گئریـیه قالمیش کیمی باخیلمیـیاق

  دونندن بئینیمده بیر سؤز فیرلانیر، یانی هر بیر ایش گؤرورم یئنه گلیر او فیکیرین اوستونده دایانیر. او سؤز بو دور؛ بیزیم گوونیلن قونولاردان بیری بیزیم شیفاهی لوحه_لریمیزدیر کی بو شفاهی لوحه_لرین ایچینده شفاهی خالق ادبیاتی، آشیق_لارین ماهنی لاری لا ریوایت_لری، سیجیرله_مه_لریمیز، آتالار سؤزلری و.... دیرلار. بو لوحه_لر دوشدن-دوشه گلیب بیزه چاتیب، ایندیکی زاماندا دوشدن-دوشه ایره_لیله_ینمیر. بو گون یایماق فورمو دَییشیب. فیلم،اینترنت، رومان و باشقالاری فرهنگی_لری یاییرلار. بیزیم کولتورون نئجه یاییلماغینی دیققت وئرسز بیلرسیز نه قدر ایش آپاریلمالی_دیر.   

   غربین بوتون کئچمیشدن ایندی_یه گلیب چاتان وارلیق_لاری گئنیش آلاندا دونیادا یاییلیب، اؤزلریندن سونرا باشقا میللت_لر ده اونلارین وارلیقلارینی منیمسه_مه_یه باشلیـییب_لار. او میللت_لر اؤزلرین کئچمیشدن قالان وارلیق_لارینا خور باخیرلار. بو وارلیق دئدیکده سیـیاسی آنلام داشییان وارلیق دئییل. بلکه ده اؤزلرینکی اولان وارلیق_لاری اونلاری گئریده قویان وارلیق کیمی یاناشیرلار. هر حالدا بئله بیر دورومون سؤروملوسو او میللت_لرین آیدین_لاری اولا بیلر.  

  البت بوردا ایسته_میرم هئچ کیمی سوچلویام، سوچلو اولان وارسا باشیندا ائله اؤزومو گؤرورم، تکجه بئله بیر چتینلیـیی وورغولاماق ایسته_دیم. گئج اولمادان کئچمیشده قالان وارلیق_لاریمیزی گنج_لریمیزله باریشدیرمالیـییق، یوخسا گله_جکده اونلاردان دانیشساق بیر گئریده قالمیش آدامکیمی باخیلاجاییق!    

قاچای

  بوگون یولدان کئچنده گؤزوم دووارا یاپیشان بیر کاغادا دوشدو، بیر اؤلوم بلگه سینه اوخشویوردو، یاخینا گئتدیکده ائله او جور ایدی، بو کاغاذلاردان هر گون چوخ گؤروروک، هئچ بیر ائتگی لنمه دن سووشوروق گئدیریک، اوندان سئوای بیر ایش گؤره بیلمریک. آنجاق بونو باهانا ائله_ییب یازماغیم او دونیاسین دَییشن آدامین آدی دیر. اونون آدی "قاچای" ایدی. یانی قاچای یازمیش دیلار.   

بو آدین نه آنلامی اولدوغو، بیر ده بئله بیر آدی قویانلارین، بئیین_لرینده بو آدی قویان چاغدا نه کئچیرمیش ماراقلی ایدی منیم اوچون. قاچای_ین شکلی ده کاغاذدا وار ایدی، اونون یاشینی فوتوسوندان 80 له 90 آراسی دئمک اولاردی. بو آدین آیلا باغلی اولدوغو، ها بئله آیین اؤزللیلیک_لریندن بیرینی وورغولادیغی اؤنمسه_نیلدی منه. بیر ده بو کی بیر قاچای آدلا سیجیللی_نین پوزولماسی بیر آز آدامی قیدیق_لیـییردی.  

آللاه قاچای به_یه رحمت ائله سین.

سیزجه قاچای نه دئمک دیر؟!

سیرا گونو

   او گون اونون سیراسی ایدی، قارانلیق لارا گئتمه_یه، البت قارانلیق دئدیکده ائله نظره گلیردی، یوخسا هئچ کس اورانین نئجه اولدوغونو دوشونه بیلمه_میشدی. هر کیم وارایدی بیر گون او قویودان یئنیب درینلیـیه گئتمه_لیدی، باشدان پوشک آتیلمیش دی، هئچ کس ده قایدانی پوزا بیلمزدی. یاخشی_لیغی بوردایدی کی هر کسین نئچه واقتدان سونرا گئتمه_لی اولدوغونو بیلیردی. بیلدیـیینه گؤره ده واقتی اولانا دک بیر چوخ ایشلری گؤره بیلردی.  

   قالانلارین دا بوینونا ایشلمک قویولوردو، هر کس ایشینی یئرینه یئتیرمه لیدی. دوزونه باخسایدین ایشلمک زوروندایدیلار آخی ایشلمه سه_یدیلر نئینه_مه_لیدیلر. بوش-بوش گزمکدن باشلاری شیشردی، اونلاری اینجیدن تکجه نه اوچون ایشلدیکلری ایدی، هر کسین گئتمه_لی اولدوغونا باخاراق، قازاندیق_لاری کیمین دردینه دیمه_لیدی؟! هئچ کس بیلمیردی. تکجه اونو بیلیردیلر اونلار گونده گؤردوک_لرین یازمالی دیلار.  

   یاواش-یاواش اونلارین آراسیندا یولا سالماق دبلری ده یارانمیش دیر. یولا سالماق گونون گئجه سی اوتوروب بیر بیر گئدنین ایشلرینی اینجه_لییب، هردن گولوب، هردن ده قاش_قاباق لارین تؤکردیلر. بیر ده برک تاپشیراردیلار گئتدیـیینده باشارا بیلسن بیر خبر یوللا، آمما اؤزلری ده بیلیردیلر خبر گلمه_یه_جک. یانی بیلیردیلر دئدیک ده بیلمیردیلر، دوغروسو اونلار هئچ نه بیلمیردیلر، بیلدیکلری تکجه اورانین ایچینده_یدی. هر کسین بیلگی سی اورا گؤره بیرایدی. هئچ کس باشقا بیر شئی بیلمیردی، بیلسه_یدی ده بیلیندیرمیردی.  

هر کسین اؤنجه دن گئدیش سیراسینین بللنمه_یینه باخمایاراق، گئدن زامانی آیاق_لاری گلمیردی گئتمه_یه. اونون دا آنلاری سون گونلر ده بیلینمیردی نئجه گئچیردی، ایکی گؤیول ایدی، بیر بو کی تئز گئدیب باشینا گلنی بیله، بیر ده بو کی قارانلیق_دان قورخوردو. اونلارا دئییلمیش-دی ائله او بللنمیش دیقه ده اؤزلرینی قویویا آتسین_لار، هئچ زاد دا اؤزلری ایله گؤتورمه سینلر.  

قویویا سالما دبی ده یامان دبه چؤنموشدو، نئچه جوره قویویا سالما وار ایدی، نئجه قویایا سالمادا بیر دبه چؤنموشدو. یانی بیر آدام ایسته_سه_یدی گئتمیـیه، اوردا اولانلار قویمازدیلار. اونلار باشلارین قاتمالی ایدیلار.  

نئجه قویویا سالینماغینی نظره آلدیقدا اؤزونو تئز قورتارماق ایسته_دی، آمما دئییلمیش دی او ساعاتدا قویویا دوشمه لیدی. اؤزوایله هئچ نه ده آپارا بیلمزدی، ساعات دا آپارانمازدی، دوشوندو اؤزونو قویونون ایچینده ساخلییا سونرا زامانی یئتده آتا. هر کس اؤز ایشینده اولاراق او قویویا گئدیب، چکینمه_دن قویویا یئندی. 

دلیلنمیش یئللر

  بو گونلرین گئجه لری یامان یئللی اولور. قارانلیق سریلندن سونرا یئل باشلیـییر اسمه یه، اونو دا نه اسمک، ائله بیل ایستییر هر نه وار قاباغیندا گؤتوروب آپارسین، بولوت لاری اؤزو ایله اویان-بویانا سوروتلویور. بولوتلار قورولتای قورمادان یئل اونلارین جرگه سین داغیلدیر.  

بو گونلرین گئجه یئللری اؤزونو بیر سیرالاریندان گیزلتمک ایستیـییرلر دئیه سن، گوندوز ناریندان یئللنیب، ییرقالانیب، سرخوشلانیرلار، گئجه گلجه_یین دلیلیک_لری توتور، یئر-گؤیی بنده گتیریرلر، شافاق آتمادان یورولوب، بیر ده دینجه_لیرلر. بیرلریندن کوسوب_لر، بیرلریندن اوتانیرلار!؟ او دو دئیه_سن ایشیق_دا گؤرسنمیرلر!  یئللری کیملر دلیلندیریب_لر گؤره_سن؟!

اوره یین نئجه چالیر؟

   منیم اوره ییمین دؤیونتوسو چوخالیب، تئز-تئز چالیر، اوجا چالیر، هردن ده گؤرورسن ائله بیل آدامدا اورک یوخدو! داش کیمی چالماق دا بیلمیر.  

دوغروسو آدامین اوره یی نئجه چالسا یاخشی چالار؟ دویونتولرین هامیسی بیر اولسا، یوخسا هره سی بیر تهر چالسا؟ اورک نییه گرک چالا؟ نییه گرک چالمی یا؟ نه یه گرک چالا؟ نه یه گرک چالمییا؟!  

اوره_ک چالماسا دایانسا اونو بیر داها چالدیرماق چتین اولار. ایندییه دک اوره_یینیزین دویونتوسونه فیکیر وئریبسیز. ساعات تکین چالیر؟! منیم اوره_ییم لام چالیر، بیلمیرم نییه؟ سیزین اوره_یینیز نئجه؟