دونیا خبرلرینده تبریزی آختاردیقدا تاپا بیلمهریک. تبریز گوندمده اولا بیلمیر. تبریزی آد آپاردیغیمدا بیزی(گونئی آذربایجانی) منیمسهدن تانینمیش یئردیر. بیلمیرم نه زاماندان خبرلرده یوخ دیر. من خبرلرله ایلگیلندن چوخ آز خبر گؤرموشم. دونیا خبر آژانسلارینین ایلک خبری گؤرمهمیشم.
بؤلگه(اورتا دوغو) خبر آژانسلارینین دا خبرلرینده یئرلهشمیر. تبریزی منیمسهین خبر آژانسلارینین خبرلرینده ده تبریزین خبرلرین باشیندا یئر آلماسی چوخ چتین اولور. تبریزین اؤزوندن بیر خبر دئمیرلر، نهایت اورا گلندنلردن خبر دئییلیر.
منطقهده اولان دوغایلا باغلی بؤیوک فاجیعه اورمو گؤلو اولماغینا باخمایاراق، خبرلرده بیرینجی یئری آلا بیلمیر. آمریکادا نفتقویوسو پاتلایان زامان دونیانین بیرینجی خبرینه چئوریلمیشدی. آنجاق اورمو گؤلو بوتونلوکله باتیر دونیانین بیرینجی خبرلری هئچ، خبرلرینده یئرلشمیر.
آژانسلاردا خبرلرله ایلگیلنن کیمسهلرین ایلگیلهنیری چکه بیلمیریک. بیزدن بیزیله ایلگیلنن کیمسه اعتیبارلی خبر آژانسلاریندا یوخدیرلار اولسالار دا ائتگیلی اولانمیرلار.
یاشادیغیمیز توپلومو الهشدیرمک بیر ایلکه اولاراق بیزیم توپلومدا یاشانمیر. داها دوغروسو هر بیر توپلومون اؤزونه عایید اؤزللیکلری واردیر. بیز اؤز توپلوموموزا ایچهریدن یاخشی گؤره بیلهریک. بیر سیرا اؤزللیکلری ده تام اؤزگه بیر کسلر یاخشی گؤره بیلرلر.
گونئیآذربایجانین تمل سورونو، بو توپلومون اؤزوکیمی گؤرمهمکلری دیر. بیزی آراشدیرانلارین گؤروش آچیلاری اؤز چیخارلارینین آچیسیندان دیر. بیزلر ده اؤزوموزه ایستهدیییمیزکیمی باخا بیلمیریک. باخیشلاریمیز، گیلئیلنمک اولور. گیلئیلنمکلرین چوخونون ندنینی بیلسک ده، بیر ندنی وورغولاماق اولور. چؤزوم یولو گؤستهریلمیر.
بیزی گؤرمهیه، اؤزوموز ده گؤرمهنیلمز آچیلاریمیزی آچمالیییق، داها دوغروسو اؤزوموزو اینجهلهندیرمهلیییک. هر نه اولسا بیز بیر توپلوموق. هر بیر توپلومدا اولان سورونلار دا بیزلرده وار. بو سورونلارلا یاناشماساق، سورونلاری قاچیلماز گؤروب، اونو دهییشمهیه ده چالیشمایاجاییق.
بیرینی تاپا بیلسز سیزه اوخشایا، نه دئییرسیز منه دئیین. هر کس دونیادا تک دیر، اونا تای کیمسه یوخ دیر. تک اولدوغونا باخمایاراق یاراتماق اوچون بیر کسلردن اؤیرنمهلیدیر. یاشاماغی داواملاندیرماق اوچون باشقالارینا ال اوزاتمالیدیر. تک اولدوغونا باخمایاراق جوت یاشامالیدیر. یاشادیقدا هئچ کسی اؤزونه تای تاپا بیلمز. ائکیزلر بدنلری بیر یئردن بیربیرلرینه یاپیشسالار بئله تک دیرلر.
هر کس بو دونیادا اؤزونه اؤزل، یاشاییشی گؤزل، آجیلاری هر کسدن آرتیق آجی، کدرلری هر کدردن چوخ کدردیر. سنی بیری چوخ سئویرسه ده(آنان- آتان، سنی هر کسدن چوخ سئویرلر) سنینقدر سنه جانی یانماز.
اؤلورسه بیری، ائله او اؤلور. دوغولورسا بیری ائله او دوغولور. حایات اونون اوچون دایانیر. یاخشی یاشاماغا، اؤزونه یولداش سئچمهلیدیر. یولداش سئچمکده چالیشیر اؤزونه یاخین یولداش سئچه. آنجاق نه قدر بیر کس بیرینه یاخین اولسادا اؤزو دئییل. ایمکانی وار زامان سورهسینده لاپ اوزاق کیمسه اولا. بونلاری بیلهرک یاخشی یاشاماغا هئچ کسی اؤزوموز کیمی گؤرمهمهلیییک، فرقلی باخمالیییق.
چوخونلوغو، تورک اولمایان شهرلرده، یا دا چوخونلوغو تورک اولوب شهرده گئنللیکله( دئولهتی یئرلرده) ایشلهنیلن دیل تورکو اولمایان شهرلرده، توپلومون توپلانان یئرلهرینین اورتاق دیلی دئولهتی دیل اولور.
بو شهرلرده تورکلرین تؤرهنلهرینه فارسلاردان بیر نفر قاتیلسا دا، او بیر نفره گؤره چالیشیرلار تؤرهنین دیلین فارسی ائلهسینلر. بو چالیشمالاری قینامیرام(ائله دوشونورلر، ائله ده چالیشیرلار، اوندا دا هئچ بیر یانلیشلیق گؤرمورلر).
آنجاق تورک اولان کیمسهلر ده وار کی فارسلارا تای دوشونورلر(دوشوندورولورلر). اورتاق دیل فارس اولدوغونا گؤره، هر یئرده فارس اولان زامان فارسی دانیشماغی اؤزونه گؤرهو بیلیر. بئله بیر آدام فارسلا ائولهندیکده ده، اؤزونه تورکو دانیشماق حاقی وئرمیر. بو دوشوندویوندن آسیلی اولاراق، آسمیلاسیون فخرله بوینونا آلیب. دئموکورات یاشاماغی سئچیر(دئموکوراسینی او جور تانیدیغینا گؤره).
بیزیم آذربایجانلیلاردا حاقلی گووهن یارانمادیقلارینا گؤره، هر یئرده اؤزلرینی سوچلو گؤرورلر(اونا گؤره ده فارسی دانیشماغا چالیشیرلار، بئیینلرینه ده چاتمیر تورکو دانیشیب، فارسجایا بیری چئویرسین یا دا دیل چئویرنلردن آلسینلار). تکجه حاقلی اولماق گووهنی یارانان زامان، اؤزونو حاق گؤره بیلهجک.
دونیانین یئنی ایلی گلوباللاشمیش دونیادا، خیریستییانلارین یئنی ایللری اولوب. بو ایل دؤنومونون اؤزو دوغال بیر اولای اولماغینا باخمایاراق، دینی بیر دون گئییب.
دینی دون گئیمهیینه باخمایاراق، دونیانین چوخ اؤلکهلری دونیادا چتینلییه دوشمهسینلر دئیه، یئنی ایلین باشلانیشینی، خیریستییانلارینکی سئچیب. یئنی ایلی خیریستییانلارلا بیرلیکده قوتلویورلار. بو قوتلامالاردا خیریستییانلارین دبلری ده باشقالارینا سیچرانیب، قاچیلماز اولوب آغاجی هر کس آلیب بهزهییر.
نوئل بابا، ائله او قیلیقدا قارگؤرمویهن اؤلکهلرده ده یاشانیر. موسلمان اؤلکهلر ده خیریستییان ایل باشینی کؤنوللو اولاراق، اؤزلرینه ایلباشی سئچیبلر. سئچمیینلر ده خیریستییان ایلباشی یئتیردیکده، ژانوییهنی هر آیدان یاخشی تانیییب، سئوینیرلر. اونلارین ایچینده اورهکلری دؤیوننلر ده اولور.
اؤز ایل بایرامیمیزا یئتیردیکده، سئوینمیرلر کی هئچ، دالی قالمیش دا بیلیرلر. دونیا بئلهجه گلوباللاشیر.