من هله بیر بیلمه_دیـییم سؤزجوکده قالیرام

    آنلاماق آنلامیندا ایشلنن بوتون سؤزجوک_لری یان-یانا دوزدویومده ده، چوخ آنلاردا  آنلانیلا بیلن آنلاملاری دا یادیرقاییرام. بئینیمدن چیخیر دیلیمین اوجوندا دورور. دیلیمین اوجوندا دوردوغونا گؤره اؤزومو ترپندیریب، آغزیمی دا آچیق قویوروم بلکه دیلیمین اوجوندان زویوب دوشنده آغزیمدان چیخدیـیینی قولاغیما ائشیده. ترپندیکجه زویوب دوشمه_یین یئرینه دال-دالی قاییدیب، بئینیمه جومور. سحردن آخشاما سؤزجوکلرله اللشیرم، یادیما بیر شئی گلمیر. اللشدیک_جه سؤزجوک_لری بیر-بیر یادیرقاییرام. بئنیمین بوشالماغین گؤرورم.  بیلمیرم نه ایش گؤرمه_لیدیم بو گون. تئلفونو دا سؤندورورم. گئجه قورتولور من هله بیر بیلمه_دیـییم سؤزجوکده قالیرام. بتر یورولموشام، ناهار سهل دیر شام دا یادیمدان چیخیب. گؤزلریمی یوموب یاتمالییام. 

دیللرین باجاریقلاری

  دونیادا دیللرین سایلارین دقیقجه_سینه بیلمیرم. دیللر یاراناندان ایندییه دک، نه قدر دیل یارانیب، آرادان گئتدیـیین ده بیلمیرم. ایندیکی دونیا دیللرینی نظره آلدیقدا بیر سیرا دیللر، سیاسی گوجه مالیک اولاراق اؤزلرینی گئنیشلندیریب_لر. سیاسی گوجو مالیک اولمایان دیللر ده اؤزلرینی ساخلاماق_لاری بخته قالیب. دیللرین بیر چوخلاری دین دونلارین دییشدیکده اؤزلری ده دییشیب_لر. بیر سیرالاری دا قالیب. دونیانین هاراسیندا اولدوقلارینا  گؤره ده دیللرین یاشاماق_لاری فرقلی یؤنلنیب لر. بعضی دیللر یازیلیب، بعضی دیللر یازیلمیـییب، یا دا هله الیمیزه یازیلاری چاتمییب. بیر دیلین یازیلی اولوب، اولمادیغینا گؤره او دیلین گؤجونو اؤلچمک چتین اولار. تاریخده میللت_لریت بوتونلوکله یئر اوزوندن سیلینمه_یین ده گؤره بیلیریک. بئله بیر دورومدا دیللره نظر وئردیگیمیزده الی آغاجلی آتدیم آتمالیـییق.

ایش بیر

   آردی کسیلمدن تیلفون زنگ چالیر، ایش_بیری اوردا دئییل. تیلفونون دالیندا اولان دا ایستیر هر نه جور اولمالیدیر، تئلفونا جاواب آلا. تئلفونون زنگی بوتونلوکله قافاسیندا چالینیر. دؤزور، یانی دؤزمه_لیدیر. "آی بالا بو کیمیدر آخی ال ده چکمیر" دوداقلارینین آراسیندا میزیلدیـییر. او اوتاقدا اونلارین ایکی_سیدیرلر. هره سینه ده بیر نومره واردیر. اوتاقلارینین قاپی_سی بیر دالانا آچیلیر، دالاندا اونلارین اوتاقلاریندان سونرا ایکی اوتاق وار، اوتاقلارین بیری مودیرلرینین اوتاغی_دیر. تئلفونا دؤزمیر، گئدیب سیمین چکیر. دای سسلنمیر. بو دؤنه اؤز تئلفونو سسلنیر؛ الو دئدیکده او تایدان مودیر سسلنیر، ایش_بیرینی ایستیر. او دا دئییر،گلمیـییب. اون دا اؤزونوو چاغیریر. اوتاغا گیردیکده بیر کاغاذ  گؤرسدیر؛ هر حالدا باغیشلییارسیز دئییر. الیمدن بیر ایش گلمز.  

  ایشچی گوله-گوله دئییر اؤزونوزو اوزمه_یین، بئله ایشدن چیخاریلماقلارین سایی الیمدن چیخیب. مودیرین تئلفونو سسلنیر؛ بلی دئدیکده دورومسونور، نییه دئییر.  دئییر ایش بیری ده اؤزو ایستمیر گله. اونون یانینا پای یوللانمیش دیر ایش_بیری دئیه_سن!.

گونلر بیربیر اؤتور

  گؤزووی آچیرسان، یومورسان، گؤزونه دؤندویوم گون سوووشور. گون باتیب، گئجه اولدوقدا، یاتماقدان بیر ایکی ساعات قاباق، سس_سیزلیک یاییلدیقدا، گلن گونلرده گؤره بیلن ایشلره فیکیرلشیرسن. دونیانین هیزلا فیرلاندیغینی یادیوا سالدیقدا اؤزووه سؤز وئریرسن، بیر عومور بئینین_ده یاشاتدیق_لاریوی یئرینه یئتیره_سن. او گئجه اؤزووه سؤز وئردیـیین اوچون، دینجلیک_له باشیوی قویورسان یئره یاتیرسان. بیلیرسن کی اؤزووو آللاتمیرسان. یوخودان دوردوقدا دا گئجه سؤز وئردیـییندن دیک-دیک آددیم آتیرسان. آز قالا اوچورسان. قاینالتی نی یئییب یئمه_دیکده اؤزووو گوندلیک_لرینه مشغول ائلیـییرسن. بیر آن اؤزووه گلیرسن، گؤرورسن اوتوروبسان گئجه سونو یئنه گؤردویون و گؤره بیله_جه_یین ایشلره فیکیرلشیرسن. اؤزووو دانلییا بیلمیرسن. سن گؤره بیله_جه_یین قدر گؤروبسن. تکجه نئچه ایللر بئینین_ده_کیلری دوغرولدا بیلمیرسن. او دا سندن آسیلی دئییل. گونلریمیزدن آسیلی دیر! 

دانقالان پیشدوو

 "دانقالان پیشدوو" الا کلنگه دئییریک، یادیما گلیر اوشاقلیقدا ایندیکی کیمی قوندارما(مصنوعی) "دانقالان پیشدوو"لار یوخ ایدی. بیزده بیر بؤیوک کؤتوک تاپیب، اونو اوستونه یئکه آغاج اوزالدیب، یان-یؤوره سین  برکیدیب، اوتای-بوتاییندا اوتوروب، یئنیب قووزاناردیق. دانقالان پیشدوون اؤزللیلیگی، دنگه_سیندیدی، دنگه پوزولدوقدا بیر طرف یئرده، باشقاسی دا گؤیده قالمالیدی. اوندان یئنمک اوچون ده ایکی یاندا اولانلار بیر بویدا ساخلاییب، یئنمه_لیدیلر، یوخسا بوشالمییان طرف بتر یئره دیردی.