ندن بیربیرلرینی دؤزنمیرلر؟

   بیلمیرم سیز بیلگیلی کیمسه‌لرله تانیش اولوب‌سیز یوخسا یوخ. هر قونودا بیلگی‌لی اینسان اولدوق‌لاریجا فرقلی، اوره‌یه یاتیم اولورلار. اونلارین هر بیری‌ایله اوتوردوقدا چئشیتلی باخیش‌لی اولدوق‌لاری گؤزه چارپیر. بو کس‌لرین اورتاق اؤزللی‌لیک‌لری قونولارینا بوتون واقت‌لارینین قویدوق‌لاری دیر. اونلارین اؤز ایچلرینه قاپاندیق‌لاری دا واردیر. داها دوغروسو بیلگی‌لرینه یئتیرمک اوچون باشقالارینا اوندان آرتیق دا واقت قویا بیلمزلر.  

  اونلارین باشقا اؤزللی‌لیک‌لری بیر قونودا بیر سوییه‌ده اولان بیلگین‌لر بیر-بیرلرینی چوخ چتین بَیه‌نیرلر. داها دوغروسو اونلار بیر-بیرلریندن اوزاق گزیرلر. اولا بیلسین باشقا اؤلکه‌لرده اونلارین آچیق آلانلاری اولدوق‌لارینا گؤره بیر-بیرلرینی اوز-اوزه چلشگه‌یه چکیرلر. آنجاق بیزیمکی‌لرین اؤزلرینی گؤرستدیک‌لری یئرلری اولمادان هئچ زامان فرقلی گؤروشلرله اوز-اوزه تارتیشمیرلار. بلکه ده بیر-بیرلرینی گؤزلری گؤتورمور؟!  

دئدیک‌لریم بوتون قونلارلا باغلی اوزمان‌لارین آراسیندا اولور.

ایکینجی درجه‌لی اولمویاق

  گئنل‌لیکله توپلومون آراسیندا بیر سؤز بو گونلر چوخ یئر آچیب. او دا دونیادا اولان بوتون یؤنلرین عئلمی چرچیوه‌لرینه یئرلشمک‌دیر. عئلمی اؤلچو‌لرله اؤلچولمک بیر پرستیژ اولاراق گؤزه چارپیر. عئلمی اولچو‌لری ده اولدوق‌لاری کیمی دوز قوللانماق بیر اوستون فیکره چئوریلیب. بئله بیر اؤلچولر آنا عئلم آدلانان‌لاردا دوز اولدغونا باخمایاراق، یارادیجیلیق‌لا ایلگی‌لی اولان ساحه‌لرده فاجعه‌نی اولوشدورور. تئکنیک باخیمیندان دونیالی اؤلچو‌لری گؤزلمک اولدوقجا دوز اولسا دا قاورام باخیمیندان دونیایایا اؤلچو قویماق یانلیش اولا بیلر. هر بیر توپلومون اؤزونه اؤزل کیم‌لی‌یی، ده‌یَر سیتمی واردیر. هر بیر توپلومدا اولان کیمسه، اؤز توپلومونو باشقا توپلوم‌لاردان یاخشی تانی‌یا بیلر. آچیق دئسم هر کس اؤزوندن یازمالی دیر. باشقاسی‌نی یانسیلاماق ایسته‌سه عومور بویو ایکینجی درجه‌لی قالمالی‌دیر.