"آریا"-نی سوی گؤرمک، هانسی بیلگینین گؤروشودو، او بیر سؤزدور. نئجه آریا او قدر گئنیش چئشیتلیدیر باشقا بیر سؤز، دیلچیلر نئجه دیللرین قوهوملوغون گؤردولر، باشقا بیر سؤز. آرادا، دانیشیلمایان دیللری (فارسی باستان!!!) کیمدن، هاردان اؤیرندیلر، بو دا بیر باشقا سؤز. آریاچیلیق، اوروپادان باشلانیب، ایراندا یاشاماغی دا باشقا بیر سؤزدور.
آریاچیلیق، کیمین اوچون یاراندیغینی، ایندیلیکده یاخشی بیلمک اولور. باشقا بیر مسئله، بیزلرین بو آریاچیلیغا اینانماغیمیز دیر. دیلچیلر، تاریخچیلر، سیاستچیلر، توپلومچولار هامی نئجه موطلق ایناندیلار. بو آراردا بوتون آریا آدلانان اؤلکهلر میللت اولوب، باشقالاری یاریم میللت، ائتنیک، بربر، وحشی، کرتنکهله یئیهن اولدوقلاری داها آرتیق ماراقلی دیر. آریالیلار، بیلگی گلیشدیکجه، تمدونلری چوخ کئچمیشلهره قاییدیر.
هردن آریالیلاردان باشقالارین یئرلرینی آختاراندا، دولاشیغا دوشوروک. آریالیلار سیبریدن گلیب، اورتا دوغو، گونئی آسیا، آوروپادا یئرلشدیلر. اونونلا بیرلیکده گئنه، گلمهمیشدن نئچه مین اؤنجه، بؤیوک بیر تمدون یاراتمیشدیلار. آریالی اولمایانلار هاردان گلیبلر، آللاه بیلیر، یئرلری هارادیر آللاه بیلیر.
بیزه دئسهلر آذربایجانی تانیتدیرین. ذئهنیمیزه گلن، آذربایجانین، هاواسیندان(هاواسینین یاخشیلیغیندان)، گؤرمهلی یئرلریندن، قدیمی بینالاریندان، یئمکلریندن، دبلریندن، موسیقیسیندن، اویناماقلاریندان، دوشونجه طرزیندن، تانینمیش آداملاریندان دانیشاریق. سایدیقلاریمیزین نئچهسینی دوز تانیتدیراریق قالسین یئرینده، دئسهلر بیر آذربایجانلی اولاراق، دئدیکلرینیزدن، نئچهسینی بلگهلرله قانیتلایا بیلرسیز، جاوابیمیز اؤزوموزه بللی اولمالیدیر(بیردن آدام ال-آیاغینی ایتیریر، چابالاییر بیر شئی تاپا).
سالیق وئردیکلریمیزین ایچینده، اونلولر یئرلهشیرلر. آذربایجانلی اونلولرین، هانسینی سئچمهییمیز دارتیشیلان قونو اولا بیلر!
آذربایجانین گؤرمهلی یئرلهرینین هانسینا اؤزوموزون گئتدیـییمیزی سوروشسالار، چوخلاری قیزارا بیلرلر. آذربایجانی تانیتدیرماغا هئچ اولماسا اؤزوموزون تانیماغیمیز گرکلیدیر.
مودئرنیته نه اولدوغونو بیری ایستهسه بیله اینتئرنئت بیر مودئرنیته(Modernity) وورماغی یئترلی دیر. مودئرنیتهنین ائلئمانلاریلا مودئرنیتهنیته تانییا بیلر. بیزیم پاییمیزی مودئرنیتهده سوروشاندا، هئچ اولماسا الده ائدیلن هر بیر نسنهدن فایدالانما دیر. یادیمیزدان چیخماسین بیز هلهلیک بوتون اورونلرین ایشلهدهنیییک. آمما مودئرنیتهیه ندن اولانلاری، بیز باشیمیزدان سووموشوق یوخسا یوخ، او دا بیزی ایلگیلندیرمیر. دوغولدوغوموز زاماندان، مودئرنیتهنی یاشاماساق بئله مودئرنیتهنین ایشیغیندا یاشامیشیق.
مودئرنلییی ایچ ائلهمهدن پوستمودئرنلیک قاپیلاری دؤیدو. پوستمودئرنلییی یاشاماساق دا، مودئرنلییه تای کؤلگهسینده یاشاییریق. مودئرنلیک، ها بئله پوستمودئرنلیک(Postmodernity)ایستهمهدن قولاقلاریمیزا چاتیب.
بیزلرین ایچینده بیرلری اؤزلرینی مودئرن، بیرلری پوستمودئرن بیلیر. هر کس اؤزونو هر نه بیلیر، هئچ کیمی ایلگیلندیرمز. آنجاق مودئرن، پوستمودئرن بیلیب، اونلاری سسلندیریب، گؤروش آرتیرانلار، اؤزلری یاشاماق ایستهدیکده، یاشاماغا زورلانیرلار.
اینسان بیر قونودا، بیر یؤندن آخسادیقدا حیس اولونمور، آنجاق بوتون یؤنلرده آخسادیغی واقت، اؤزونو آیاق اوسته ساخلایانمیر. هر نه جور اؤتورورسن یئره سهرهلهنیر( بو یازیدان بیر شئی باشا دوشوب-دوشمهدیـییز مودئرنلیکله پوستمودئرنلییی نئجه باشا دوشدویوزدن آسیلی دیر!!!).
دادآلما، آلا بیلسک، یاددان چیخماز آن اولار. تانیمادیغیمیز تاملاری داددیغیمیزدا، کئشیمیزه یاتسا، یادیمیزدان چیخماییب، بیر یئریمیزده ییغیشیب قالاجاق. یئمک اولسا خاطیرلادیقجا، آغزیمیز سولاناجاق. ائشتدیـییمیز بیر ماهنی، سؤز، سس قولاغیمیزی چینلاداجاق. گزمکلر، گزیشمهیه هوسلندیرهجک. سؤزون قیساسی، گؤیلوموزدان تیکرارلانماسی کئچهجک.
دادی، داماغیزدا قالانلاری، داماغیمیزدا ساخلاماق ایستیییریکسه، هردن دادمالیییق. آما بیزیم گؤزوموز دویمور. او قدر دادیریق، دادی دادلیقدان چیخاریریق. بلکه ده تیکرارلانمایین هوهسی دادلی اولور، تیکرارلاندیقدا دادی قاچیر.
بیر زامانلار ائشیدیب، گؤروب، یئـییب، گئییب، اوخویوب، باخدیقلاریمیز سینیرلی اولوردو. آمما ایندی هئچ نه بیزه یئتمیر. هر نهیه اومساغیق دئیهسن. گؤزوموز آچیلیب، گؤزون اؤزللییی دویمازلیق دیر.
"آیری یئرلیلشمیشیک یوخسا یوخ؟" سورغوسونا، سیزین جاوابینیز نه اولاجاق بیلمیرم. اؤزگهلشمک، قالدیغیمیز یئرله اوزاقلیق-یاخینلیغیمیزا گؤره فرقلهنیر. دونیادا تکجه بیز اؤزگهلشمیشیک یوخسا، هر کسین باشینا گلن اولوب! جاوابینی هرکسدن سوروشدوقدا آلا بیلهریک. آیری یئرلیلشدیرن دوروموموز اولوب. زامان بیزی گؤزلهمیر، یولون گئدیر. دونیادان اوزاق دوشدویوموزه اینانانلارین تپگیلری نئچه جور اولور.
بیرلری، دونیانین ایرهلیلهمهسین اؤزوموزدن بیلیب، اینسانلارین فرقلی اولدوقلارینی دوشونمویوب، الده اولونان هر بیر وارلیغی منیمسهییب. ایرهلیلهمهلر کیمین آدینا اولور اولسون، سونوندا فایدالانان هر بیر کسین اولاجاغینی دوشونوب، فایدالاندیقلارینی یئترلی بیلیرلر. بئلهلر، اؤزلرینی گؤردوکلری اوچون(قیسا مودتلی اولاراق اؤزلرینی دوشونورلر، جاوانلیق کئچندن سونرا غریبسهییرلر، یالقیزلاییرلار.)، گرهکن هر بیر یئره داشینیرلار. اونلار چؤرک هر یئردن چیخسا وطن اورادیر دوشونورلر، داها دوغروسو وطنسیزلییی، وطنین سوروملولوغوندان قاچیب، باشقالارین وطنلرینده، یاشایا بیلدیکلری قدر یاشاییرلار.
باشقالاری ایرهلیلهمهیی اؤزگهلرینکی بیلیب، اونلارا بنزهمک اوچون، گرهکن هر بیر دهییشیمه قاتیلیرلار. ائولرینده اؤزگهلهشیرلر. اؤزگهلهشمهلرینه باخمایاراق، دونیانین گلیشمهسینده پایلاری اولمور. یاشام طرزلری، دوشونجه طرزلری، دونیا گؤروشلرینی دهییشدیریرلر، آما گرهکن سونوجو آلا بیلمیرلر. بونلار وطنلرینه، باشقا بیر وطن اولماق اوچون چالیشیرلار.
بیرلری ده وار، اؤزگهلشمهدن، دونیانین ایرهلیلهمهیینه، اینانیب، گلیشمهیه یول آختاریرلار. باشقالارین دئنهییملرینی گؤز اؤنونه آلاراق، آددیم آتیرلار. اونلار وطنلرینی اؤز آخیملاریندا ایرهلیلهمهیینی یاشاتماق ایستهییرلر. نه قدر اوغور قازانماقلاری، هانسی گؤروشون اوستون اولدوغوندان آسیلی اولور.