آشیق‌

   کئچن گون، 1390-جی گونش ایلینین پاییزینین 53-نجو گونو سوسیال پایلاشیم دوشرگه‌لرده آشیق‌لار گؤره، توخونمالی بیر قونو پایلاشیلدی. او دا آشیق موسیقی‌سی‌نین تورکو موسیقی اولمادیغی ایدی. بو قونولا ایلگی‌لی نئچه توخونمالی مسئله وار دیر. بیرلیک‌ده باخاق:  

•    بیرینجی‌سی آشیق کلمه‌سی‌نین نئجه یازیلیشی دیر. آشیق سؤزجویونو آشیغا گؤره یازان یولداشلاریمیزین بیر چوخو "عاشق" یا "عاشیق" یازیرلار. بئله یازیلماغین ندنی ائله بو یولداش‌لارین آشیق سؤزجویونون تورکو اولدوغونا شوبهه‌لی باخماق‌لاریندان ایره‌لی گلیر. آشیغین ائله یازیلماسی، بو کلمه‌نین باشقالارینین واسیطه‌سیله یانیلتماغا یول آچیر!  

• ایکینجی سورون، بو سؤزون آلتی آی بوندان اؤنجه دئییلیب ایندی گونده‌مه گلمه‌یی دیر. یانی بیر آدام بیر سؤزو دئییر، اوستوندن زامان کئچیر، نه دئدیـیی ده یادیندان چیخیر. خبر خبرلیک ده‌یه‌رینی چوخونو الدن وئرمیش اولور. 

• اوچونجو مسئله، بو سؤزو دئیه‌نین آشیق اوزمانی اولمادیغی دیر. اؤز یازدیغینا گؤره تار ایشله‌ییب. اؤزو ده فارس تاری. فارس تاری ایشله‌ین بیری آشیق‌لارا گؤره دانیشیر. چوخ ماراقلی دیر! گئنه بیر بیلمه‌ین نظر وئریر.! 

• دوردونجو سورون، هر زامانکی کیمی بیر آذربایجانلی، آذربایجانا بالتانی وورور. داریوش پیرنیاکان دئییلن کس، احمد کسروی‌یه تای، آذربایجانی تورک گؤرمویوب فارس سئور، (مرکزه باغلی آرتئشی بیر عاییله‌‌نین اوشاغی دیر) بوتون وارلیغینی فارسلارا باغلایان، آذربایجاندان اولان بیری دیر. رسمی‌لشدیریلمیش‌لری گؤرمک دوشونجه‌سی، اونون ایلیک‌لرینه‌دک یئریـییب. بئله بیر آدامدان بوندان آرتیق دا گؤزله‌مک اولماز. 

• بئشینجی مسئله بئله بیر یاناشمالاری اولان دوشونجه‌نین، اینانمادیق‌لاری قونویا، باشقالاری گونده‌مه چکدیک‌لری واقت، یییه‌لنمک دویغولاری دیر. آشیق‌لار آذربایجان جومهوریتی آدینا یونئسکودا یازیلان واقت، یادلارینا آشیق‌لار دوشور.