بیزیم کندین توت آغاجلاری

   "بیزیم کند، بولاق باشی، توت آغاج_لاری،بالاگول، گؤزه" سؤزجوکلری هر زامان بئینیمده اوینویارلار. بو اویناماغی دا من سئورم. هر کس بیر گون ده دؤزه بیلمه_سه، بیزیم کندده قالماغی، ایللر بویو کندده تک قالسام دا دویماغیمی اینانمیرام. یانی بیر گوندن آرتیق کندیمیزده قالماغی من آیارلییا بیلمه_میشم. کندیمیزده_کی بولاق اوستونده_کی اوشاقلیق آنلاری منی ائله او کندده ساخلییب دئیه_سن. بولاق باشینین چئوره_لیـین توت آغاجلارینین نه زامان اکیلدیـیین بیلمیرم، آمما توت آغاجلارینین کؤلگه_لرینین آلتیندا یایین ایستی_سینین سووماغینی یاخشی خاتیرلیـییرام. اؤز-اؤزومه دوشونردیم آغاجلار ائله ایلک یارانیش_دان اوردایمیش_لار. آللاهین بولاغیندان دا سو ایچیب دویورموش_لار. آمما سون زامانلار کنده گئتدیکده توت آغاجلارینین بولاغین آخماغینا باخمایاراق قوروماسینی گؤردوکده بیر شئی_لر بئنیمی قاریشدیریر. بیرلری اکن آغاجلاری، منلر قورویانمادیلار. ایندی آغاجلار قوروسا دا سحرکی گون منلر قورویاجاق.  

یانداشیم

   اوتوبوسدا 16-جی نومره_لی صندلده اوتورموشدوم. هر دؤنه_کی کیمی، نئچه نفرلر اؤز یئرلرینده اوتورمامیشدیلار. یئرلر تئز-تئز دییشیلردی. منیم یانیمداکی صندلده بیری یئرلشمه_میشدی، بیر 20 یاشیندا جاوان اوغلان گلیب اوتوردو. من پئنجره قیراغینا چکیلدیم. منه اوز توتاراق دئدی، منه فرق ائله_مز من قیراقدا اوتورا بیلرم. من ده اونو ائشیتدیکده یئریمی اونلا دییشدیم. بیر-ایکی دیقه اوتوراندان سونرا منه اوز توتوب دئدی من چوخ تئز-تئز دوروب اوتوراجایام. قاباقکی سیرادا دئیه_سن بیر نومره_نی ایکی نفره ساتمیشدیلار. او سیرادا اوتورانلار فارسجا دانیشیردیلار. یانیمدا اوتوران یئریندن دوروب اونلارین بیلیت_لرینی آلیب باخدی. اونلارا دا دیلماجلیق ائتدی.   

  اوغلان گولش-قاباق ایدی. سؤز دئییردی، هئچ کسین ده سؤزوندن اینجیمیردی. بیزیم دالیمیزداکی سیرادا دا ایکی خانیم اوتورموشدولار، ایکی اوشاق دا قوجاقلاریندا اوتورموشدولار. اوشاق_لارین بیری کؤرپه، او بیریسی ایسه 9 یاشیندایدی. اوغلان او خانیم_لارا اوز توتاراق دئدی، سیز بو اوشاغی اورتا سالیب، یاتیردا بیلرسیز. ائله بیل ماشیندا اولان هر کسه سوروملو ایدی. اوغلاندان سوروشدوم نه ایش گؤررسن؛ دئدی: گزی آژانسین سؤروملوسودور. تورکی دانیشماغی اؤزل ایدی. هارالی اولدوغونو سوروشدوقدا اؤزونو پئره_لی تانیتدیردی. پئره_لیلرین دئییم_لرینین ایزی اوندا وارایدی. آنجاق تام اونلارکیمی دانیشمیردی. دده_سی پئره_لیمیش، آناسی اراکلی. اؤزو ده تئهران دوغوملو. پئره_لی اولدوغونا فخر ائلیـییردی. پئره_یه ده نوستالژیسی وار ایدی. او آندا منیم تئلفونوم سسلندی، جاواب وئردیکده، تئلفون دالینداکی ایستی کئف_احوال لاشیردی. سسی تانیش گلیردی. اؤزومو نه قدر زورا سالدیم تانیـیا بیلمدیم. اؤزونو تانیتدیریب، تئهراندا خسته_خانالارین بیرینده تانیشیم اولدوغونو سوروشدو. من ده دئدیم :اؤزوم بیرین تانیمیرام آنجاق سوروشوب سنه دئیه_رم.  

  گنج اوغلان دانیشیغیمی ائشیتدیکدن سونرا، دئدی: منیم باجیم اوردا اولار. اؤز آدینی، تئلفونونو وئریب، باجیسینیندا آدرئسینی وئریب، دئدی یئر به یئر اولونماسا منه زنگ آچین. من ده یولداشیما زنگ آچیب آلدیغیم بیلگی_لری وئردیم! منیم یانداشیمین نه قدر سؤزلری دوز چیخا بیلمه_یینه باخمایاراق، اوزونده اوره_یینین صافلیغی، ها بئله ائلدارلیغی بیلینیردی.  

اوچ گوندن سونرا یولداشیم زنگ آچیب، دئدی ایشلری یوللانیب.

تورک بایاتی لاری

  تورک بایاتی_لاری ناصر احمدی_دن دیرلی بیر کیتاب دیر. او بو کیتابدا الده اولان بوتون بایاتیلاری، توپلایاراق، قونو باخیمیندان اونلاری بؤلوب. بوتون بایاتی فورملارینی توپلاییب. تورکمن_لرین خوریاتلاریندان توتوب مانی_لره دک. بو کیتاب1388-جی ایل  2000 سایی_دا 1049صفحه_ده یاییلیب.  

یول ماشینلاری

  بنزین پاییمیز آزالاندان، اوزاق یوللارا اؤز ماشینیمدان گئده بیلمیرم. داها دوغروسو اؤزوم تک اولدوقدا گئده بیلمیرم. آدام اؤزو ماشین سوردوکده یورقون اولور. بیر ده کی اوزاق یولدا تک آدامین یوخوسو دا گله بیلر. البت یاددان چیخارمامالییام،  گؤز یولداشی اولانلار، بئش_آلتی ساعاتدان سونرا مورگولویوب یاتیرلار. آرالاریندا یاتمییانلار دا اولور. اونا گؤره ده بیر واقتلاری یول ماشینلارا مینمک زوروندا اولورام. بونو دا دئمه_لیـیم قاتار دا یولوما دوز گلمیر. اوچاغا دا پول یئتیشمیر مینه_سن. اوچاقلارین دوشمه_ییندن ده قورخمورام. یول ماشینلاری یول گئدیرلر، گئتمیرلر!. واقتیوی اونلارلا دؤزنلییه بیلمیرسن. بئش-آلتی ساعات اویان-بویان اولور. گاهدان ائله گلیرلر اؤدون آغزیندان گلیر. گاهدان دا هر بیر چایخانا تاپیرلار اوردا بیر چای ایچیرلر. یول ماشین_لاریندا یاتا بیلسن ده بیر هفته چکیر بدنیوین بوزوک_لری آچیلا. بوینوون دامارلاری دینجله.

بوینو یوغون ساغیرلار

  بو گونکو دونیادا بویون_لارینی اؤلچولری، سؤزلرین کئچمه_یینی بیلیندیریر. هر کسین بویونو یوغون دیر سؤزو گئچرلی دیر دئیه_سن. منه تای بویون_لاری اولانلارین دا گونلری قارا دیر. گونلری قارادیر دئمکده بویونو یوغونلارین نظرلری_جه دئییلیر. یوخسا بویونلاری نازیک اولان_لارین نظرلریجه بویون-یوغونلوغو قاراگونه سالان قونودیر. بیلیرسیز بویون نه قدر یوغونلویور اویان-بویانا دؤنه بیلمیـییب، یان-یؤوره ده اولانلاری یاخشی گؤرونولمه_یین قاباغین آلیر. آمما بویون نازیک اولدوقدا هر یئره دؤنه بیلیر، هر یئری ده گؤره بیلیر. بویونو یوغون ساغیرلاردان بیری ده بو ایسرائیل دیر. او قدر بویونو یوغونلویوب، گونون گون اورتا چاغیندا خارخین گمی_سینه سالدیریب سورا بوینون پئیسرینه یاپیشدیریر!