، سینیرین او تای-بوتایینی بیر-بیرلریندن فرقلی دوروما سالیب‌لار. ایندی ده وار، خویون سینیرا ساری کندلرینده‌کی‌لرین قوهوم‌لاری سینیرین اوتاییندا واردیر. ایکی فرقلی اؤلکه کیملیک بلگه‌سی ایله. ماراقلی‌سی مذهی آییریم‌لاری دا اولوب. هردن ده سینیرلار ایکی دوولت آرالاریندا اولان ایلیشگی‌له‌ره گؤره امنیتی دون گئییرلر.
بئله بیر سینیرلانما تکجه بیزیم یئرلرده یوخ، بلکه دونیانین هر یئرینده اولور. وان بیزه یاخین شهر اولسا دا، هله وانی گؤرمه‌میشم. بیلمیرم ده نئجه شهر دیر. آنجاق واندان بیر بلگه‌سل فیلیمه باخیردیم. فیلمه باخان واقت ائله بیلدیم خویو گؤرسه‌دیر. دوغانین بیچیمی، کندلری، خالقینین یاشام طرزی، اینانیلماز اوخشارلیغی وار ایدی. سونرا فیلمده ون بؤلگه‌سی اولدوغونو دئییردی. او فیلمی گؤرمه‌میشدن اؤنجه، بئینیمده یارانان ایماج، باشقالارینین یاراتدیق‌لاری ایماج ایدی. اونلارین دانیشیق‌لاری دا بیزیمکی تکین ایدی. ایستانبول آغیزی ایله یوخ، آذربایجان آغیزی ایلا دانیشیردیلار. البت ایستانبول آغیزیندان ائتگی‌لندیک‌لری ده وار ایدی.
بئله بیر چیزگی(وان، ارزرومون آذربایجانلی یاشایان یئرلری اولدوق‌لاری)، بیزیم آیین‌دوشونجه‌میزین تمل ناغیلی ساییلان اصلی-کرم داستانیندا واردیر. آمما بیزیم باخیشیمیزی اؤزوموزن آیین‌دوشونجه‌میزی اولوشدوران وارلیق‌لار یوخ، بلکه اؤزگه‌لرین الی ایله یازیلان بلگه‌لر اولوب‌دیر.
آمما هرندن چوخ، بو گون وانین زلزله وورموش خالقینا، یاردیم چاتدیرماق اؤنملی اولمالی‌دیر. زلزله‌دن سونرا هاوالار سویودو. دئدیک‌لر گؤره، هاوانین سویوقلوغو صیفریدن ده آشاغی‌یا یئنه‌جک. قونشولوق حاققیمیزی نئجه اودویه‌جه‌ییک، نئجه زلزله وورموش‌لارا یاردیمیز چاتاجاق بیلمیرم. بیر یاندان دا اؤلن‌لری عائیله‌له‌رینه نئجه توختاقلیق وئره‌جه‌ییک ده بیلمیرم. البت خبرلرده گؤردوم خویدان یاردیم گئدیب، آمما آدام ایستیر اؤزونه دوشن قونشولوق پایی‌نی دا اؤده‌میش اولا. باش‌ساغلیغینی اؤز دیل ایله یاس یئیه‌له‌رینه یاخیندان دئیه.
