داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
داش قاپی
دوشوندوک‌لریمین پارچالارینی هردن ایسته‌دیـییم کیمی یازیرام
اوستاد یئکانلی‌نین آغیرلاما تؤره‌نی
اوستاد یئکانلی، او قدر ایسته‌نیلن بیر اینسان دیر کی بیر یول تانیشدینیز، أل چکمک ایمکان‌سیز اولور. اوستادین سایغی دَیَرلیگی، گئنیش اوره‌کلی‌یی، خوش گؤرولویو، گولر اوزلولویو، چالیشقانلیغی، ساوادی، آلچاق گؤیوللولویو اینانیلماز بیر کیملیک سرگی‌له‌ییر. اوستادین آغیرلاما تؤره‌نینین قورولما گره‌یی نئچه ایل ایدی وورغولانیردی. قاباغا دوشن بیری اولسایدی، نئچه ایل بوندان اؤنجه قورولا بیلردی. آنجاق بو وورغولامار خویدا اورتاق بیر سؤیله‌مه چئوریله بیله‌جک قدر چوخالمیشدی. بیربیرلرینی تانیمایان کولتورل چالیشقانلار، آیری-آیری وورغولاییردیلار بو تؤره‌نین گرکلیگینی. دَیرلی یازار، خوی‌نیگار درگی‌سینین باش‌یازاری ابراهیم اصلانی ایله ایلک تانیشلیغیمیزین ندنی اوستاد یئکانلی‌نین اثرلرینین تانیتدیرماغی ایدی. اوستاد یئکانلی‌نین بیر تانیتدیریلماغی اؤنملی ایدی، بیر ده یازدیغی کیتابلارین چاپا یئتیریلمه‌یی.
یانیلماسام، تؤره‌نه یئتدی گون قالان ایدی، مندن ایسته‌نیلدی بو تؤره‌نده آپاریجی اولام. آپاریجیلیق قالسین، تریبون دالیسینا چیخما تجروبم اولمادیغینا گؤره ایلک جاوابیم، یوخ ایدی. بئله بیر آغیر تؤرنلره دئنه‌ییملی آپاریجی‌لار گره‌کیر. زنگ آچان عزیز یولداشا دئدیم باشقا ایش هر نه وار دئیین گؤروم، آنجاق بو ایش ألیمدن گلمز. تؤره‌نی یئکونلاشدیرانلارین قرارلاری ایدی بو. جاواب وئرمه‌ییم قالدی سونرایا. او بؤیوکلوکده تؤره‌نه حاضیرلیقلار گؤرولموشدو، بیر ایکی باشقا یولداشین آدینی وئردیم آپاریجیلیغا، قبول اولونمادی. چاراسیزلیقدان باشلادیم دانیشان‌لارا گؤره بیلگی توپلاماغا. دانیشیغا چاغیریلانلارین ایچیندن موهندیس صرافی‌نی یاخیندان تانی‌ییردیم. اوستاد ذیحق، ها بئله دوقتور شهانقی ایله بیر ایکی یول گؤروشموشدوم. اوستاد نصیری ایله سایین محمد رحمانی‌فرله یاخیندان گؤروشمه‌سم ده، اثرلریندن اوخوموشدوم. ایکی نسلین اؤنده گئدن آیدین دوشونجه‌لی، فیکیر یئیه‌لری ایدی چاغیریلان قوناقلار. بو آغیر یوکو بوینومدان آتماغا چالیشسام دا اوغور قازانانمادیم. ایش یئرینده ایشیمین چوخ اولدوغونا گؤره، گئجه‌لری یورقونلوق، آرتیق چالیشمایا ماجال وئرمیردی. مطلب‌لری حاضیرلاماغا، بیر ایکی نفردن کؤمک ایسته‌سم ده ألیمه چاتان‌لار دئیه بیلرم، یوزده بئش اولمادی.
تؤرن جوماآخشامی گونو اولاجاق دیر. چرشمبه آخشام، تئهراندان یوللانیب، صوبح خویا چاتدیغیمدا یورقونلوق جانیمدا ایدی. واقت گلیب چاتمیشدی، بیر ساعات قالان تؤرن یئرینه گئتدیم. سئنین آفیشلرین آسیردیلار. خوشبخت‌لیک‌له سس سیستئمینی دولاندیران اوردایدی. تؤرن یئرینده، خویون یازیچیلار درنه‌یین دبیری سایین سعید فرجی ایله، گونه‌باخان درنه‌یینین سوروملولاریندان سایین علم‌قلیلو ایله فرشاد کریم‌زاده ها بئله یارپاق درنه‌ییندن سایین سالار کورلو اوردایدیلار. اوردا قرار اولدو، سعید فرجی تؤره‌نه گؤره بیلگی‌لری چاتدیرا. اوردا اؤیرندیم سایین موهندیس صرافی گله بیلمه‌یه‌جک، آنجاق بیر یازی گؤندرمیشدی، قرار ایدی اوشاقلاردان بیری اوخویا. شهر سوروملولاریندان کیمین دانیشدیغین سوروشدوغومدا، "آموزش و پرورش" ایداره‌سینین باشقانی‌نین آدین وئردیلر. تؤره‌نین باشلانیش ساعاتین؛ 15:30 وورموشدولار. قرار واقتی یاخینلاشیردی آنجاق هله گلن چوخ آز ایدی. اوستاد یئکانلی‌نین واقتلی گلمه‌سی اورَک وئریجی ایدی. اوستاد عائیله‌سی ایله بیرلیکده گلدیلر. اوستادا سئنین اوستونده یئر آیریلمیشدی. "آموزش و پرورش" اداره‌سی‌نین رئیسی حؤرمتلی قدیر محمدی معاونی ایله بیرلیکده گلمیشدیلر. دئیه‌سن دانیشماغینی وورغولادیقدا راضیلاشمامیشدی دانیشماغا. راضی سالماق منیم بوینوما دوشمودو! چوخ احتراملی ایدی، نئچه کلمه آرامیزدا دانیشدیق، قرار اولدو بیرینجی دانیشان اولاراق سئنه چیخسین‌لار.
قوناقلارین بیر چوخونون گلیب چاتماسی، 15:45-ده چَکدی. تؤرن او دَیقه‌دن، موقدس قورانین قراعتی ایله باشلادی. قاری سایین عسگر نوری ایدی. جمهوری اسلامی‌نین میللی سورودوندان سونرا، نوبت چاتمیشدی قوناقلاری چاغیرماغا. سایین قدیر محمدی بیرینجی دانیشان ایدی. دانیشیق‌لاردان چوخ یادیمدا قالانی یوخ ایدی. یادیمدا قالان خسروی آدیندا بیر مدرسه‌نین خویون "آموزش و پرورش" ایداره‌سینین موزه‌سینه چئوریلمه خبری ایدی، دوقتور محرم آقازاده ایله سایین ابراهیم اصلانی‌دن ده احتراملا آد چکدیلر.
بو آرادا آیاق اوسته دورانلار ایله تؤره‌نی دولاندیرانلارین طرفیندن قولاغیما هردن بیر سؤزلر گلیب، بیر کاغاذدا وئریلیردی. تؤرنی قورانلارین سایدیغیمدا اسپانسئرلر ایله بیر ایکی اورقانین آدی دئییلمه‌میشدی. بیر کاغاذدا یازیب وئردیلر.
ایکینجی دانیشان، سایین اوستاد بهروز نصیری ایدی. بیر بالاجا تانیتیم ایله سئنه چاغریلدی. اوستاد بیر فارسجا یازی حاضیرلامیشدی، سانیرام اوستاد یئکانلی‌یا حاضیرلانان دفترچه‌‌ده اولمالی ایدی. او دفترچه قرار ایدی تؤرن گونو اورا قاتیلانلارا وئریله، آنجاق تأسوف ایله چاپ ایشلری قورتولمامیشدی. اوستاد نصیری دانیشدیغی واقتدا خویون فرمانداری حؤرمتلی حسین سیوانی ایله چوخ دَیرلی اینسان حؤرمتلی اژدر طالیبی گلدیلر. بویوروقلاری چاتدیرانلار دئدیلر "فرماندار ایله دانیشیب‌لار دانیشماغی قبول ائله‌مه‌ییب‌لر، ائله‌یه بیلسن دانیشماغا چاغیر". فرمانداری یاخیندان گؤرمه‌میشدیم؛ اوزاقدان اوزاغا چالیشمالاریندان خبرلر واسیطه‌سی ایله خبردار اولموشدوم. حؤرمتلی اینسان سؤزوموزو یئره سالماییب، سئنه چیخدی. دانیشماقدان قاباق، اوستاد یئکانلی‌نین یانینا گئدیب، حؤرمت ائدیب سونرا دانیشدیلار. دانیشیق‌لاریندان یادیمدا قالان درس اوخودوغو ایل‌لرین خاطیره‌لری ایله، بئله بیر تؤرن‌لرین اؤنمینی وورغولاماق ایدی.
دؤردونجو دانیشان، حؤمتلی اوستاد ذیحق ایدی. اوستاد ذیحق، ایللر بؤیو قلم ووروب، مینت‌سیز بو میللتین شفاهی وارلیقلارینی قلمه آلمیشدیلار. دانیشیقلاری دا بو وارلیقلار ایله دولو ایدیلار. قرار ایدی اوستاد ذیحقین دانیشیغیندان سونرا، موسیقی قوروپو صحنه‌یه چیخا. قوروپون حاضیر اولمادیغینا گؤره، سایین دوقتور حمید سفیدگر شهانقی دانیشیغا چاغیریلدی. دوقتور شهانقی سامبالی بیر دانیشیق حاضیرلامیشدی. مؤحتشم بیر دانیشیقلا آذربایجانین فولکلور ایله کولتورونه گؤره دانیشدی. دانیشیقلارینین سونونودا بئله بیر تؤرن‌لری شهرین باشقا بؤیوک اینسانلارینا دا قورولماغینی اؤنردی.
دوقتور شهانقی‌نین دانیشیق‌لاریندان سونرا، لاچین موسیقی قوروپو سایین رضااوغلونون باشچیلیغی ایله سئنه چیخدیلار. موسیقی یاخشی آلیندیغینا گؤره، سالوندا اولانلار موسیقی‌نین آردی توتولماغینی ایسته‌دیلر. موسیقی جانلی چالیرکن، خبر وئردیلر سایین محمد رحمانی‌فرین دانیشیغینا واقت قالماییب. بیر داها ایرشاد ایداره‌سی ایله دانیشماغا گئتدیم. حاج منصور اکبری، دوقتور سیوانی ایله بیر یئرده اوتورموشدولار. واقتین آز اولدوغونو وورغولویوردولار. هر نه دانیشدیم راضی سالانمادیم. مندن ایسته‌دیلر سایین محمد رحمانی‌فره دئیم دانیشیقلاری اولمایاجاق. بئله بیر ایشی بویونوما آلانمازدیم. دئدیم "هر کس سایین محمد رحمانی‌فر دعوت ائله‌ییب، او یاخشی ائله‌یه بیلر سؤزو چاتدیرا. منده او اوز یوخ دیر دانیشیغا چاغیریلان حؤرمتلی بیر قوناغا دانیشمایاجاقسان خبری وئرم". موسیقی‌نین نئجه گئچدیگینی بیلمه‌دیم. سئنه چیخدیقدا، سایین محمد رحمانی‌فر ایله سایین موهندیس صرافی‌‌نین تانیتیم‌لاری اوخومامیشدان قاباق اوزگون اولاراق دئدیم، واقتیمیزین آز اولدوغونا گؤره سؤزلرینی ائشیدَنمه‌یه‌جه‌ییک. تؤرَنین باشلانیشیندا اولان ایستیرئسیم گئچمیشدی، آنجاق بو لحظه‌لر أن چتین گئچن آنلار ایدی. اؤنجه‌دن پلانلانیب، خبر وئریلیب، یازی آلینان قوناقلارین دانیشانماماغی آسانلیقلا سیندیریلَن بیر قونو دئییل ایدی. هر نئجه ایدی گئچدی او آنلار.
اوستاد یئکانلی‌نین اؤز دانیشیق واقتی گلیب چاتمیشدی. اوستاد دیل‌لره گؤره دانیشیردی. اوستادین دانیشدیغی واقت، گئنه پروقراملاردا دَییشیک‌لیک وئریلیردی. تؤره‌نین سونو اؤدول‌لر ایله بیتمه‌لی ایدی. اؤنجه‌دن آدلاری اؤدول‌لری قوناقلارا وئرن‌لرین لیسته‌سینده اولانلارین آدلاری اؤدول آلانلارین لیسته‌سینه گئچمیشدی. هر لحظه بیر نفر آرتیریلیر، بیر نفر آزالیردی. اوستادین دانیشیغیندان سونرا، اؤدول‌لر وئریلدی. اؤدول‌لرین ایچینده بیر اؤزل اؤدول وارایدی؛ ستارخانین عکیزی اوستا یارادیجی حؤرمتلی "کوره‌پزین" ألی ایله خالچادا سرگیلنمیشدی. اؤدولو عزیز دوستوم سایین موهندیس عباسپور؛ سالونداکیلارا گؤسته‌ره‌رک اوستادا وئردیلر. تؤرنده ایرانین خط اوستادی حؤرمتلی "محمدباقر جعفرزاده"، خویون تانینمیش یازاری سایین "حسین کرلو"، سئویملی یازار "عباس احمداوغلو"، تانینمیش یازیچی دوستوم "حمید آرغیش"، حؤرمتلی "عباس کؤچری" خط اوستادی، پئره شهرینین شهرداری جناب "نصرا..پور" گیل ده وار ایدیلار، یئرلری سئنده بوش ایدی.
اؤدوله چیخاندان سونرا، اوستاد صاحبدل، یازیچیلار درنه‌یی طرفیندن، سایین موهندیس عباسپور دا درنک‌لر طرفیدن دانیشدیلار. تؤرنده بیر چوخلارینین یئری بوش ایدی: آدلیم یازاریمیز حؤرمتلی ابراهیم اصلانی، سئویملی شاعیریمیز اوستاد هاشم عابد، حؤرمتلی یازاریمیز روقیه خانیم کبیری، خویون گنج آراشدیریجی‌سی علیرضا مقدم، عزیز یازار شهریار گلوانی یادیما گلن آدلار ایدی.
بو آرادا سئویملی یئکانلی دوستلاریمیزدان بیر شئعر حاضیرلامیشدیلار. اونلارا دا واقت اولمادی، بیر بؤیوک اوزگونلوک ده اونلارا بوشلویوق. ماراقلی قونولاردان بیری، بیر چوخ فوتوگرافچی‌نین تؤره‌نه قاتیلماقلاری ایدی. تانییان‌لار دئییردیلر، دؤرد بئش خبر دوشرگه‌سیندن او تؤره‌نه قاتیلانلار وار ایدی. آنجاق شنبه گونونو دک هئچ بیر خبر پایلاشیلمامیشدی!
فوتولار؛ بیر چوخو خوی‌نیوز سایتیندان آلینیب دیر.
دؤرد بای، دؤرد فصل( ناصیر منظوری‌نین یئنی کیتابی‌نین تانیتیمی)
نیفرته یاشایانلار، یاشامی دایاندیرانلار
نئلسون ماندئلانین اؤزللیگی، حاقسیزلیغا اوغرادیغینا رغمن، گوجو یئیهلندیکده، اونا حاقسیزلیق ائدهنلره، اونا قارا گون یاشادانلارا قارا گون یاشاتماق یئرینه، هر کسین حاقی قوروناراق نئجه یاشاماغی اؤیرتدی. ماندئللانین پایی اؤلکهسینه، ساواشین دایاندیریلماغی، اؤلکهنی بوتون یان دورانلارین بیرلیگی ایله دوزلتمهلهری اولدو. نیفرتی ووجودلاردا آزالداراق، سؤندورمهیه چالیشدی.
بوگون؛ اورتا دوغو آدلانان بؤلگهده، حاقسیزلیغا اوغرایان طرفلر، اؤج آلماق آرزیسیلا یاشاییرلار. أللری بیر یئره یئتیشدیردیکده أللریندن گلهنی أسیرگهمیرلر. بو تکجه قوروپلار آراسیندا یوخ، بلکه تک-تک اینسانلارین آراسیندا دا یارانیر. حاقسیزلیغا اوغرایانلار گوجه یئتیردیکلری زامان، ایللر بؤیو ییغدیقلاری نیفرتی توپلومون اوستونه قوسورلار(بو کلمهنی ایشلتدیکده بوتون اوخوجولاردان عوذور ایسته ییرم، بون کلمهنی ایفاده ائله‌یه بیله‌جک باشقا کلمه تاپمادیم یازماغا). بؤلگهده یاشانانلار، اؤز توپلوموموزون ایچینده یاشانانلار هر دن آدامی ائله قورخودورلار کی، گلهجک نسیللرین یوز ایللر بویو بو نیفرتدن قورتولماغی دوشونمک اولمور.
گون گئتدیکجه، نیفرتلر داها چوخ آرتیر. ماراقلیسی بو دور کی، بو نیفرتی یاشادانلار هر دوشونجهنین آیدینلاری توپلوما داشیییرلار. اؤزلرینی موطلق گؤرن آیدین اینسانلار، نیفرتی تکجه اؤزلرینده یوخ، بلکه توپلوملاریندان دا یایماغا چالیشیرلار. او اوزدن ده، ساغ سولو، سول ساغی، میللتلر بیربیرلرینی، شاعیر-شاعیری، مودور-مودورو، یازیچی-یازیچینی، دوشمن اولاراق چئورهلرینه تانیتدیریرلار. هر دن دوشونورم، تاریخ بویو ایچ-ایچه یاشایان اینسانلار، نئجه بیر-ایکی ایلده قانلارینا یئریکلهییرلر. تکجه تاپا بیلدیگیم جاواب، قودرتی أله آلماق ایستهینلرین اوزوندن اولور. قودرتی یاشاماق اوچون، نیفرتدن یارارلانیرلار. قودرتی أله آلماغا، یاشادیغی یئرلرین یئترسیزلیکلرینی رقیبلرین بویونلارینا ییخیرلار. بو دورومدان قورتولماغین تکجه یولونو، دوشمن تانیتدیردیقلاری رقیبلرین یوخ اولماغیندا گؤرورلر.
باتی اؤلکهلری، بو سورونو اؤز آرالاریندا، بئله چؤزوبلر: هئچ بیر گوج یئیهلهنن ایستهین گوجلری بیر یوللوق سیلمک اولماز. سیلمهیه چالیشماق، یاشادیقلاری یئرلرین ابدی اولاراق، چاتیشمالاردا یاشادار. اونلار، اؤز آرالاریندا گئرچکلری گؤروب، گئرچکلرین اوستونده اؤزلوکلرینی اولوشدوردولار. بو اولوشوم، باتینین آیاغ اوسته قالماغینا ندن اولدو. دوغونو گوجلری آلتینا چکمهیه ندن اولدو. اؤزلرینی وارسایییب، اؤزگهلرین گئرچکلرینی بیلهرک، وارساییب، اؤزگهلره اؤزلرینی یوخ سایدیرماغا ندن اولدو.
یالنیش دوشونمهیین، باتینی هر نهیه سبب اولان گؤرستمه‌یه چالیشمیرام. اونلارین نئجه اؤزلرینین گئرچکلرینی گؤردوکلرینی وورغولاماغا چالیشیرام. بیزلرین اؤزوموزو اولدوغوموز کیمی گؤرمه‌یه سسلهنیرم. بیری تاپیلیب دئیه بیلر، "قارداش سن اؤزون هر نه جور گؤرمک ایستیرسن گؤر، کیم دیر سنین قاباغیوی آلان". هر کسین اؤز گؤروشو اولاجاق، بیز ایستهسک ده ایستهمهسک ده! بیزیم بیزلیکده گؤروشوموزون اولوشماسینا، بوردا یاشایان هر کسیمین گؤروشو گرکلی دیر.
بایرامینیز موبارک اولسون
گوندو گلیر گئچیر عؤموردن. عؤمورو ییغیب ساخلاماق اولمور. هر نه قدر ده قاباغین آلسان، بیر یئرلردن آخیب گئدیر. بو دورومدا، عؤمورو یاشایانلارین اللریندن گلن، اونو یاخشی یاشاماق اولور. دؤنوب دالیمیزا باخساق، نئجه یاشادیغیمیزی هر کسدن یاخشی گؤرَریک.
بو ایل، سئچگی‌لرین هاواسیندا باشلاندی. سئچگی‌لرین سونوجونو چوخ آزلاری، اؤنجه‌دن دئیه بیلردیلر. سئچگی‌لر اؤزو ایله یئنی بیر دورومو یاراتدی. اؤزللیک‌له دیل حاققیندا بیر سیرا سؤزلر وئریلدی. او سؤزلره دایاناراق، دیل حاققیندا فرقلی گؤروشلر اورتایا چیخدی. باشلانیشدا، هر کس بیر ایش‌لر گؤره بیله‌جکلرینه اینانیب، او حاقدا دانیشماغا باشلادی.
بیلمیرم، کیم‌لر نه ایش گؤردولر، آنجاق گئتدیکجه بو ایشین نه قدر چتین اولدوغونو هر کس باشا دوشدو!. یاخشی باخدیغیمیزدا؛ بو حاقدا، ایلک آتدیم‌لار بئله آتیلمامیش گؤرونورلر. دیل‌لره گؤره باخیش‌لار هله تام امنیتی-پولیتکال بیر باخیش دیر. بو باخیش‌لارین دَییشیلیب، توپلوم‌‌سال(اجتماعی) ایله کولتورل(فرهنگی) باخیشا چئوریلمه‌سی، آرادا اولان بیر چوخ چتین‌لیکلری قالدیرا بیلر.
دوولت دیل‌لردن دانیشسا دا، دیل‌لرین قوروماق سیمگه‌سی اولان، "دونیالیق آنا دیلی گونو" موناسیبه‌تینه دوولت طرفیندن هئچ بیر قورولتای قورولمادی . اونون یئرینه، دیل‌سئورلرین قوردوغو ییغینجاقلارا امنیتی یاناشیلدی. آرالاری آزالماقدا اولان فرقلی گؤروشلرین آرالاری یئنیدن چوخالماغا باشلادی!
اومود اینسان اوچون دیر. اومودوم وار گلن ایل، دیل اوچون آتیلان آتدیم‌لار بیر-بیرینه یاخینلاشا. دیل، پولیتیکال دورومدان چیخیب، سوسیال- کولتورل دوروما بیر آتدیم یاخینلاشا بیله.
بایرام، بوتون ایل بایرامی توتان اینسانلارا قوتلو اولسون. گلن گونلریمیز خئییرلی اولسون. گؤزوموز یوللاردا قالماسین، سئودییمیز اینسانلارین هامیسی یانیمیزدا اولماق آرزیسیلا، سئوگیلی یولداشلار بایرامینیز موبارک اولسون.