دونان

اللرینی آغزینا یاخینلادیب بیربیرینه چاتیشدیریب، ایچینه پوفلویوردو. خئیلک واقتی دیر اوردا دایانمیشدی، دای دوداقلاری دا آچیلمیردی. قیشین قورو شاختا اولدوغو اینسانلارین آمانین کسیردی، تو دئییلدیکده گؤیده دونوردی.  

آیاق بارماقلارینین اوجوندان سویوخ جانینا گیریردی. سیزیلدیلار زوققولتویا چئوریلدیکده آیاقلاردان اوسته سیچراییردی. ال بارماقلارینا ائله بیل اینه سوخورساندولار، اینه لر ائله بیل یئره سپیلمیشدی اودا اللری اوسته اونلارین اوستونه دوشموشدی. آیاقلارینی بیر بیر گؤتوروب، یئره قویوردو. ائله قالسایدی یاریم ساعاتدا یئرینده دوناردی.  

"نییه بوردا دوروب، کیمی گؤزلویور. بیری دئین یوخدو وورولموش ایت ائشیه چیخمایان چاغدا سن نییه قرارلاشیردین. آی بالا سنین آخی دوداقلارین توتاجاق دانیشماغا. آغزیوی اؤرتمه سن بوتون دیشلرین دونار" اؤزو ایله دوشوندو. بو خارابا قالمیش شهرده قرارلاشماغا بیر ایستی یئر ده یوخ ایدی دئیه سن! 

بیر ایکی، یوزه کیمی ساییردی، آیاقلارین بیر بیر گؤتوروب قویور، ائله بیر خوت گؤتوروردی. دیزلری  دونوب، قاتلانمیردی. دئیه سن هر نه وار ایدی  دونموشدی. اینسانلارین یادیندا اولان بوتون شئعرلر، ماهنی لار دا دونماق حالیندایدی. بلکه بوتون دوندورولموشلار گلجک اوچون ال دَیمز ساخلانیلا بیلردیلر.  

یادینا گلن اورالاردا بینه ساتان اولاردی، ائشیکده قالانلار اؤزلرینی قیزدیرماق اوچون بینه ساتانا باش ووراردیلار. آنجاق بینه ساتاندان دا خبر یوخ ایدی. اؤز-اؤزونه گولمه یی توتدو. ایسته دی گولسون یاناقلارینین دونماغی  دوداقلارین آچیلماغینا یول وئرمه دی. انگ بوتونلوکله دونموشدو. گولمک لر ده دوندورولموشدولار!  

چوخدان ایدی بئله بیر قیشین دادماق آرزیسی اوندا یاشاییردی. اوشاقلیقدان قیشی سئوردی، قیشین شاختاسینین بیر باشقا دادی وار ایدی. قیشین دادماق چاغی دئیه سن یئتمیشدی.  

قیشین دادی بوتون وارلیغی لا اونون ایچینه ایشلیـییردی.  

دونماقدان قورتولسون دئیه ایسته دی گلدیـیی یئره قاییدا، آیاقلاری یول وئرمه دی، آیاقلار یئرده دونموشدولار. اؤزو ایسته مه دن دونموشدی! آرزیلییردی، ایندی کی دونوب ائله او دورومدا گله جه یه ساخلانیلماغین دوشونوردی.  ایسته میردی دونو آچیلدیقدا هر نه یی دَییشه.  

یاواش- یاواش قاشلاری آغیرلاشیب گؤزلرینین اوستونو اؤرتدی، دای هئچ نه گؤرموردی، ائشیتمیردی، دادمیردی، فیکیرلشمیردی..